’عملے نے اپنے ہیٹس پہن رکھے تھے اور وہ اپنے
کیبن کا سامان جمع کر چکے تھے۔ جب طیارہ رن وے 34 کی جانب لینڈنگ کے لیے
اتر رہا تھا وہ قاہرہ ایئرپورٹ کے آس پاس ایک دائرے میں چکر لگا رہا تھا
اور اس وقت وہ گر کر تباہ ہوا۔‘ |
|
’بس اُسی لمحے میری آنکھوں کے سامنے اندھیرا
چھا گیا۔ جب میں نے دوبارہ آنکھیں کھولیں تو مجھے یہ احساس ہی نہیں ہوا کہ
بجائے اس کے کہ مدد کے لیے پکاروں، میں چیختے ہوئے اپنا نام لے کر شوکت!
شوکت! پکار رہا تھا۔ ایک اور مسافر، ایک نوجوان جس کے سر سے خون بہہ رہا
تھا، وہ میری جان بچانے کے لیے پہنچا۔‘ |
|
’وہ بری طرح زخمی تھا لیکن اس نے مجھے ملبے سے
نکال لیا۔ ہمارے چاروں طرف لاشیں اور سامان پڑا تھا۔ میں نے ان میں اپنی
بیوی کی بے جان لاش دیکھی۔‘ |
|
’میری آنکھوں نے یہ منظر دیکھا لیکن میں ساکت
رہا۔ ابھی بھی صدمے کی حالت میں، میری زندگی کی ایک فلم میرے ذہن میں گزری۔
میرے بچپن سے اب تک کی زندگی، میں نے جو کچھ دیکھا تھا اور کیا تھا اور وہ
چیزیں، جو میں نے بعد میں کرنا تھیں، وہ سب ذہن میں ایک لمحے کے لیے آئیں۔‘ |
|
’یہ سوچ کر کہ میری زندگی جلد ہی ختم ہو جائے
گی میں نے خدا کے بارے میں سوچا اور کہا کہ اگر اس نے مجھے زندگی گزارنے کا
ایک اور موقع فراہم کیا تو میں آنے والے دن کا انتظار کیے بغیر ہر کام اسی
وقت کروں گا اور یہ کہ میں اپنے آپ کو کم خوش قسمت لوگوں کی خدمت کے لیے
وقف کروں گا۔‘ |
|
ایئر ہوسٹس مومی گل درانی |
|
|
|
ہلاک ہونے والوں میں چار ایئر ہوسٹس (فضائی
میزبان) بھی شامل تھیں جنھیں اس پرواز کی اہمیت کے لحاظ سے خاص طور پر
مہمانوں کی خدمت کے لیے پی آئی اے انتطامیہ نے منتخب کیا تھا۔ ان میں ایک
ایئر ہوسٹس مومی گل درانی تھیں جو گذشتہ دہائی سے اپنی پُرکشش شخصیت اور
حُسن کی وجہ سے پی آئی اے کی شناخت بن گئی تھیں۔ |
|
مومی گل درانی نہ صرف پاکستان کی قومی ایئرلائن
کی ایک شناخت تھیں بلکہ ’ایوی ایشن وائس‘ کی ویب سائٹ کے مطابق وہ پیشہ
ورانہ خدمات کی وجہ سے دنیا کی دس بہترین ایئر ہوسٹیسز میں بھی شمار ہوتی
ہیں۔ |
|
مومنہ گل درانی جنھیں ان کے دوست پیار سے مومی
گل بھی کہتے تھے، پاکستان کے معروف موسیقار، سہیل رانا کی بیگم قندیل گل کی
بہن تھیں۔ قندیل اور سہیل رانا آج کل کینیڈا میں مقیم ہیں۔ سہیل رانا کہتے
ہیں کہ مومی گل ’ایک خوش مزاج، خوش مذاق، خوش روح مشرقی خاتون تھیں۔‘ |
|
’وہ پی آئی اے کا فخر تھیں اسی وجہ سے ایئر
مارشل نور خان ہمیشہ ان کا خیال رکھتے تھے۔ اس پرواز کے عملے میں وہ شامل
نہیں تھیں۔ انھیں عموماً خاص خاص پروازوں میں شامل کیا جاتا تھا۔ لیکن
طیارے کے عملے کی ایک ایئر ہوسٹس کی طبیعت خراب ہو گئی تھی اور ان کی جگہ
مومنہ کو جانا پڑا۔‘ |
|
سہیل رانا بتاتے ہیں کہ مومنہ درانی کا تعلق
افغانستان کے شاہی خاندان سے تھا جن کی نسل ہندوستان میں سہارنپور اور
امرتسر میں آکر آباد ہو گئی تھی۔ ’جب مومی بیس اکیس برس کی عمر میں پی آئی
