بلوچستان میں آبشاروں کی وادی چارو ماچھی

چارو ماچھی صوبہ بلوچستان کے ضلع خضدار میں واقع آبشاروں کی وادی ہے۔ یہ خضدار سے شہداد کوٹ کی جانب جانے والی قومی شاہ راہ سے 80 کلو میٹر دور ہے۔

اس وادی کا پہاڑی سلسلہ اور خوبصورت آبشار سیاحت کے لیے بہترین مقام قرار دیا جاتا ہے لیکن ان آبشاروں تک پہنچنے کے لیے کوئی سہولت موجود نہیں ہے ۔

آبشاروں سے بہہ کر پہاڑیوں کی آغوش میں پہنچنے والا پانی ٹھنڈا ہونے کے سبب پکنک پر آنے والے افراد کے لیے دلچسپی سے خالی نہیں ہے۔ بیشتر افراد اس پانی میں تیرنے کو ترجیح دیتے ہیں۔

یہاں کھجور و دیگر اقسام کے درخت بڑی تعداد میں موجود ہیں جب کہ یہاں اگنے والا سبزہ بھی ماحول کو دلکش بنائے ہوئے ہے۔ پانی، درخت اور سبزے نے اس مقام کو مزید خوبصورت بنا دیا ہے۔

سنگلاخ درختوں کی کوکھ سے پھوٹتا پانی اسے سیاحتی مرکز کا درج دیتا ہے۔

آبشار میں جھلملاتے پانی کا منظر دیکھنے والی آنکھوں کے لیے دلکشی کا سبب ہے۔ کہا جاتا ہے کہ بلوچستان آنے والے سیاحوں نے اگر چارو ماچھی نہیں دیکھا تو کچھ بھی نہیں دیکھا۔

جو لوگ آبشار کے بہتے پانی میں کسی سبب نہا نہیں سکتے وہ بھی کم از کم اس کے ٹھنڈے پانی سے منہ ہاتھ اور پیر ضرور دھوتے ہیں۔ تازگی کے لیے یہاں کا ٹھنڈا پانی اور پرسکون ماحول قدرت کا عطیہ ہے۔