پردوں سے گھر ٹھنڈا رکھیں۔۔ جانیے شدید گرمی میں پردوں سے کمرا کیسے ٹھنڈا رکھ سکتے ہیں؟

گرمی کے دنوں میں جہاں تپش سے بچنے کے لئے جدید اے سی اور دیگر اشیاء استعمال کی جاتی ہیں وہیں پردوں کی اہمیت سے بھی انکار نہیں کیا جاتا۔ گھر امیر کا ہو یا غریب کا دھوپ سے بچنے کے لئے پردوں کا استعمال ہر کوئی کرتا ہے لیکن انھیں پردوں کا اگر صحیح استعمال کیا جائے تو یہ گرمی سے کمرا ٹھنڈا کرنے میں بھی مدد گار ثابت ہوسکتے ہیں۔ وہ طریقے ہم آپ کو اس آرٹیکل میں بتا رہے ہیں

پردوں کا رنگ

گرمی کے موسم میں پردے ہلکے اور ٹھنڈے رنگ کے ہوں جن پر پھولدار ڈیزائن بنا ہو تو یہ دیکھنے میں آنکھوں کو کافی بھلا محسوس ہوتا ہے۔ ہلکے رنگ کے پردے گرمی کو جذب نہیں کرتے اور ہوا کا گزار آسانی سے ہوتا ہے۔ لیکن اگر کمرے کو بند رکھنا ہے اور دھوپ سے بچانا ہے تو گہرے ٹھنڈے رنگ جیسے کہ گہرا نیلا، ہرا، جامنی رنگ استعمال کریں تاکہ جو روشنی پردے سے کمرے کے اندر داخل بھی ہو تو پردے کی رنگت سے تیز شعاعیں ٹھنڈی دھیمی روشنی میں تبدیل ہوجائیں۔ البتہ کالے رنگ کے پردے نہ استعمال کریں کیونکہ یہ گرمی جذب کرتے ہیں

لائننگ لگائیں

جس کمرے میں دھوپ آتی ہو وہاں لائننگ لگانا کمرے کو دھوپ سے تو بچاتا ہی ہے البتہ پردے کے کپڑے کو بھی دھوپ میں جلنے سے محفوظ رکھتا ہے۔ پردوں میں لائننگ کا استعمال تپش اور گرمی سے بچنے کے لئے بہترین ہے

بلائینڈز اور شیڈز

بلائنڈز دھوپ سے روکنے کے لئے کافی اسٹائلش لگتے ہیں اور آج کل بلائنڈز کے ساتھ پردوں کا استعمال بھی کیا جارہا ہے جن سے کمرے میں تیز روشنی کا داخل ہونا ناممکن ہوجاتا ہے۔ بلائنڈز کے علاوہ شیڈز بھی سورج کی تیز شعاعوں کو روکنے کے لئے استعمال کیے جاسکتے ہیں

خس کے پردے

خس یا ٹاٹ کے پردے پہلے ہر گھر میں موجود ہوتے تھے جو نا صرف سورج کی تپش کو روکتے تھے بلکہ گھر کو خوشبودار ٹھنڈا ماحول فراہم کرتے تھے۔ آج بھی ائیر کولر کے اندر خس کا ایک ٹکڑا کولر کی ہوا ٹھنڈی کرنے کے لئے موجود ہوتا ہے۔ آپ بھی ٹاٹ کے پردے گھر کی کھڑکیوں اور دروازوں میں ضرور لگائیں اور ان کو گیلا کرکے ٹھنڈی ہوا کا لطف اٹھائیں