اے میں شامل ہوئیں تو وہ جب کسی محفل میں آتیں تو لوگ ان کے لیے احتراماً
ایسے کھڑے ہوجاتے جیسے وہ ایک شہزادی ہوں۔‘ |
|
اس طیارے کے زندہ بچ جانے والے ایک مسافر شوکت
میکلائی نے 26 نومبر 2011 کو روزنامہ ڈان میں شائع ہونے والے انٹرویو میں
بتایا تھا کہ وہ دورانِ پرواز اپنی نشست پر ’قبضہ‘ ہو جانے کی وجہ سے طیارے
میں سٹاف سے باتیں کرنے لگ گئے تو وہاں ان کی مومی گل سے پہلی مرتبہ ملاقات
ہوئی۔ |
|
’مومی گُل اُس وقت بہت زیادہ خوش مزاج نظر نہیں
آئیں۔ تو میں نے اُن سے کہا کہ مجھے کمپلینٹ کارڈ دیں۔ انھوں نے پوچھا کہ
کیا آپ شکایت کرنا چاہتے ہیں؟ تو میں نے کہا بالکل، یہ پی آئی اے کی اہم
پرواز ہے اور آپ کا رویہ بہت اچھا نہیں ہے۔‘ |
|
اس پر مومنہ گل نے کہا کہ ’رولز کے مطابق انھیں
اس پرواز پر ہونا ہی نہیں چاہیے تھا کیونکہ وہ مسلسل دوسری پرواز پر بھیج
دی گئی تھیں۔ شاید اس لیے ان کا مزاج اتنا اچھا نہیں تھا جتنا ہونا چاہیے
تھا۔‘ |
|
تھوڑی دیر بعد طیارے کے عملے نے مداخلت کرکے
شوکت میکلائی کی نشست خالی کرا دی اور وہ وہاں بیٹھ گئے۔ |
|
|
|
شوہر بچ گئے، اہلیہ ہلاک ہو گئیں |
شوکت میکلائی جن کا اوپر ذکر آیا ہے، لکھتے ہیں
کہ جب اس افتتاحی پرواز کا اعلان ہوا تھا تو ان کا نام مسافروں کی فہرست
میں نہیں تھا لیکن انھوں نے پی آئی اے کے حکام سے رابطہ کیا اور بتایا کہ
وہ ان کی زیادہ ٹکٹیں فروخت کرتے ہیں اس لیے انھیں اس پرواز میں شامل کیا
جائے۔ |
|
میکلائی کی کوشش کے بعد پرواز سے چند گھنٹے
پہلے ان کا نام شامل کیا گیا۔ انھوں نے اپنی اہلیہ بانو میکلائی کا نام بھی
شامل کروایا۔ یہ دونوں جب طیارے میں سوار ہوئے تو دیر سے فہرست میں شامل
ہونے کی وجہ سے دونوں کو ساتھ ساتھ نشستیں نہ مل سکیں۔ |
|
شوکت میکلائی کو طیارے میں سب سے آخری قطار میں
ایک نشست ملی تھی جبکہ ان کی اہلیہ اگلی قطار کی نشست پر دوسرے دوستوں کے
ساتھ بیٹھیں تاہم بقول ان کے دورانِ پرواز وہ باقی دوستوں کے ساتھ برِج
کھیلنے کے لیے اگلی نشستوں پر چلے گئے تھے۔ |
|
لیکن جب پرواز قاہرہ ایئرپورٹ پر اترنے والی
تھی تو وہ پیچھے اپنی نشست پر بیٹھنے چلے آئے۔ |
|
شوکت میکلائی نے لکھا تھا کہ جب وہ واپس اپنی
نشست پر آئے تو وہاں کوئی اور مسافر بیٹھا ہوا تھا۔ ’میں کہیں اور بیٹھ
سکتا تھا لیکن میں نے اصرار کیا کہ اپنی ہی نشست پر بیٹھوں گا۔ لہٰذا طیارے
کے عملے نے مداخلت کر کے مجھے اُسی نشست پر بٹھا دیا جہاں میں بیٹھا ہوا
تھا۔‘ |
|
ہلاک ہونے والے چند معروف پاکستانی |
|
|
|
پی آئی اے کی لگژری بوئنگ 720 بی پرواز کے
حادثہ میں زندہ بچ جانے والے چھ مسافروں کو مضافاتی شہر ہیلیوپولس کے
ہسپتال میں داخل کرایا گیا تھا جہاں اُن میں سے دو کے آپریشن بھی کیے گئے
تھے۔ |
|
طیارے میں شامل افراد میں پاکستانی صحافی بھی
شامل تھے، جن میں مسٹر اے کے قریشی بھی شامل تھے جو ایسوسی ایٹڈ پریس آف
