دنیا کے طویل القامت کرکٹرز

کرکٹ میں اپنی نمایاں کارکردگی کی وجہ سے بے شمار کھلاڑی معروف ہیں لیکن بعض کھلاڑی اپنی ’’نمایاں طبعی خصوصیات‘‘ کی وجہ سے اسٹیڈیم میں بیٹھے تماشائیوں اور گھر پر ٹی وی سیٹ کے سامنے بیٹھ کر میچ دیکھنے والے شائقین کی توجہ کا مرکز ہوتے ہیں۔ دنیا کے کئی کرکٹر اپنے چھوٹے قد کے باوجود بڑے کارنامے انجام دینے کی وجہ سے معروف رہے ہیں ، جن میں سے انگلش ٹیم کے وکٹ کیپر ٹچ کارنفورڈ کا قد صرف 5فٹ جب کہ اسپن بالر ، ’’الفریڈ پرسی ٹچ فری مین ان سے دو انچ لمبے تھے، دونوں کھلاڑی کرکٹ کے ابتدائی دور یعنی بیسوی صدی کے دوسرے عشرے میں اپنے کھیل اور بونا قامتی کی وجہ سے شائقین کرکٹ کی توجہ کا مرکز بنے رہے۔ دنیا کے ایک درجن سے زائد کرکٹر اپنی دیو قامت شخصیت کی وجہ سے مشہور ہیں۔ برطانوی کرکٹر انتھونی ایلم 6فٹ 11انچ قد کے ساتھ دنیا کے سب سے طویل قامت کرکٹر تھے، جو 1959سے 1961تک میری لی بون کرکٹ ٹیم کا حصہ رہے ہیں۔2010تک انہیں دنیا کے سب سے طویل قامت کرکٹر کا اعزاز حاصل رہا۔ ستمبر 2010ء میں ان کی طویل القامتی کا ریکارڈ پاکستانی فاسٹ بالر محمد عرفان نے توڑا۔ان کے علاوہ بھی کئی کرکٹرز جنہوں نے اپنے ’’جناتی قد‘‘، کی وجہ سے فاسٹ بالنگ کا شعبہ منتخب کیا تھا، مخالف بلے بازوں کو اپنی تیز گیندوں اور سر سے اونچے باؤنسروں سے ہراساں کیے رکھا۔ دیوقامت کھلاڑیوں کو بے شمار مسائل درپیش رہتے ہیں جب کہ انہیں بعض اوقات اپنی طویل جسامت کی وجہ سے مضحکہ خیز صورت حال کا بھی سامنا کرنا پڑتا ہے۔ٹیم کے ساتھ بیرونی ممالک کے دورے کے دوران ان کے سائز کے بیڈ نہیں ملتے، سفر کے لیے گاڑی کی نشست پر بیٹھنے میں انہیں مشکلات پیش آتی ہیں۔ میچ کے دوران انہیں بیٹنگ کرنے کے لیے شاٹ کھیلنے کے لیے یا فیلڈنگ کے دوران گیند اٹھانے کے لیے اپنے قد کی مناسبت سے بہت زیادہ جھکنا پڑتا ہے، جس کی وجہ سے ان کی کمر میں جھٹکا آجاتا ہے۔ ان میں سے زیادہ تر کرکٹرز کو کمر کی تکلیف اور گروئن انجریز کا سامنا رہتا ہے ، جس کی وجہ سے ان کی کرکٹ کی زندگی بہت ہی مختصر ہوتی ہے۔ قارئین کی دلچسپی کے لیے ذیل میں دنیا کے چند طویل قامت کھلاڑیوں کا تذکرہ پیش کیا جارہا ہے۔
 

محمد عرفان
