عمر چھپانا اب ناممکن! فون لاک سب سچ بتائے گا

کیا آپ جانتے ہیں کہ آپ کا اپنے اسمارٹ فون کو لاک کرنے کا طریقہ آپ کی عمر کے بارے میں خبر دیتا ہے؟
 

جی ہاں کینیڈا کی یورنیورسٹی آف برٹش کولمبیا کے محققین کی جانب سے کی جانے والی ایک نئی تحقیق میں یہ بات سامنے آئی ہے کہ بڑی عمر کے صارفین اسمارٹ فون کے آٹو لاک فیچر کو زیادہ استعمال کرتے ہیں جبکہ نوجوانوں میں اس فیچر کے استعمال کا رجحان کم پایا جاتا ہے-

اس کے علاوہ بڑی عمر کے صارفین اسمارٹ فون کو لاک کرنے کے لیے فنگر پرنٹ کے بجائے پن کوڈ لگانے کو بھی ترجیح دیتے ہیں جبکہ عموماً درمیانی یا بڑی عمر کے صارف اپنا فون اس وقت لاک ہی نہیں رکھتے جب وہ کہیں آرام سے بیٹھے ہوں جیسے کہ گھر پر یا پھر آفس ڈیسک پر کام کرتے ہوئے-

پروفیسر Konstantin Beznosov کا کہنا تھا کہ “ تحقیق میں پہلے اسمارٹ فون کے استعمال اور اس کے صارف کی عمر کے درمیان تعلق کو جانچا گیا“-

“ بطور محقق ہم اس چیز پر کام کر رہے ہیں کہ کیسے اسمارٹ فون کو اپنا محفوظ بنایا جاسکتا ہے کہ اس تک غیر متعلقہ افراد کی رسائی ممکن نہ ہوسکے- اس کے لیے ہمیں سب سے پہلے یہ جاننا ہوگا کہ صارفین اپنا اسمارٹ فون کیسے استعمال کرتے ہیں؟ “-
 

تحقیق میں یہ بات بھی سامنے آئی ہے کہ بڑی عمر کے صارفین اپنا اسمارٹ فون نوجوانوں کے مقابلے میں کم استعمال کرتے ہیں- ہر 10 سال کی عمر پر فون کے استعمال پر 25 فیصد کی کمی ہوتی ہے-

دوسرے الفاظ میں اس بات کو یوں کہا جاسکتا ہے کہ اگر 25 سال کا نوجوان دن میں 20 دفعہ فون استعمال کرتا ہے تو اس کے مقابلے میں 35 سال کا فرد دن میں صرف 15 دفعہ اسمارٹ فون استعمال کرتا ہے-

اس تحقیق کے لیے 134 رضاکاروں کی خدمات حاصل کی گئیں جن کی عمریں 19 سے 63 سال کے درمیان تھیں- ان افراد کے اسمارٹ فون میں ایک ایپ انسٹال کی گئی جس نے 2 ماہ تک فون لاک ہونے اور اَن لاک ہونے کے مواقع کے علاوہ فون لاک کے انتخاب کے طریقہ کار کا ریکارڈ بھی محفوظ کیا-