پاکستان کے ایڈمنسٹریٹر تھے اور نیشنل پریس ٹرسٹ کے چیئرمین میجر جنرل
حیاالدین بھی شامل تھے۔ |
|
میجر جنرل حیا الدین ابتدا ہی سے فوج کے محکمہ
تعلقات عامہ سے وابستہ ہو گئے تھے۔ ان کا تعلق ضلع مردان سے تھا۔ جن چند
صحافیوں سے بات ہوئی انھوں نے انھیں ایک شریف انسان اور پروفیشنل فوجی اور
خوشگورا تعلقات عامہ کا افسر قرار دیا ہے۔ |
|
اس زمانے میں روزنامہ امروز کے چیف نیوز ایڈیٹر
حمید ہاشمی بھی پرواز پی کے 705 میں قاہرہ جانے والے مسافروں میں شامل تھے۔
حمید ہاشمی ایک دائیں بازو کے دانشور اور ایکٹیوسٹ تھے۔ ساری عمر ٹریڈ
یونین کی سرگرمیوں میں فعال رہے۔ امروز میں سب ایڈیٹر کی حیثیت سے شامل
ہوئے تھے۔ سنہ 1952 میں نیوز ایڈیٹر بنے۔ طیارے کے حادثے تک وہ امروز کے
چیف نیوز ایڈیٹر تھے۔ |
|
لاہور سے تعلق رکھنے والے اپنے وقت کے معروف
پرنٹر اور پریس کے ملک مجید المکی بھی اس جہاز میں سوار تھے۔ ان کے پریس کا
نام الائیڈ پریس تھا جو لاہور ہائی کورٹ کے سامنے ایک عمارت میں تھا۔ ان کی
سندباد ٹریولز بھی تھی۔ اسی لیے مجید المکی بھی پی کے 705 پرواز میں دعوت
دی گئی تھی۔ |
|
مجید المکی کے دو بیٹے اب لاہور میں اپنے والد
کا کاروبار چلا رہے ہیں۔ ان کے سب سے بڑے بیٹے سجاد المکی کا کافی عرصہ
پہلے انتقال ہوگیا تھا۔ المکی کے سب سے چھوٹے بیٹے جواد المکی نے بتایا کہ
اُن کے والد کو پی آئی اے کی جانب سے دو ٹکٹوں کی پیشکش ہوئی تھی۔ لیکن
انھوں نے صرف ایک ٹکٹ ہی قبول کی تھی۔ |
|
جواد بتاتے ہیں کہ اُن کے والد کو شاید احساس
ہو گیا تھا کہ یہ اُن کا آخری سفر تھا۔ ’لاہور سے جب وہ کراچی پہنچے تو
انھیں ہوٹل میں ٹھہرایا گیا تھا جہاں انھوں نے بوئنگ میں سوار ہونے سے پہلے
اپنے تینوں بچوں، بیوی، اپنے مینیجر اور ہمارے سکول کے پرنسپل کو اس طرح کے
خط لکھے کہ جیسے وہ وصیت لکھ رہے ہوں۔‘ |
|
’قاہرہ میں حادثے میں ہلاکت کے بعد ہم لوگ
پریشان ہوئے۔ ظاہر ہے خاندان کے بڑے کی موت ہم سب کے لیے ایک بڑا صدمہ تھا۔
لیکن ان کی موت کے دو تین بعد میرے بڑے بھائی اور ہمیں اُن کے خطوط ملے جن
میں انھوں نے مفصل ہدایات دی ہوئی تھیں۔ لگتا ہے کہ انھیں احساس ہو گیا تھا
کہ وہ آخری سفر پر جا رہے تھے۔‘ |
|
|
|
خبر رساں ادارہ اے پی اور چینی تعلق |
پاکستان کی تاریخ میں طیارے کے حادثے کا یہ
پہلا واقعہ نہیں تھا لیکن یہ سب سے زیادہ المناک تھا۔ اُس زمانے کی ایسوسی
ایٹ پریس (اے پی) کی ایک ویڈیو رپورٹ کے مطابق یہ پہلی افتتاحی پرواز تھی
جس کے ذریعے چین کو مشرقِ وُسطیٰ سے ملایا جا رہا تھا۔ طیارے میں کئی چینی
مسافر بھی سوار تھے۔ |
|
تاہم اُس زمانے کے پی آئی اے کے پبلک ریلیشننگ
افسر صدیقی کہتے ہیں کہ پی آئی اے کی اس افتتاحی پرواز کا چین کو مشرق
وُسطیٰ سے ملانے کی پالیسی یا ایسے کسی اعلان کے بارے میں پی آئی اے کے
حکام کو کوئی علم نہیں تھا۔ |
|
چینی فوج کا انجینیئر |
ہلاک ہونے والے مسافروں میں مغربی اور مشرقی
