کھڑکی کا فریم گندا رہ جاتا ہے تو۔۔۔ گھر کی 6 مشکل جگہوں کو صاف کرنے کے آسان ترین طریقے

ہر گھر میں جھاڑو پونجھا اور ڈسٹنگ وغیرہ تو روز ہی کیا جاتا ہے لیکن کچھ جگہیں ایسی ہوتی ہیں جہاں ہاتھ آسانی سے نہیں پہنچتا لیکن اگر انھیں صحیح طرح صاف نہ کیا جائے تو وہ صاف ستھرے گھر میں نمایاں ہو کر بھی گھر کو بھدا بنا دیتے ہیں۔ ایسی ہی مشکل جگہوں کو صاف کرنے کے لئے “ہماری ویب“ نے اپنے پڑھنے والوں کچھ آسان طریقے ڈھونڈھ نکالے ہیں۔ تو آئیے جانتے ہیں وہ طریقے جن سے اب آپ اپنے گھر کا کونا کونا چمکا سکتے ہیں

کھڑکیوں کا یہ حصہ

کھڑکیوں کے فریم کا نچلا حصہ دھول مٹی جمنے سے کافی گندا ہوجاتا ہے اور تنگ جگہ ہونے کی وجہ سے لوگ اس حصے کو بس اوپر اوپر سے ہاتھ مار کے چھوڑ دیتے ہیں۔ اگر آپ کے گھر میں ویکیوم کلینر ہے تو آپ اس جگہ کو اندر سے اچھی طرح صاف کرسکتے ہیں جس کے لئے آپ کو صرف ایک گتے کا ٹکڑا چاہئیے ہوگا۔ جسے ویکیوم کلینر کے پائپ کے نچلے حصے میں موڑ کر فٹ کرکے ویکیوم کلینر کی مدد سے سے تمام دھول مٹی کھینچی جاسکتی ہے جبکہ ویکیوم کلینر نہ ہو تو ٹوتھ برش سے رگڑ کے کسی صاف کپڑے سے پونچھ دینے سے بھی یہ جگہ صاف ہوجاتی ہے

نل کو صاف کرنے کے لئے

ہم گندے ہاتھ نل پر لگاتے ہیں اور ہاتھ دھو کر چلے جاتے ہیں اور ساری گندگی نل پر ہی رہ جاتی ہے جسے بعد میں صاف کیا جائے تو وہ کونوں میں ہی چپک جاتی ہے جہاں ہمارا ہاتھ نہیں جاتا اس لئے نل کو ٹوتھ برش پر بیکنگ سوڈا لگا کر رگڑیں۔ آپ کے باتھ روم کا نل بالکل نئے جیسا ہوجائے گا

شاور ہیڈ

شاور ہیڈ صاف کرنے کے لئے ایک پلاسٹک کی تھیلی لیں جس میں ایک پیالی سے تھوڑا کم بیکنگ سوڈااورایک پیالی سرکہ ڈال کر تھیلی کو شاور پر چڑھا کر کسی چیز سے باندھ دیں اور دو تین گھنٹوں کے لئے چھوڑ دیں۔ اور پھر کسی کپڑے سے صاف کرلیں۔ گندے سے گندا شاور بھی جگمگا اٹھے گا

اے سی کی جالیاں

اے سی کی جالیاں اکثر اتنی گندی ہوجاتی ہیں کہ لگتا ہے ان کا رنگ ہی بدل گیا ہے جبکہ اگر ان کو اچھی طرح صاف رکھا جائے تو یہ اپنی رنگت برقرار رکھتی ہیں۔ اے سی کی جالیوں کو اچھی طرح صاف کرنے کے لئے ایک چاقو پر گیلا تولیہ لپیٹیں اور پھر جالیوں پر ملیں۔ لیکن اس بات کا خیال رکھیں کہ چھری کی نوک والا حصہ استعمال نہیں کرنا

کھڑکیوں کے بلائینڈز

کھڑکی کے بلائینڈز صاف کرنے کے لئے ایک چمٹے کے اوپر نیچے دونوں جانب گیلا تولیہ باندھ دیں اور پھر بلائینڈز سے گزار کر صاف کریں۔

گاڑیوں کے کونے

گاڑیوں میں بھی ایسی بہت سے جگہیں ہوتی ہیں جنہیں ہاتھ سے یا کپڑے کی مدد سے صاف کرنا ممکن نہیں ہوتا تو اس صورت میں ائیر بڈز کا استعمال کریں۔ ائیربڈز کے زریعے ہر کونے کوآسانی سے صاف کیا جاسکتا ہے