اپنے قیمتی پیسے برباد نہ کریں، عام استعمال کی اشیا کی خریداری کے ایسے طریقے جو آپ کو بڑے نقصان سے بچا لیں

گھریلو سامان کی خریداری اس وقت بہت برا تجربہ ثابت ہوتی ہے جب سامان گھر لانے کے بعد اس میں سے زيادہ تر اشیا باسی یا خراب نکل آئیں اور اس کے بعد ان کو تبدیل کروانا وقت کا ضیاع محسوس ہو اور ان کا استعمال پیسے کا ضياع لگے اس صورتحال سے ہر انسان کبھی نہ کبھی ضرور گزرا ہوگا- مگر اس سے محفوظ رہنے کے لیے تھوڑی سی عقلمندی کی ضرورت ہوتی ہے جس کا استعمال کر کے خود کو نقصان سے بچایا جا سکتا ہے-

مچھلی کی خریداری کرتے ہوئے

آپ کو یہ سن کر حیرت ہو گی کہ تازہ مچھلی کے اندر مچھلی کی مخصوص بو موجود نہیں ہوتی ہے اگر آپ کو مچھلی میں سے بو آرہی ہے تو یہ اس بات کی دلیل ہے مچھلی تازہ نہیں ہے- مچھلی کے باسی ہونے کی دوسری نشانی اس کا رنگ ہوتا ہے- فارم میں پلنے والی مچھلی کا گوشت ہلکے گلابی رنگ کا ہوتا ہے جب کہ قدرتی طور دریا یا سمندر میں پائی جانے والی مچھلی کا گوشت قدرے گہرے رنگ کا ہوتا ہے- اگر مچھلی کے گوشت پر براؤن یا گرے دھبے نظر آرہے ہوں تو یہ اس بات کی نشانی ہے کہ یہ مچھلی پرانی یا باسی ہے لہٰذا ایسی مچھلی کی خریداری نہیں کرنی چاہیے-

کھجوروں کی خریداری کرتے وقت

تازہ کھجور کی سطح پر جھریاں موجود ہوتی ہیں مگر بہت زيادہ نہیں ہوتی ہیں اور نہ ہی وہ سخت ہوتی ہیں- خشک کھجور اس وقت بہترین ہوتی ہے جب کہ اس کی جلد پر ایک قدرتی چمک موجود ہو اور اس کا گودا بہت سخت نہ ہو- لیکن اس کی سطح پر سفید دھبے موجود نہ ہوں جو اس بات کی نشانی ہوتی ہے کہ اس نے گلنا سڑنا شروع کر دیا ہے-

لہسن کی خریداری کے وقت

اگر دکاندار یہ کہتا ہے کہ لہسن بالکل تازہ ہے اور اس میں کسی قسم کی شکایت نہیں ملے گی لیکن اس کی بات پر یقین کرنے کے بجائے خود چیک کر لیں- اگر لہسن میں سے کسی قسم کی عجیب سی بو محسوس ہو جو اس کی اپنی بو سے مختلف ہو تو یہ اس بات کی دلیل ہے کہ لہسن باسی ہے- اس کے علاوہ اگر اس کی پھانک نرم ہو رہی ہو اور اس کی نمی کم ہو رہی ہو تو اس کا مطلب ہے کہ لہسن باسی ہے اور اس میں سڑاند شروع ہو چکی ہے-

چقندر کی خریداری کرتے وقت

چقندر کی خریداری کے وقت سب سے پہلی کوشش یہ کرنی چاہیے کہ اس کو اس کے ہرے پتوں کے ساتھ خریدیں جو اس بات کی دلیل ہوتی ہے کہ وہ تازہ ہے- بعض اوقات سبزی والے اس کے پتے ہٹا دیتے ہیں اس صورت میں اس کو خریدتے ہوئے اس بات کا خیال رکھیں کہ بہت بڑے سائز کے چقندر کی خریداری نہ کریں- کیوں کہ زيادہ بڑے سائز کے چقندر ذائقے میں پھیکے ہوتے ہیں اس وجہ سے ان کو درمیانی سائز کا خریدنا چاہیے-

انار کی خریداری کرتے وقت

بعض اوقات انار کی خریداری کرنے کے بعد اس کو کاٹنے کے بعد شدید مایوسی ہوتی ہے کیوں کہ اس کے دانے کاٹنے کے بعد ہی بدمزہ اور بد رنگ نظر آتے ہیں جس سے مہنگے انار خریدنے کے سارے سارے پیسے ہی ضائع ہو جاتے ہیں- اس وجہ سے انار خریدتے ہوئے کچھ باتوں کی طرف دھیان رکھنا ضروری ہے- مثال کے طور پر اچھا اور پکا ہوا انار کی شکل جیومیٹریکل ہوتی ہے اس کے علاوہ اچھے پکے ہوئے انار کی جلد بے لچک اور چمکدار ہوتی ہے- اگر یہ جلد ان خصوصیات سے محروم ہو تو اس کا مطلب ہے کہ یا تو وہ کچے ہیں یا پھر زيادہ پک چکے ہیں جس کی وجہ سے اندر سے اس کے دانے گلے ہوئے بھی ہو سکتے ہیں-

لیموں کی خریداری کے وقت

لیموں کی خریداری کے وقت سب سے پہلے تو اس کو ہاتھ میں لے کر اس کے وزن کو چیک کونا چاہیے جو لیموں وزن میں بھاری ہوں گے وہی زیادہ رس دار ہوتے ہیں- اس کے بعد دوسری چیز لیموں کی کھال چیک کرنی ہوتی ہے اس کا چھلکا اگر ڈنڈی والی جانب سے ایسا ہو کہ اس میں بل نظر آرہے ہوں تو اس کا مطلب ہے کہ یہ لیموں درخت کی شاخ پر پکا ہے اور اس کے اندر وہ تمام معدنیات محفوظ ہیں جو اسکے رس میں ہوتی ہیں-