جرمن گھر میں بھی جوتے پہن گھر گھومتے ہیں کیونکہ اگر وہ ایسا نہ کریں تو...جرمن باشندوں کی زندگی کے بارے میں 5 دلچسپ حقائق

روایتی قوانین کے علاوہ، بہت سے ممالک میں عام رہن سہن کے طریقے اور رویے بھی قوانین کا ہی درجہ رکھتے ہیں جو دیگر ممالک کے افراد کو عجیب لگتے ہیں۔ جرمنی بھی اس سے مستثنیٰ نہیں ہے۔ ان کی زندگی کی اپنی خصوصیات ہیں جو مقامی لوگوں کے لیے معمول کی بات لگتی ہیں لیکن سیاحوں اور دیگر ممالک کے باشندوں کے نزدیک یہ انوکھی عادتیں ہوتی ہیں لیکن ان عادات کو اپنا کر ہم اپنے کئی مسائل حل کرسکتے ہیں-

گھر میں بھی جوتے پہننا

جرمن باشندے گھر میں بھی جوتے اور موزے پہن کر گھومتے ہیں اور انہیں اس بات سے کوئی فرق نہیں پڑتا کہ باہر کا درجہ حرارت گرم ہے یا سرد- درحقیقت ان کے گھروں کے فرش انتہائی ٹھنڈے ہوتے ہیں اور جوتے اور موزے پہننا جرمن باشندوں کی مجبوری ہوتی ہے ورنہ وہ بیمار پڑ سکتے ہیں-

نام کی وجہ سے درخواست مسترد

بچے کی پیدائش کے بعد جب اس کی رجسٹریشن کے لیے مقامی سرکاری آفس میں درخواست دی جاتی ہے تو اس میں بچے کے نام کا انتخاب انتہائی اہمیت کا حامل ہوتا ہے- اگر والدین کی جانب سے بچے کا منتخب کردہ نام کسی کی کنیت یا کسی پروڈکٹ کا نام ہو تو درخواست مسترد کر دی جاتی ہے- چونکہ درخواست دوبارہ جمع کرانے کا طریقہ کار بہت مہنگا ہوتا ہے، اس لیے جرمن اپنے بچوں کے لیے روایتی نام پسند کرتے ہیں۔

گھر کے نزدیک گاڑی دھونے پر پابندی

جرمنی کے بیشتر علاقوں میں، اپنی گاڑی کو غیر مناسب جگہوں پر دھونا منع ہے۔ اس کی وجہ یہ ہے کہ گندا پانی زمین میں داخل ہو جاتا ہے اور اردگرد کے ماحول پر منفی اثر ڈالتا ہے۔ یہی وجہ ہے کہ سیلف سروس کار واش اس ملک میں بہت وسیع پیمانے پر موجود ہیں۔ وہاں استعمال ہونے والا پانی مٹی میں جذب نہیں ہوتا بلکہ اسے جمع کیا جاتا ہے، فلٹر کیا جاتا ہے اور یہاں تک کہ دوبارہ استعمال کے قابل بنایا جاتا ہے۔

موسمی سبزیاں

موسم خزاں کی آمد اور بازاروں میں موسم خزاں کی سبزیوں کی آمد کے ساتھ، جرمن ان کو ان تمام پکوانوں میں شامل کرنا شروع کر دیتے ہیں جو وہ پکاتے ہیں۔ نیز، وہ کچھ سبزیوں کے لیے خصوصی تقریبات کا اہتمام بھی کرتے ہیں۔

یہاں پیٹرول ختم نہیں ہونا چاہیے

جرمنی میں آٹو بھان نامی شاہراہ یہاں کے پرکشش مقامات میں سے ایک ہے- دلچسپ بات یہ ہے کہ اس شاہراہ پر کار کی کوئی حد رفتار مقرر نہیں ہے- البتہ اس شاہراہ پر سے گزرتے ہوئے آپ کا پیٹرول ختم نہیں ہونا چاہیے کیونکہ یہاں رکنے کی اجازت نہیں ہے- اگر ایسا ہوتا ہے تو سڑک پر چلنے والی دیگر گاڑیوں سے ٹکراؤ ممکن ہے -