پلاسٹک آلودگی سے متعلق چند چونکا دینے والے حقائق

اس سے قبل کہ میں آپ کے پلاسٹک آلودگی سے متعلق کچھ حقائق بتاؤں آپ پہلے چند لمحے اپنے اردگرد کا جائزہ لیں- یقیناً آپ کو اپنے ارگرد زیادہ تر اشیاﺀ پلاسٹک سے تیار کردہ دکھائی دیں گی- یہ سچ ہے کہ ہماری زندگیوں میں پلاسٹک کا استعمال بہت زیادہ ہوگیا ہے اور یہ ایک اہم ضرورت بن چکا ہے- لیکن اسی پلاسٹک نے کئی مسائل کو بھی جنم دیا ہے-

پلاسٹک کی تیزی سے بڑھتی پیداوار
تحقیق کے مطابق پلاسٹک کی پیداوار میں تیزی سے اضافہ ہورہا ہے- 50 کی دہائی میں پلاسٹک کی پیداوار 2 ملین ٹن تھی جو کہ سال 2015 تک 380 ملین ٹن تک جاپہنچی- ایک اندازے کے مطابق سال 2050 تک یہ پیداوار 34 بلین ٹن تک پہنچ سکتی ہے-

کچرے کی ری سائیکلنگ
جرمنی اپنے کچرے کا 56 فیصد حصہ ری سائیکل کر کے دوبارہ قابلِ استعمال بناتا ہے- اس کے بعد 53 فیصد کے ساتھ دوسرا نمبر آسٹریا اور جنوبی افریقہ کا ہے-

پلاسٹک آلودگی کے خلاف جنگ کا آغاز
پلاسٹک آلودگی کے خلاف جنگ کا آغاز امریکہ میں 1988 میں ہوا- اس وقت ایک بین الاقوامی معاہدے کے تحت پلاسٹک کے کچرے کو سمندر میں پھینکنے پر پابندی عائد کی گئی-

کتنا پلاسٹک سمندروں میں
ہمارے سمندروں کے آدھے حصے کی سطح پر پلاسٹک کا کچرا بہتا ہے- لیکن اس کی خبر نہیں کہ کتنا کچرا سمندروں کے اندر ڈوب چکا ہے-

پلاسٹک کپ
پلاسٹک کپ ایسا میٹریل ہے جسے دوبارہ قابلِ استعمال نہیں بنایا جاسکتا- ان کپوں کو قدرتی طور پر ختم ہونے میں بھی ایک طویل عرصہ یعنی 50 سے 80 سال تک لگتے ہیں-

سمندری ممالیہ جانوروں کی ہلاکتیں
ہر سال ہزاروں جانوروں کی ہلاکتیں پلاسٹک آلودگی کے باعث ہوتی ہیں- یہ جانور پلاسٹک کو غذا سمجھ کر کھا لیتے ہیں جو کہ بعد میں ان کی موت کا سبب بن جاتا ہے-

جان چھڑانے کے 4 طریقے
پلاسٹک کو ری سائیکل کیا جاسکتا ہے٬ اس سے فیول یا توانائی تخلیق کی جاسکتی ہے٬ تباہ کیا جاسکتا ہے یا پھر اسے قدرتی ماحول میں پھینکا جاسکتا ہے- بے شک سب سے بہترین طریقہ اسے ری سائیکل کرنا یا پھر اسے توانائی میں تبدیل کرنا ہے-

دنیا کا نصف پلاسٹک ایشیا میں
ایشیائی ممالک جیسے کہ چین٬ انڈونیشیا٬ تھائی لینڈ اور فلپائن میں سب سے زیادہ کچرا سمندروں میں پھینکا جاتا ہے- چین٬ انڈونیشیا اور ویتنام سب سے زیادہ پلاسٹک کی پیداوار والے ممالک ہیں-

پلاسٹک کا استعمال
پلاسٹک کا سب سے زیادہ استعمال پیکجنگ کے لیے کیا جاتا ہے- دوسرے نے نمبر پر اس کی پیداوار عمارتوں اور تعمیراتی سرگرمیوں کے لیے ہوتی ہے اور تیسرا نمبر ٹیکسٹائل کا ہے-