پاکستانی کرکٹر محمد عرفان دنیا کے دراز قامت کھلاڑیوں میں پہلے نمبر پر ہیں اور 7 فٹ ایک اتچ قد کی وجہ سے انہیں آل ٹائم کا طویل القامت کرکٹر قرار دیا گیا ہے۔ ان سے قبل یہ اعزاز 2010 تک برطانوی کرکٹر، آنجہانی انتھونی ایلم کے پاس رہا، جو 6فٹ 11انچ لمبےتھے، 2010ء میں ان کا ریکارڈ پاکستانی فاسٹ بالر،محمد عرفان نے توڑا جو ان کی بہ نسبت تین انچ لمبےہیں۔ بورے والا کے نواحی اڈا ماناموڑ کے قریبی گاؤں آنکھ کھولنے والے محمد عرفان کا تعلق ایک کاشت کار گھرانے سے ہے۔ انہیں بچپن سے ہی کرکٹ کھیلنے کا شوق تھا۔ گاؤں میں کھیل کا میدان نہ ہونے کے باعث انہوں نے9سال کی عمر میں شیشم کی لکڑی سے بنائے گئے بیٹ، ٹینس بال کے ساتھ فصل کی کٹائی کے بعد کھیتوں سے خالی ہونے والی زمین اور ریلوے لائن کے ساتھ خالی جگہ پر اپنا شوق پورا کیا۔ 13سال کی عمر میں گاؤں کی ٹیپ بال ٹیم الفرید کلب میں شامل ہوئے، 1998میں جب وہ نویں جماعت میں پہنچے تو اپنے اسکول کی کرکٹ ٹیم میں شمولیت اختیار کی اور ضلع وہاڑی کی سطح پر انٹر سکولز ٹورنامنٹ کے پہلے ہی میچ میں میں انہوں نے بہترین کھیل کا مظاہرہ کیا۔ گگومنڈی کرکٹ اکیڈمی کے انسٹرکٹر ملک شفقت بھی اس میچ میں موجود تھے، انہوں نے عرفان کی صلاحیتوں کو دیکھ کر انہیں تربیت کے لیے اکیڈمی میں بلالیا۔ وہ چند سال تک گگو منڈی اکیڈمی کی طرف سے کھیلتے رہے ۔2004میں جب قومی کرکٹ ٹیم کے چیف سلیکٹر، عامر سہیل نے گگو اکیڈمی کا دورہ کیا تو ملک شفقت نے انہیں محمد عرفان سے متعارف کرایا اور ان کی بالنگ کی صلاحیتوں سے آگاہ کیا ۔عامر سہیل ان کے قد کاٹھ اور بالنگ اسپیڈ سے بہت متاثر ہوئے اور انہیں نیشنل کرکٹ اکیڈمی میں تربیت کا موقع فراہم کیا۔ 2009ء میں قائداعظم ٹرافی میں بلوچستان ٹیم کی طرف سے کھیلتے ہوئے عرفان نے بہترین بالنگ کا مظاہرہ کیا اور میچ میں 10وکٹیں حاصل کیں۔ بعد ازاں انہوں نے کے آر ایل کی ٹیم میں شمولیت اختیار کرلی اور ڈومیسٹک میچوں میں حصہ لیتے رہے۔2010ء میں پاکستانی ٹیم ا نگلینڈ کے دورے پر گئی۔ پاک ، برطانیہ سیریز کے دوران پاکستان کے فاسٹ بالرز محمد آصف اور محمد عامر کو اسپاٹ فکسنگ کے الزام میں معطل کردیا گیا ۔ پی سی بی حکام نے ان دو بالرز کی جگہ محمد عرفان کو برطانیہ طلب کیا۔وہ برطانیہ کے خلاف میچوں میں کوئی خاطر خواہ کارکردگی تو نہ دکھا سکے لیکن انگلش کھلاڑی ان کی ’’جناتی شخصیت ‘‘سے ضرور خائف دکھائی دیئے اور سیریز کے دوران ان کا لمبا قد موضوع بحث بنارہا۔ دسمبر 2012ء میں قومی ٹیم کے دورہ بھارت کے دوران ٹی ۔20میچوں کی سیریز میں محمد عرفان کی تیز رفتار گیندوں اور باؤنسرز نے تباہ کن کردار ادا کیا۔ انہوں نے 135سے 145کلومیٹر فی گھنٹہ کی رفتار سے بالنگ کرائی جب کہ بھارتی کھلاڑی ان کی خطرناک گیندوں سے زیادہ ان کی طویل قامتی کی وجہ سے بھی پریشان رہے۔2017ء میں یواے ای میں منعقد ہونے والے پاکستان سپر لیگ کے میچوں کے دوران بکیز سے رابطہ رکھنے کے جرم میں 29؍مارچ 2017 کو پاکستان کرکٹ بورڈ کی جانب سے محمد عرفان پر چھ ماہ کی پابندی عائد کردی گئی۔ پابندی ختم ہونے کے بعد انہوں نے26ستمبر2017ء سے شروع ہونے والےقائداعظم ٹرافی کے میچوں میں اپنے ادارے کی نمائندگی کی۔30؍جولائی 2018ء کو انہوں نے کیریبین لیگ کی ٹیم بارباڈوس ٹرائیڈینٹس سے کھیلنے کا معاہدہ کیا ہے۔کریبین لیگ کا آغاز اگست میں ہوگا۔محمد عرفان نے پاکستان کی جانب سے 4 ٹیسٹ میچ، 60 ون ڈے انٹرنیشنل، اور 20 ٹی ٹوئنٹی میچ کھیلے ہیں جن میں ان کی بالنگ نے نمایاں کردار ادا کیا ہے۔محمد عرفان کو لمبے قد کی وجہ سے ابتدا میں پریشان کن صورت حال کا سامنا کرنا پڑا لیکن اب میچوں کے دوران ان سے معاہدہ کرنے والی ٹیمیں، ان کے قد کاٹھ کو مدنظر رکھ کر ان کے لیے ملبوسات اور جوتے تیار کراتی ہیں۔ انہیں ہوٹل میں قیام کے دوران سوتے وقت دقت کا سامنا کرنا پڑتا تھا، ہوٹلوں کے بیڈ، ان کی قد کی مناسبت سے چھوٹے پڑجاتے تھے جس کی وجہ سے انہیں سوتے وقت پریشانی ہوتی تھی،لیکن اب ، بہ حیثیت کرکٹر ان کی خدمات حاصل کرنے والی ٹیمیں، ان کے لیے ہوٹلوں میں خصوصی بیڈز کا انتظام کرواتی ہیں۔گراؤنڈ میں جب ساتھی کرکٹرز کے ساتھ محمد عرفان کھڑے ہوتے ہیں تودیگر کھلاڑی ان کے سامنے بچے نظر آتے ہیں۔

انتھونی ایلم
اکتوبر 1938میں’’بلے چنگ لے‘‘ سرے انگلینڈ میں پیدا ہونے والے انتھونی کیرک ایلم، برطانوی ٹیسٹ پلیئر مورس ایلم کے بیٹے تھے۔انتھونی1959ء سے 1961تک فری فورسٹر کلب، سرے کاؤنٹی اور میری لی بون کی جانب سے فرسٹ کلاس کرکٹ کھیلتے رہے ۔ان کا شمار6فٹ 11انچ کے قد کے ساتھ،’’ آل ٹائم ‘‘ کے بلند قامت کرکٹر میں کیا جاتا تھا۔وہ انگلش ٹیم کے بہترین فاسٹ بالر تھے اور انہوں نے دوسال تک مخالف ٹیم کے بلے بازوں کو اپنی تیز رفتار گیندوں سے ہراساں کیے رکھا۔1954سے 1957تک وہ طالب عالمی کے دور میں اسکول کی ٹیم کی جانب سے کرکٹ کے میچوں میں حصہ لیتے رہے۔ جب وہ پہلی مرتبہ ’’چارٹر ہاؤس ‘‘ اسکول کی جانب سے میچ کھیلنے کے لیے آئے تو وہاں’’ وزڈن کرکٹر‘‘ کے حکام بھی موجود تھے۔ وہ اس کم عمر نوجوان کا قد کاٹھ دیکھ کرحیران ہوئے۔ دونوں ٹیموں کے کھلاڑی اور میچ آفیشلز، ان کے سامنے بونے لگ رہے تھے۔ انہوں نے انتھونی کے قد کی پیمائش کرائی، اس وقت ان کا قد6فٹ ساڑھے 10انچ تھا۔ چند سالوں میں اس میں مزید نصف انچ کا اضافہ ہوا۔ انتھونی نے اپنے کرکٹ کیرئیر کے دوران پانچ فرسٹ کلاس میچوں میں حصہ لیا جن میں انہوں نے15وکٹیں حاصل کیں جب کہ 1960ء میں اوول کے گراؤنڈ پر انہوں نے ایک اننگ میں پانچ وکٹیں لینے کا کارنامہ انجام دیا۔

پال ڈنکلز
6فٹ 10انچ قامت کے پال رنٹن ڈنکلز کا شمار انگلش کرکٹ ٹیم کے دوسرے طویل قامت کھلاڑی میں ہوتا ہے، جورائٹ آرم میڈیم فاسٹ بالر تھے ۔ ڈنکلز نے ابتدائی تعلیم ’’ہارو اسکول ‘‘ لندن میں حاصل کی جہاں وہ اسکول کی ٹیم کی جانب سے کرکٹ میچوں میں بھی حصہ لیتے رہے۔ 1969ء میں انہیں ڈیون کلب میں شامل کیا گیا،جس کے ساتھ کھیلتے ہوئے انہوں نے سمرسٹ سیکنڈ الیون کے خلاف ’’مائنر کاؤنٹیز چیمپئن شپ ‘‘ میں حصہ لیا۔ ڈنکلز نے 1971ء میں واروکشائر کی جانب سے انڈیا کے خلاف فرسٹ کلاس میچ ڈبیو کیا۔1971سے1975ءتک وہ ڈیون کلب کی جانب سے کھیلتے رہے۔ 1975ء میں انہوں نے ریٹائرمنٹ لے لی۔ 1972ء میں انہوں نے وکالت شروع کی اور 1993ء میں انہیں ’’کوئنز کونسل ‘‘ کا رکن بنایا گیا۔ ان دنوں وہ البین چیمبر، برسٹل میں بیرسٹر کے طور پر خدمات انجام دے رہے ہیں۔

ول جیفرسن
ولیم جیفر سن انگلش کرکٹ ٹیم کے سابق اوپننگ بیٹس مین ہیں جو ایسکس کاؤنٹی کرکٹ کلب، ناٹنگھم شائر اور لیسٹر شائر کی جانب سے کرکٹ کھیلتے رہے۔ان کا شمار 6فٹ 10انچ قد کی وجہ سے دنیا کے طویل قامت کرکٹرز میں کیا جاتا ہے۔ جیفرسن کا تعلق کرکٹر گھرانے سے ہے اور ان کے والد رچرڈ جیفرسن، سرے کاؤنٹی کی جانب سے فرسٹ کرکٹ کھیلتے رہے ہیں۔زمانہ طالب علمی میں، جیفرسن اسکول اور یونیورسٹی کی جانب سے کرکٹ میچوں میں حصہ لیتے تھے۔ 2000ء میں انہوں نے زمبابوے کے خلاف کھیلتے ہوئے ڈبیو کیا۔ان کا شمار بہترین بلے بازوں میں کیا جاتا ہےاور بیٹنگ کے دوران وہ اپنے دراز قد سے بھرپور فائدہ اٹھاکر باؤنس اور تیز گیندوں کو فضامیں ہی اپنے بلے پر روک کر بلند و بالا شاٹ کھیلا کرتے تھے، اس لیے ان کی بیٹنگ کی اوسط انتہائی شاندار رہی۔انہوں نے 2004ء میں 222رنز کی ناقابل شکست اننگز کھیلی لیکن ان کا سب سے بڑا اسکور2005ء میں ٹرپل سنچری کی صورت میں میری لی بون ینگ کرکٹرز کی ٹیم کے خلاف تھا ۔2007میں انہیں بنگلہ دیش کے ٹور کے موقع پر انگلینڈ کی اے ٹیم میں شامل کیا گیا۔ 2011ء میں انہوں نے ٹی ۔20سیریز کے فائنل میچ میں لیسٹر شائر کی جانب سے کھیلتے ہوئے سپر اوور مرحلے میں لگا تار تین چھکے لگانے کا ریکارڈ قائم کیا۔ 2012ء میں وہ کرکٹ کے تمام فارمیٹس سے ریٹائر ہوگئے۔