پاکستان کے 22 صحافی، ٹریول ایجنٹس، اور معتبر کاروباری شخصیات اور چند ایک
سرکاری افسران بھی شامل تھے۔ اس کے علاوہ برطانوی، لبنانی جرمن اور چینی
شہری بھی سفر کر رہے تھے۔ |
|
ان میں سب سے اہم چینی مسافر پیپلز لبریشن آرمی
(پی ایل اے) کے لڑاکا طیارے کی چیف ڈیزائنر بھی شامل تھے۔ |
|
51 برس کے ہوانگ کانگ (ژقیان) پیپلز لبریشن
آرمی کے جنرل پولیٹیکل ڈیپارٹمنٹ کے افسر تھے۔ ایک چینی بلاگر ووتو لکھتے
ہیں کہ ہوانگ ساری زندگی ہوا بازی سے پیار کرتے رہے جیسے کہ وہ صرف ہوا
بازی کے لیے ہی پیدا ہوئے تھے۔ |
|
ان کی بے وقت موت کی وجہ سے چین کے لڑاکا طیارے
J-8 کی بروقت تکمیل نہ ہو سکی۔ یہ طیارہ پھر سنہ 1979 میں مکمل ہوا۔ انھوں
نے چین کے سوشلسٹ انقلاب سے پہلے امریکہ کی یونیورسٹی آف مشی گن سے ایوی
ایشن انجینیئرنگ کی تعلیم حاصل کی تھی۔ انقلاب کے بعد وہ پی ایل اے میں
شامل ہو گئے تھے۔ |
|
سنہ 1965 کا یہ وہ زمانہ تھا جب صرف ایک برس
پہلے خلیجِ ٹونکین میں امریکہ اور شمالی ویتنامی مسلح کشتیوں کے درمیان
جھڑپ ہوئی تھی، اور امریکہ نے جنوبی ویت نام میں اپنے اڈے مضبوط کر کے
شمالی ویتنام میں قائم سوشلسٹ حکومت پر حملوں میں تیزی کر دی تھی۔ |
|
خاص طور پر اس وقت امریکہ کے رہنماؤں کو چین سے
خوف تھا کیونکہ وہ ابھی ایک برس پہلے ہی جوہری طاقت بنا تھا اور وہ طویل
عرصے سے امریکی مخالفت میں بیان بازی میں مصروف تھا۔ |
|
اس دوران چین اپنی فوجی طاقت بھی بڑھا رہا تھا
جس کے لیے چینی انجینیئرز کے کردار کو کسی بھی طرح کم نہیں سمجھا جاسکتا
تھا۔ ایک حقیقت ہے کہ طیارے پر سوار چینی ڈیزائنر کی موت سے چین کے J-8
لڑاکا طیارہ کے بنانے میں بہت تاخیر ہوئی۔ یہ لڑاکا طیارہ اپنی صلاحیت کے
لحاظ سے امریکہ کے U-2 اور B-52 بمبار کو انٹرسیپٹ کر سکتا تھا۔ |
|
تخریب کاری کا کوئی ذکر نہیں ملا |
تاہم پی آئی اے کی پرواز پی کے 705 کے بارے میں
تخریب کاری کی بات کا کہیں ذکر نہیں ملتا۔ البتہ ایوی ایشن سیفٹی نیٹ ورک
کی ویب سائٹ بیان کرتی ہے کہ بوئنگ کے غیر معمولی حد تک نیچے آنے کی وجہ
معلوم نہیں ہو سکی۔ |
|
کوشش کے باوجود اس بارے میں نہ بوئنگ کمپنی سے
اور نہ ہی پی آئی اے سے کچھ مزید معلوم ہوسکا۔ ایک نظریہ یہ بھی ہے کہ شاید
بوئنگ طیارہ ریت کے طوفان کی وجہ سے نیجے پرواز کرتے ہوئے زمین سے ٹکرا گیا
ہو تاہم قاہرہ ایئرپورٹ سے پائلٹوں کا رابطہ تھا اور وہاں سے ریت کے طوفان
کی وارننگ کی کوئی شہادت نہیں ملتی ہے۔ |
|
کیا کوئی فنی نقص پیدا ہوا تھا؟ |
|
|
|
رات کا وقت تھا اس لیے شاید اکثر مسافر سو رہے
ہوں گے۔ طیارہ جب قاہرہ ایئر پورٹ کے قریب پہنچا تو نیچے اترنا شروع ہو گیا
تھا۔ ایوی ایشن سیفٹی نیٹ ورک کی سائٹ کے مطابق کیپٹن نے طیارے کے پروں میں
موجود فلیپس میں خرابی کی شکایت کی تھی۔ |
|
طیارے کے فلائیٹ کمانڈر کیپٹن علی اختر خان کو
ایئرپورٹ کے کنٹرول ٹاور نے رن وے 34 پر اترنے کی ہدایت کی اور انھوں نے
