کاروبار بچانے کے لیے واٹس ایپ کی سر توڑ کوششیں

(Saleem Ullah Shaikh, Karachi)

گزشتہ برس موبائل فون کی معروف ایپلی کیشن واٹس ایپ نے پرائیویسی کے حوالے سے جو پالیس اپنائی اس پر صارفین نے شدید تحفظات کا اظہار کرتے ہوئے واٹس ایپ اکاؤنٹس ختم کرنا شروع کیے ۔ ابتدا میں تو واٹس ایپ نے اس کو قابل توجہ نہ سمجھا اور اپنی بات کو دہرایا کہ جو لوگ پالیسی سے اختلاف رکھتے ہیں ان کے اکاؤنٹس 10 فروری کے بعد بند کردئیے جائیں گے۔ لیکن جب چند ہی دنوں میں لاکھوں صارفین نے واٹس ایپ اکاؤنٹ ختم کرکے متبادل ایپلیکشنز پر رابطہ کرلیا تو واٹس ایپ نے اس پالیسی کو مؤخر کرنے کا اعلان کردیا۔

اسی پر بس نہیں بلکہ صارفین کو اپنی جانب راغب کرنے کے لیے واٹس ایپ نے ڈیسک ٹاپ ورژن میں کال کرنے کا فیچر بھی متعارف کرا دیا۔ واضح رہے کہ پہلے ڈیسک ٹاپ ورژن پر آپ میسج کرسکتے تھے اور تصاویر و دستاویز کو بھیج سکتے تھے لیکن کال نہیں کرسکتے تھے۔ رواں ہفتے واٹس نے اس فیچر کے اضافے کا اعلان کردیا ۔اب واٹس ایپ نے پہلی بار صارفین سے واٹس ایپ اسٹیٹس کے ذریعے براہ راست رابطہ کیا ہے اور اسٹیٹس پر اپنی پالیسی واضح کی ہے۔

پہلے اسٹیٹس میں صارفین خوش خبری دی گئی ہے کہ واٹس ایپ اب سٹیٹس سیکشن کے ذریعے صارفین کو مزید فیچر اور اپ ڈیٹس سے آگاہ کرتا رہے گا۔ اگلے پیغام میں یہ بات دہرائی گئی ہے کہ صارفین کی رازداری واٹس ایپ کا عزم ہے۔تیسرے پیغام میں صارفین سےکہا گیا ہے کہ وہ مزید اپ ڈیٹ دیکھتے رہیں جب کہ چوتھے اور آخری سٹیٹس میں واٹس ایپ نے صارفین کے اعتماد کو بحال کرنے اور واٹس ایپ سے جڑے رہنے کے لیے واضح کیا ہے کہ صارفین کے پیغامات اور کالز واٹس ایپ سمیت کوئی تیسرا فرد یا ادارہ دیکھ یا سن نہیں سکتا۔

واٹس ایپ کی ساری بھاگ دوڑ اور پھرتیاں یہ ظاہر کررہی ہیں کہ واٹس ایپ کو اپنی احمقانہ پالیسی کی وجہ سے شدید نقصان پہنچا ہے اور اب وہ اس نقصان کا ازالہ کرنا چاہتا ہے۔ اب یہ صارفین کے اوپر ہے کہ وہ تین ماہ بعد بھی اس پالیس کو لاگو نہ ہونے دیں بلکہ اس پالیسی کو مکمل طور پر ختم کرائیں۔

< Previous یہ ہزاروں میل دور آیا کیسے؟ وہ 5 چیزیں جو سائنسدانوں کے لئے بھی پراسرار ہیں NEXT > پہلے شخص کو کورونا ویکسین لگا دی گئی٬ ویڈیو دیکھیں