جوئیل گارنز
جویئل گارنرر ویسٹ انڈیز کے فاسٹ بالرز تھے، جنہیں ان کی برق رفتار بالنگ کے سبب ’’بگ جوئیل‘‘ یا ’’بگ برڈ‘‘ کا خطاب دیا گیا تھا۔6فٹ8 انچ قد کی وجہ سے ان کا شمار دنیا کے درازقامت کھلاڑیوں میں کیا جاتا ہے۔ جوئیل نے کھیل میں اپنے قد سے مکمل فائدہ اٹھایا اور ایک عشرے تک بلے بازوں کو اپنی تیز رفتار گیندوں اور سر کا نشانہ لے کر پھینکے جانے والے باؤنسرز سے پریشان کیے رکھا۔1979ء کے عالمی کپ کے فائنل میں انہوں نے پانچ انگلش بلے بازوں کو آؤٹ کرنے کا کارنامہ انجام دیا۔ان کا ٹیسٹ اور ایک روزہ کیریئر 1977سے 1987ء تک، ایک عشرے پر محیط رہا، جس کے دوران انہوں نے سات مرتبہ 5 سے زائد وکٹیں لیں۔ 1987ء میں وہ کھیل سے ریٹائر ہوگئے جس کے بعد انہیں سلیکٹر، کوچ سمیت دیگر ذمہ داریاں سونپی گئیں۔ 2010ء میں جوئیل کو سری لنکا کا د ورہ کرنے والی کیریبین ٹیم کا منیجر بنایا گیا۔ 2013ء میں انہوں نے بارباڈوس کرکٹ ایسوسی ایشن کے امیدوار کے طور پر ویسٹ انڈین کرکٹ بورڈ کے صدارتی انتخاب میں حصہ لیا لیکن وہ ڈیو کیمرون کے مقابلے میں ہار گئے۔ 2016ء سے جوئیل بارباڈوس کرکٹ ایسوسی ایشن کے صدر ہیں۔

پیٹر جارج
پیٹر رابرٹ جارج آسٹریلیا کے ساق ٹیسٹ کرکٹر اور رائٹ آرم میڈیم فاسٹ بالر ہیں۔ 6فٹ 8انچ قد کے ساتھ ، ان کا شمار بھی دراز قامت کرکٹرز میں کیا جاتا ہے۔ جارج پیٹر نے فرسٹ کلاس کرکٹ کا آغاز، ’’کوئنز لینڈبُلز‘‘ کی ٹیم کی جانب سے کھیلتے ہوئے کیا۔2008ء میں بھارت کے خلاف بنگلور ٹیسٹ میں میچ ڈبیو کیا، لیکن وہ ان کا پہلا اور آخری ٹیسٹ میچ ثابت ہوا، اس کے بعد جارج نے کسی بھی ٹیسٹ میچ میں حصہ نہیں لیا، وہ زیادہ تر فرسٹ کلاس میچ کھیلتے رہے۔ 2010ء میں جارج کو ایک زخمی بالر کے متبادل کے طور پر نیوزی لینڈ کے دورے کے دوران ٹیم میں شامل کیا گیا۔ اس کے بعد 2010ء میں پاکستان اور 2011ء میں بھارت کے دورے کے موقع پر ایک روزہ اسکواڈ میں شامل کیا گیا۔ 2011ء میں ’’بیلی رائیو اوول‘‘ میں میچ کے دوران انہوں نے انتہائی معمولی اسکور پر مخالف ٹیم کے آٹھ بلے بازوں کو آؤٹ کر کے ڈومیسٹک کرکٹ کے بہترین بالر کا اعزاز حاصل کیا۔