کسی نے اپنی مونچھوں کو تاؤ دیا تو کسی نے جنریٹر آن کر دیا، کھلاڑیوں کو آؤٹ کرنے کے بعد بالرز کے مقبول انداز

کرکٹ دنیا کے مقبول ترین کھیلوں میں شمار ہوتا ہے مگر جب سے کرکٹ کے کھیل نے کمرشل مقبولیت حاصل کی ہے اسی وقت سے کرکٹ کے کھلاڑیوں کی مقبولیت کسی سیلیبریٹی سے کم نہیں ہے۔ پاکستان میں بھی کرکٹ مقبول ترین کھیل ہے اور اس کے کھلاڑیوں سے لوگوں کی محبت کی سب سے بڑی دلیل ہمارے وزیر اعظم عمران خان ہیں جنہوں نے ملک کے لیے ورلڈ کپ جیتا تھا اور اسی محبت کے سبب عوام نے ان کو وزیر اعظم منتحب کیا- اچھے کھیل کے ساتھ ساتھ کھلاڑیوں کے انداز بھی عوام میں تیزی سے مقبول ہوتے ہیں اسی وجہ سے وہ اپنی انفرادیت برقرار رکھنے کے لیف بہتر سے بہتر ہونے کی کوشش کرتے ہیں- خاص طور پر وکٹ لینے کے بعد بالر اس خوشی کو جس انداز میں سیلیبریٹ کرتا ہے وہ عوام کے اندر بہت پسند کیۓ جاتے ہیں- آج ہم آپ کو ایسے ہی کچھ پاکستانی بالرز کے بارے میں بتائيں گے جن کے انداز کو بہت پسند کیا جاتا ہے-

حسن علی کا جنریٹر

حسن علی پاکستان کے مایہ ناز فاسٹ بالر وکٹ لینے کے بعد اپنے ہاتھوں کو جس طرح جھٹکا دیتے ہوئے اٹھاتے ہیں اس کو دیکھ کر یہ محسوس ہوتا ہے کہ جیسے وہ کوئی جنریٹر اسٹارٹ کر رہے ہیں- مگر اپنے انداز کے حوالے سے ان کا کہنا ہے کہ ان کے اس انداز کا مطلب یہ ہے کہ وہ ایک بم ہیں جو وکٹ لینے کی صورت میں پھٹتا ہے اور سامنے والے کو آوٹ کر کے تباہ کر دیتا ہے-

شاہد آفریدی

شاہد آفریدی کا وکٹ لینے کے بعد دونوں ہاتھ بلند کر کے وکٹری کا نشان بنانے کا انداز مقبول عام ہے اور ان کا یہ انداز ان کی شناخت بن چکا ہے- اس انداز کے آغاز کے بارے میں ان کا کہنا تھا کہ 2006 میں انگلینڈ کے خلاف ایک میچ کے دوران کیچ پکڑنے کے لیے وہ اور شعیب ملک دونوں بھاگے مگر شاہد آفریدی یہ کیچ پکڑنے میں کامیاب ہوئے تو انہوں نے خوشی میں یہ انداز اپنایا جس کو عوام میں بہت پسند کیا گیا- جس کے بعد انہوں نے اس کو ہی اپنا وکٹ لینے کے بعد خوشی منانے کا انداز بنا لیا-

شاہین شاہ آفریدی

شاہین شاہ آفریدی اس سال ٹی 20 ورلڈ کپ کے پاکستان کے مقبول ترین بالر ہونے کے ساتھ ساتھ شاہد آفریدی کی بیٹی سے منگنی کے بعد ان کے ہونے والے داماد بھی ہیں- اس وجہ سے بھی ان کے وکٹ لینے کے بعد کا انداز کسی حد تک شاہد آفریدی سے ملتا ہے- مگر وہ اس کے ساتھ ساتھ آؤٹ ہونے والے کھلاڑی کو ایک فلائنگ کس دے کر اس کا حوصلہ بھی بڑھا دیتے ہیں-

شعیب اختر

شعیب اختر جن کا شمار دنیا کے تیز ترین بالرز میں ہوتا تھا ان کا دوڑ کر آنا ہی بیٹسمین کو خوفزدہ کرنے کے لیے کافی ہوتا تھا- مگر یہی شعیب اختر جب وکٹ لے لیتے تھے تو ہوائی جہاز کی طرح اڑتے ہوئے گراؤنڈ کا چکر لگاتے تھے جو کہ دیکھنے والوں کو بہت پسند آتا تھا-

وہاب ریاض

وہاب ریاض کا نام انوکھی سیلیبریشن کے لیے مشہور ہے ۔ پی ایس ایل کے دوران جب وہ کسی کھلاڑی کو آؤٹ کرتے تھے تو اپنی مونچھوں کو تاؤ دے کر اس کو مزيد غصہ چڑھایا کرتے تھے جب کہ اس کے علاوہ ان کا ایک اور انداز بھی عوام میں بہت مقبول ہوا جس میں وہ آوٹ کرنے کے بعد اندیکھے دشمن کو تلوار کے وار سے ہلاک کر دیا کرتے تھے-