طیارے کا اس جانب رخ کر کے نیچے اتارنا شروع کر دیا تھا۔ تب ایک عینی شاہد
نے اطلاع دی کہ طیارہ زمین پر گرتے ہی صحرا میں ’آگ کی گیند‘ کی مانند نظر
آ رہا تھا۔ |
|
’یہ شعلوں میں گر کر تباہ ہوا اور سینکڑوں
ٹکڑوں میں صحرا میں بکھر گیا۔‘ |
|
یوی ایشن سیفٹی نیٹ ورک کے مطابق اس حادثے کی
ممکنہ وجہ یہ تھی کہ ’طیارے نے سرکٹ کے لیے مناسب اونچائی کو برقرار نہیں
رکھا اور جب تک یہ زمین سے ٹکرا نہیں گیا یہ تسلسل سے اترتا رہا (تاہم) اس
غیر معمولی انداز سے تسلسل کے ساتھ اترنے کی وجہ معلوم نہیں ہے۔‘ |
|
حادثے کے بعد قاہرہ ائیرپورٹ کے چیف کنٹرولر نے
بین الاقوامی انکوائری کمیشن کو بتایا تھا کہ ’بوئنگ‘ کے پائلٹ نے کنٹرول
ٹاور کو آگاہ نہیں کیا تھا کہ حادثے سے قبل ان کے ایک انجن میں آگ لگی ہوئی
تھی۔ اس نے واقعتاً ایسا کوئی واقعہ رپورٹ نہیں کیا تھا۔ اس کا مطلب ہے کہ
فلیپس میں خرابی کی بھی شاید کوئی بات نہ ہوئی ہو۔ |
|
بوئنگ 720 کو پرواز کرتے ہوئے ابھی تین برس بھی
پورے نہیں ہوئے تھے اس لحاظ اسے ایک نیا طیارہ کہا جا سکتا تھا۔ قاہرہ
ائیرپورٹ پر طوفان کی بھی تصدیق نہیں ملتی ہے، اسی لیے ماہرین کی نظر میں
اس حادثے کے دو امکانات زیادہ واضح نظر آتے ہیں: |
|
اول یہ کہ قاہرہ ائیرپورٹ پر فنی نقائص تھے جس
کی وجہ سے شاید پائلٹ کو ایئر پورٹ نظر نہیں آیا اور اُس نے ضرورت سے زیادہ
خود اعتمادی کا مظاہرہ کرتے ہوئے طیارے کو ایئرپورٹ پہنچنے سے پہلے نیچے
کرنا شروع کر دیا۔ |
|
دوسرا امکان یہ ہے کہ کہیں بھی کوئی نقص نہ ہو،
پائلٹ نے غلط اندازہ لگایا ہو اور اندھیرے کی وجہ سے طیارے کو اتار دیا ہو۔
بہرحال تحقیقات میں کوئی حتمی بات طے نہیں کی گئی۔ |
|
ائیر وائس مارشل نور خان کی بریفنگ |
پی آئی اے کے بوئنگ 720 کے حادثے کی تحقیقات کے
لیے مصری حکومت نے ایک اعلیٰ اختیارتی کمیٹی مقرر کی تھی۔ اس کی ابتدائی
رپورٹ کے مطابق اس پرواز کا فلائیٹ ریکارڈر محفوظ حالت میں مل گیا تھا۔ بعد
میں پی آئی اے کے مینیجنگ ڈائریکٹر ائر وائس مارشل نور خان نے اس بارے
پاکستانی صحافیوں کو آگاہ کیا تھا۔ |
|
ان ابتدائی تحقیقی معلومات کو پاکستان کے کئی
اخبارات نے رپورٹ کیا تھا لیکن ہمیں اس کے بارے میں تفصیلات کراچی کے ایک
میگزین ’نگارش‘ میں ملیں جس نے اس حادثے کے بارے میں ایک خصوصی نمبر شائع
کیا تھا۔ نگارش کی ایک کاپی کراچی کے محقق ایس ایم شاہد کے پاس اب بھی
محفوظ ہے۔ |
|
اس نگارش میگیزین کے مطابق ’ائیر وائس مارشل
نور خان نے کہا ہے کہ طیارہ کے ڈھانچہ میں سے ملنے والے فلائیٹ ریکارڈر
بالکل کار آمد ہے اور اس کے نتائج کی انھوں نے ماہرین کے ساتھ آزمائش کی ہے۔۔۔۔‘
نگارش کی رپورٹ کے مطابق ائیر مارشل نور خان 26 مئی کو ایک آزمائشی پرواز
میں قاہرہ گئے تھے۔ |
|
’جب (اُن کی اس پرواز کے) قاہرہ پر تمام مسافر
اتر گئے تو ایک آزمائشی پرواز کی گئی جس میں طیارے کو اسی طریقے سے اتارا
