بلند و بالا آسمان سے دبئی کیسا نظر آتا ہے؟ حیرت انگیز تصاویر

کبھی کبھی کیمرے کی آنکھ وہ مناظر بھی دکھا دیتی ہے جو انسانی آنکھ سے دیکھنا ناممکن ہوتے ہیں- ہم بات کر رہے ہیں فضا سے لی جانے والی دبئی کی چند ایسی حیرت انگیز تصاویر کی جو دنیا کے مقبول ترین سیاحتی مقامات میں سے ایک ہے- یہ شاندار تصاویر فوٹو گرافر جمانا جولی کا کمال ہیں-

فوٹو گرافر جمانا جولی فضاﺀ سے شہروں کی تصاویر کھینچنے میں مہارت رکھتی ہیں ، جیسے دبئی کا یہ بادلوں میں سے لیے گیا منظر جسے کسی ہیلی کاپٹر کی مدد سے کیمرے میں قید گیا ہے۔

یہ تصویر دبئی کے برج خلیفہ کے آبزرویشن ڈیک سے کھینچی گئی ہے- برج خلیفہ کی اونچائی 828 میٹر سے زائد ہے اور اسے دنیا کی بلند ترین عمارت ہونے کا اعزاز حاصل ہے-

اس تصویر میں دبئی کے ساحل سے چار کلومیٹر دور مصنوعی جزیروں کے ایک گروپ جسے ورلڈ آئلینڈز کہا جاتا ہے کا ایک حصہ دکھایا گیا ہے ، جو دنیا کے نقشے کی شکل میں تعمیر کیا گیا ہے۔

دبئی میں ہی پیدا ہونے والی فوٹو گرافر جولی کا ماننا ہے کہ زمین سے دور فضا سے تصاویر کھینچنے سے ہم شہروں کے انفراسٹرکچر اور ان کی خوبصورتی کو باآسانی سمجھ سکتے ہیں-

جولی نے یہ منفرد انداز ایک نیوز ایجنسی کے لیے کام کرتے ہوئے اس وقت اپنایا جب ایجنسی کی جانب سے انہیں 2007 میں برج خلیفہ کی تعمیر کے دوران اس کی تصاویر کھینچنے کا کام سونپا گیا- انہوں نے یہ تصویر قریبی ہوٹل کی چھت سے لی۔