|
کچھ کردار ہمیشہ زندہ رہتے ہیں ! مسلمان ایک عظیم الشان
تاریخ کی حامل قوم ہیں ,تاریخ کے اوراق پلٹیں تو قدم قدم پہ کوئ پر شکوہ
شخصیت اپنے جلال و جمال کے ساتھ کھڑی نظر آتی ہے -ان عظیم شخصیات نے تاریخ
میں سنہرے ابواب رقم کئے ہیں جو آج بھی مشعل راہ ہیں_سلطان حیدر علی کے
بیٹے سلطان فتح علی ٹیپو کی پیدائش 20 نومبر 1750میں دیوانہالی میں ہوئ _
وہ ایک سچے مسلمان تھے ,وہ بیک وقت کتب بین بھی تھے اور سپہ سالار بھی_قرآن
پاک سے خصوصی شغف تھا اور ہر شاہی فرمان کا آغاز بسم اللہ الرحمان الرحیم
سے کیا کرتے تھے_آپکو تقریبا "سات زبانیں آتی تھیں اور سائنسی علوم میں
مہارت رکھتے تھے ,یہ امر خوشگوار حیرت کا سبب ہے کہ دنیا میں راکٹ سازی اور
میزائل ٹیکنالوجی کا موجد ٹیپو سلطان ہے جس نے 1792 میں اس ٹیکنالوجی کا
استعمال کر کے دشمن کو شکست دی _امریکہ کے خلائ تحقیق کے ادارہ NASA کے
میوزیم میں ٹیپو سلطان کے ایجاد کردہ راکٹوں اور میزائلوں کی تصاویر آج بھی
جگمگا رہی ہیں _اتنا علم حاصل ہونے کے باوجود ظاہری ٹیپ ٹاپ سے دور تھے اور
سادہ زندگی بسر کیا کرتے تھے _بادشاہ ہونے کے باوجود زمین پر کھدر بچھا کے
سو جایا کرتے تھے !
سلطان فتح علی ٹیپو کی سلطنت 80 ہزار مربع میل پر پھیلی ہوئ تھی جبکہ
فوجیوں کی تعداد 88 ہزار افراد تھی _آپکی ایک اور نایاب خوبی یہ تھی کہ
اپنے نام اور ذات کا پرچار کرنے سے گریز کرتے تھے _خود نمائ سے بچنے کے لئے
اپنے نام کا سکہ بھی جاری نہ کروایا _سلطان نے سرنگا پٹم میں ایک یونیورسٹی
"جامع الامور "کے نام سے قائم کی جہاں دینی و جدید علوم سکھاۓ جاتے تھے _ایک
پرنٹنگ پریس بھی لگوایا جہاں سے ایک ہفت روزہ اخبار اردو زبان میں چھاپا
جاتا تھا ,یہ اخبار افواج کو پڑھایا جاتا تھا _ٹیپو سلطان کی لائبریری میں
تقریبا " 45 ہزار کتابیں تھیں ,انکے میر منشی زین العابدین شوستری نے "سلطان
التاریخ "نامی کتاب تصنیف کی تھی جس کا پہلا حصہ "سلطان حیدر علی "اور
دوسرا "ٹیپو سلطان "کے عہد حکمرانی (1789 )کے واقعات پر مشتمل تھا -مصنف
زین العابدین نے یہ تاریخی واقعات ٹیپو سلطان سے سن کے قلمبند کئے تھے _
سلطان بہت سمجھدار اوردور اندیش حکمران تھا,وہ اس حقیقت کو جان چکا تھا کہ
انگریز برصغیر میں صرف تجارت کی غرض سے نہیں آۓ بلکہ وہ یہاں کے سیاہ و
سفید کے مالک بننا چاہتے ہیں ,اس خطرے کو بھانپتے ہوۓ اس نے ہندوستان کی ہر
ریاست کو اتحاد کی دعوت دی لیکن وہ تنگ نظر حاکم اس حکمت عملی کو سمجھنے
میں ناکام رہے اور مشترکہ دشمن کے خلاف متحد نہ ہوسکے _دوسری طرف دشمن جو
بہت عیار اور چوکنا تھا ,اس نے ٹیپو سلطان جیسے سچے اور خداترس انسان کے
خلاف افواہوں کا بازار گرم کردیا ,سنی سنائ باتیں بغیر تحقیق کے آگے بڑھتی
گئیں اور ریاستوں کے حکمران ٹیپو کے خلاف ہوتے گئے -اس طرح راۓ سازی کر کے
سلطان کے ارد گرد نفرت کا جال بن دیا گیا -ایک طرف سلطان کو اس کے ممکنہ
حلیفوں سے دور کردیا گیا اور دوسری جانب سلطان کی صف میں غداروں کو پروان
چڑھایا گیا ,مؤرخین لکھتے ہیں کہ انگریز افواج کی کثرت ,سلطان ٹیپو کے جزبہ
,جرات و شجاعت کے سامنے ٹک نہ سکتی تھی اگر اندرونی غداروں (میر صادق ,معین
الدین ,غلام راجہ خان ,میر قاسم علی ,میر غلام علی, دیوان پورنیا )نے گھر
کی بنیادیں نہ ڈھائ ہوتیں !