گیا جس طرح پی آئی اے کا بدقسمت بوئنگ اتارا جانا تھا۔ ائیر وائس مارشل اس
پرواز کے لیے طیارے میں سوار تھے۔‘ تاہم انھوں نے ابتدائی تحقیقی سطح پر
مزید بتانے سے گریز کیا تھا۔ |
|
انھوں نے تاہم یہ کہا کہ ’چونکہ کافی قیاس
آرائی کی جا رہی ہے اس لیے انھوں نے ضروری سمجھا کہ وہ پبلک کو اب تک کی
معلومات فراہم کر دیں۔۔۔‘ |
|
’بہرحال آزمائشی پرواز کے نتیجے میں جو معلومات
حاصل ہوئی ہیں اور فلائیٹ ریکارڈر کی ریڈنگ اور قاہرہ کے کنٹرول ٹاور کے
ٹیپ کو بجا کر، قاہرہ پہنچ کر طیارہ نے جس وقت آمد کی اطلاع دی، پرواز کے
لیے جو راستہ اختیار کیا، آخر وقت جو کچھ ہوا وہ ثابت ہو گیا ہے۔‘ |
|
’طیارے نے قاہرہ میں گرین وچ ٹائم کے مطابق رات
گیارہ بج کر 39 منٹ پر پہنچنے کی اطلاع دی، فضائی کنٹرول ٹاور کی جانب سے
طیارہ سے کہا گیا کہ وہ سٹیشن کی حد میں سطح سمندر سے ساڑھے چھ ہزار فٹ رہ
گیا ہے۔ گیارہ بج کر 43 منٹ پر فضائی کنٹرول ٹاور نے اس بلندی پر آنے اور
رن وے 34 پر اترنے کی اجازت دے دی۔‘ |
|
رپورٹ کے مطابق طیارہ معمول کے طریقے سے درست
انداز میں اتر رہا تھا۔ ’گرین وچ ٹائم کے مطابق رات گیارہ بج کر 48 منٹ پر
کیپٹن نے فضائی کنٹرول ٹاور کو آخری رپورٹ دی کہ اور اس امر کی توثیق کی کہ
وہ آخری مرحلے میں مڑ رہا ہے۔ اس وقت طیارہ پندرہ سو فٹ کی بلندی پر تھا۔
اس کی فضائی رفتار 173 ناٹ میل فی گھنٹہ تھی اور اترنے والے رن وے کے
ابتدائی مقام سے ساڑھے پانچ میل دور تھا۔ اس کا ونگ فلیپ 20 ڈگری پر تھا۔‘ |
|
’اور نچلا حصہ اوپر ہی اٹھا ہوا تھا اور یہ
تمام باتیں بھی اترنے کے عام ضابطوں کے مطابق تھیں۔ فلائیٹ ریکارڈر ظاہر
کرتا ہے کہ اس پوائنٹ سے طیارہ اچانک بلندی سے نیچے آیا اور اس کی رفتار 19
ناٹ کا اضافہ ہوا جو 173 سے بڑھ کر 192 ہو گئی اور تقریباً 15 سیکنڈ میں 15
سو فٹ سے بلندی پر گر گیا جہاں وہ اونچی سطح سے ٹکرا کر تباہ ہو گیا۔‘ |
|
ائیر وائس مارشل نور خان نے اعلان کیا تھا کہ
یہ ابتدائی رپورٹ تھی، اس فلائیٹ ریکارڈر کو واشنگٹن مزید تحقیق کے لیے
بھیجا گیا تھا کیونکہ کچھ معلومات سمجھی نہیں جا سکی تھی۔ یہ کہنے کے بعد
انھوں بتایا کہ ’پائلٹ نے اترنے کے لیے معمول کے طریق کار اختیار کیے رہے
جب طیارہ پندرہ سو فٹ کی بلندی پر تھا اور پھر نہ معلوم کیوں نیچے آیا۔‘ |
|
بوئنگ 720 بی طیارہ |
|
|
|
یہ اس سال کا سب سے بڑی فضائی حادثہ تھا۔ پی
آئی اے کو امریکی ائیر لائن کمپنی پین ایم کی تیکنیکی اور تربیتی مدد سے
سنہ 1955 میں بنایا گیا تھا۔ پی آئی اے کی ٹیکنیکل مینیجمنٹ میں پین ایم
سنہ 1965 تک شامل رہی تھی، پھر یہ مینیجمنٹ مکمل طور پر اسی برس مارچ میں
پاکستان کے حوالے کر دی گئی تھی اور مئی میں یہ حادثہ پیش آیا۔ |
|
طیارہ بوئنگ 720-040B تھا جس کی رجسٹریشن نمبر
اے پی- AMH تھی اور مینوفیکچرنگ سیریل نمبر 18379 تھا۔ اس طیارے نے پہلی
پرواز 19 اکتوبر 1962 کو کی تھی اور سات نومبر 1962 کو ایک ’برانڈ نیو‘
طیارے کے طور پر پی آئی اے میں شامل ہوا تھا۔ حادثے کے وقت تک یہ 8378
گھنٹے کی پرواز مکمل کر چکا تھا۔ |
|
اجتماعی قبر میں تدفین |
روزنامہ ڈان کے 23 مئی کی رپورٹ کے مطابق حادثے
میں ہلاک ہونے والے مسافروں اور طیارے کے عملے کی قاہرہ کے امام شافعی سے
منسوب ایک قبرستان کے قریب اجتماعی تدفین کی گئی۔ ’جب قبرستان میں لاشیں
ایک دوسرے کے ساتھ لٹائی گئی تھیں، اس وقت پھولوں کی دو چادریں پتھر کی
دیوار کے ساتھ رکھی ہوئی تھیں۔‘ |
|
ایک مصری امام نے نماز جنازہ پڑھائی تھی۔ وہاں
مسیحی پادری موجود نہیں تھے۔ پی آئی اے کے ترجمان نے بتایا تھا کہ امکان ہے
کہ پاکستان قبرستان میں ایک یادگار تعمیر کرائے گا۔ (تاہم بعد میں پی آئی
اے نے اس قبرستان میں ہلاک ہونے والے افراد کے نام سفید پتھر پر کندہ کروا
کے لگوا دیے۔) |
|
اجتماعی تدفین کے موقع پر پی آئی اے کے منیجنگ
ڈائریکٹر ائیر وائس مارشل نور خان، (متحدہ عرب جمہوریہ) مصر کے سول ایوی
ایشن کے عہدیدار، گورنر کے نمائندے اور 500 کے قریب سوگوار موجود تھے۔ |
|
لندن ٹائمز کے مطابق اس حادثے میں ہلاک ہونے
والے پاکستانیوں کے لواحقین میں سے ایک نے بتایا کہ تمام ذاتی املاک کو مسخ
شدہ لاشوں سے ہٹا دیا گیا تھا اور شناخت ناممکن تھی۔ شناخت شدہ 19 لاشوں
میں سے چھ پاکستانی، ایک جرمن، دو چیک، ایک لبنانی اور سات چینی شہری شامل
تھے۔ |
|
ان چھ پاکستانیوں میں سے جن کی شناخت ہوئی تھی
ان میں سے چار کی لاشیں کراچی روانہ کر دی گئیں ۔ کراچی کے یونیورسل
ایکسپریس کی دو دیگر پاکستانی مسز بانو میکلائی اور مسٹر لوبو کی لاشوں کو
ان کے اہلخانہ کی درخواست پر قاہرہ ہی میں سپرد خاک کر دیا گیا تھا۔ |
|
پی آئی اے نے غیرملکیوں کی شناخت شدہ لاشوں کو
اُن ممالک میں پہنچانے کے انتظامات کیے تھے۔ اس کا انتظام قاہرہ میں ان
ملکوں کے سفارتخانوں کے ذریعے کیا گیا تھا۔ غیر ملکیوں کی لاشوں کی شناخت
پی آئی اے نے سفارتکاروں کی مدد سے کی تھی۔ |
|
پی ٹی ایس ڈی |
حادثے کے بعد بچ جانے والے چھ مسافروں میں کسی
نے بھی اپنے واقعات پر مبنی کوئی کتاب نہیں لکھی۔ صرف شوکت میکلائی کا ایک
انٹرویو ملتا ہے جو انھوں نے ایک صحافی شازیہ حسن کو دیا تھا جو روزنامہ
ڈان میں شائع ہوا تھا۔ ایک اور بچنے والے مسافر جواد الکریمی اب بھی بات
کرنے سے گریز کرتے ہیں۔ |
|
حادثے میں ہلاک ہونے والے ایک مسافر مجید المکی
کے پوتے علی المکی جو لندن میں ایک بینک میں کام کرتے ہیں، کہتے ہیں کہ
شوکت میکلائی کی بھتیجی سینٹ پیٹرک سکول کراچی میں ان کی ٹیچر تھیں۔ علی
کہتے ہیں کہ ان کی ٹیچر نے بتایا تھا کہ شوکت میکلائی اس موضوع پر بات کرنے
سے گریز کرتے تھے۔ |
|
میں نے صلاح الدین صدیقی سے بھی پوچھا کہ
اُنھوں نے اس واقعے کے متعلق کوئی کتاب کیوں نہیں لکھی، تو ان کا کہنا تھا
کہ جب بھی کوشش کی تو دل بہت رنجیدہ ہو گیا اور پھر ہمت نہیں ہوئی۔ کیا بچ