ٹیپو سلطان کے الفاظ تاریخ کے سنہرے اوراق میں ہمیشہ محفوظ رہیں گے ,جب 4
مئ 1799 کی نماز فجر کی ادائیگی کے بعد سلطان کے پرائیویٹ سیکریٹری نے
انگریز کے حملے سے بچنے کے لئے دب کے صلح کی تجویز پیش کی تو سلطان ٹیپو نے
جواب دیا
"ہم سالوں سے اس سلطنت _خداداد کو جو ہماری رعایا با لخصوص مسلمانوں کی
ملکیت ہے ,بچانے کی فکر کر رہے ہیں لیکن وزرا و افسران سلطنت ہی درپردہ
اسکی تباہی کے درپے ہیں ,انسان کو صرف ایک دفعہ موت آتی ہے ,اس سے ڈرنا لا
حاصل ہے ,اسکی کوئ اہمیت نہیں کہ وہ کب آۓ اور کہاں آۓ ,میں اپنی ذات کو مع
اپنی اولاد کے ,دین _محمدی ,علی ' صاحبھا الصلو'ہ والسلام پر نثار کرنے کا
فیصلہ کر چکا ہوں _"زندگی کے ان کٹھن حالات میں چند ہندو نجومیوں نے کچھ
پیشگوئیاں کرکے سلطان کی ہمت کمزور کرنے کی کوشش کی مگر سلطان نے ان
پیشگوئیوں کو چنداں اہمیت نہ دی البتہ فقرا و مساکین میں خیرات و صدقات
بانٹ کے رب کو راضی کرنے میں لگ گیا -انگریزوں نے جنرل بیرڈ کی قیادت میں
سرنگا پٹم کے قلعہ پر کئ اطراف سے دھاوا بول دیا _ٹیپو سلطان کے متعین کردہ
حفاظتی دستے (سیکیورٹی )کو ایک سازش کے تحت پہلے ہی ہٹادیا گیا تھا ,چنانچہ
دشمن کو اندر داخل ہونے میں کوئ چیز مانع نہ ہوسکی _ٹیپو سلطان نے اپنے
وفاداروں کے ساتھ مردانہ وار مقابلہ کیا ,جن میں مردو خواتین سب شامل تھے
_عین گھمسان کی جنگ میں جب ایک خادم نے آپ کو دشمن سے صلح کی ترغیب دینا
چاہی تو سلطان نے اس نازک موقع پر یو ٹرن لینے سے انکار کردیا ,آپ جلال میں
آگئے اور اپنا تاریخی جملہ کہا : "شیر کی ایک دن کی زندگی گیدڑ کی سو سالہ
زندگی سے بہتر ہے !" اور چومکھی لڑائ لڑتے ہوۓ جام شہادت نوش فرمایا -جنرل
ہیرس نے ٹیپو سلطان کے شہید جسم کو دیکھا تو بے اختیار نعرہ لگایا :
"آج سے ہندوستان ہمارا ہے !"
اس معرکہ شہادت میں سلطان فتح علی ٹیپو کے کم و بیش بارہ ہزار مردو خواتین
نے اپنے سلطان کے وقار اور دھرتی کے ناموس کی خاطر اپنی جانوں کا نذرانہ
پیش کیا _ملت اسلامیہ کا یہ بطل _جلیل سرنگا پٹم کے لال باغ میں آرام فرما
ہے ,اور ہر سچے و نڈر انسان کے دل میں زندہ ہے !!
~ جس دھج سے کوئ مقتل میں گیا وہ شان سلامت رہتی ہے
یہ جان تو آنی جانی ہے ,اس جان کی تو کوئ بات نہیں !
#ٹیپو_سلطان_شہید
#History
#TipuSultan
#TheLionOfMaisoor
#اور_تلوار_ٹوٹ_گئ
#فکرونظر |