جانے والے ان مسافروں کو کوئی نفسیاتی کاؤنسلنگ کی سہولت ملی تھی؟ اس بارے
میں بھی کوئی علم نہیں۔ |
|
بوئنگ 720 کے بچ جانے والے مسافروں کا اس حادثے
پر کھل کر بات کرنے سے گریز دراصل ان کے ’پوسٹ ٹرامیٹک سِنڈروم ڈِس آرڈر‘ (پی
ٹی ایس ڈی) کی ایک علامت ہے۔ (صدمہ ذہنی و جذباتی دباوٴ، چوٹ لگنے یا سخت
نفسیاتی دھچکا لگنے سے پیدا ہونے والی حالت کو پی ٹی ایس ڈی کہا جاتا ہے۔) |
|
لندن کے ایک ہسپتال میں کنسلٹنٹ سائیکیٹرسٹ
ڈاکٹر ہاشم رضا کہتے ہیں کہ اس نوعیت کے حادثے جن میں سے زندہ بچ نکلنا
معجزے سے کم نہیں، لوگوں میں گوناگوں جذباتی کیفیات پیدا کرتا ہے جو ذہنی
بیماری کی شکل اختیار کر لیتی ہیں جسے پی ٹی ایس ڈی (PTSD) کہتے ہیں۔ |
|
’سالہا سال گزر جانے کے باوجود پرانے حادثے کا
ذکر اور اس کی کوئی جھلک ایسے شخص کے لیے ان جذبات کو تازہ کر دیتی ہے جس
کی وجہ سے ان کی کوشش ہوتی ہے اس موضوع سے دور رہیں.‘ |
|
امریکہ میں اگرچہ دوسری عالمی جنگ کے بعد سے اس
صدمے کو ایک مرض کے طور پر دیکھا جاتا تھا لیکن پاکستان جیسے ممالک میں اسے
تسلیم ہی نہیں کیا جاتا تھا۔ اس کے علاوہ اُس وقت یعنی سنہ 1965 میں اس کا
شکار ہونے والوں کے لیے کاؤنسلنگ کی سہولت دستیاب نہیں تھی۔ |
|
تعداد میں کمی بیشی |
|
|
|
پی کے 705 میں کتنے افراد سوار تھے اس بارے میں
اعداد و شمار میں معمولی سا اختلاف ہے۔ اس لیے جو بھی مختلف اعداد و شمار
دستیاب ہیں وہ ہم بتا دیتے ہیں۔ بہرحال دو اعداد پر کوئی اختلاف نہیں: عملے
میں 13 افراد تھے اور زندہ بچ جانے والے مسافروں کی تعداد چھ تھی۔ |
|
جو تعداد مختلف ہے وہ یہ ہے کہ بوئنگ 720 میں
مسافروں کی کُل تعداد کتنی تھی۔ ایوی ایشن سیفٹی نیٹ ورک کے مطابق 114
مسافر سوار تھے اور اُن میں سے 108 ہلاک ہوئے تھے جبکہ انٹرنیشنل سول ایوی
ایشن آرگنائزیشن کے مطابق مسافروں کی تعداد 112 تھی اور 106 ہلاک ہوئے تھے۔ |
|
تاہم قاہرہ میں امام شافعی کے روضے کے قریب
قبرستان میں کتبے پر ہلاک ہونے والے افراد کے ناموں کی تعداد 121 بنتی ہے
اور اگر ان میں زندہ بچ جانے والے چھ افراد کو شامل کیا جائے تو پھر طیارے
میں سوار افراد کی کل تعداد 127 بنتی ہے۔ اگر ان میں سے 13 عملے کے افراد
الگ کر لیے جائیں تو مسافروں کی کل تعداد 114 بنتی ہیں۔ |
|
اس طرح انٹرنیشنل ایوی ایشن سیفٹی نیٹ ورک کے
اعداد و شمار قرینِ قیاس لگتے ہیں یعنی مسافروں کی تعداد 114 تھی۔ عملے کے
13 افراد تھے، یعنی طیارے میں کل 127 افراد سوار تھے، ان میں سے چھ زندہ بچ
گئے تھے اور ہلاک ہونے والے افراد کی تعداد 121 بنتی ہے۔ |
|
اور صلاح الدین صدیقی کی یادداشت کے مطابق بھی
طیارے میں کل 127 افراد سوار تھے۔ ان میں سے 121 ہلاک ہوئے تھے اور چھ زندہ
بچ گئے تھے۔ ان کے مطابق طیارے میں سات چینی شہری بھی سوار تھے۔ بہرحال
ایوی ایشن سفٹی نیٹ ورک اور دی ٹائمز نے 127 مسافروں میں سے 121 افراد کی
ہلاکت کی تعداد شائع کی۔ |
|
Partner Content: BBC Urdu |