معاشی بحران : پاکستان کس چیز کی امپورٹ پر کتنا پیسہ خرچ کرتا ہے؟

پاکستان اس وقت تاریخ کے بدترین معاشی بحران سے دوچار ہے اور حکومت کے پاس زرمبادلہ کے ذخائر تیزی سے ختم ہورہے ہیں تاہم اس کے باوجود ملک میں درآمد کی جانے والی اشیاء میں کسی صورت کمی دکھائی نہیں دیتی۔ حکومت نے پرتعیش اشیاء کی درآمد پر پابندی کا فیصلہ کیا ہے لیکن ایک نظر دیکھتے ہیں کہ رواں مالی سال پاکستان میں کیا کیا سامان امپورٹ کیا گیا اور اس پر کتنا پیسہ خرچ ہوا۔ رواں مالی سال کے 10ماہ کے دوران پاکستان کا درآمدی حجم 65 ارب 53 کروڑ 72 لاکھ ڈالرز رہا، جو گزشتہ سال کے اسی دورانیے سے 46 اعشاریہ51 فیصد زائد ہے۔

1۔ پیٹرولیم مصنوعات

پاکستان کو اپنے زرمبادلہ کے ذخائر کا سب سے بڑا حصہ پیٹرولیم مصنوعات کی امپورٹ پر خرچ کرنا پڑتا ہے اور رواں مالی سال یعنی جولائی تا اپریل تک پیٹرولیم مصنوعات کی درآمدات پر 17 ارب 3 کروڑ 35 لاکھ ڈالرز کی خطیر رقم خرچ کی گئی۔

2۔ کیمیکلز کی امپورٹ

پاکستان میں مختلف اشیاء کی تیاری میں استعمال ہونے والے کیمیکلز بھی بیرون ممالک سے منگوائی جاتے ہیں جس پر بھاری زرمبادلہ خرچ ہوتا ہے اور رواں مالی سال ملک میں 12 ارب 11 کروڑ 53 لاکھ ڈالرز کے کیمیکل درآمد کیے گئے۔

3۔ مشینری کی درآمدات

پاکستان میں گزشتہ سال کے مقابلے مشینری کی درآمدات 20 اعشاریہ 49 فیصد زائد رہی اور 10 ماہ میں 9 ارب 55 کروڑ 18 لاکھ ڈالرز کی مشینری درآمد کی گئی۔

4۔ خوردنی اشیاء

زرعی ملک ہونے کے باوجود پاکستان میں بیشتر خوردنی اشیاء بیرون ممالک سے منگوائی جاتی ہیں اور گزشتہ سال کے مقابلے رواں سال کھانے پینے کی اشیاء کی درآمدات میں 12 اعشاریہ 30 فیصد اضافہ ہوا اور 10 ماہ میں 7 ارب 74 کروڑ 76 لاکھ ڈالرز کی کھانے پینےکی اشیا درآمد کی گئیں۔

5۔ پام آئل

پاکستان میں خوردنی تیل پر بھی سالانہ اربوں ڈالر خرچ کئے جاتے ہیں اور جولائی 2021 تا اپریل 2022ء کے دوران 3 ارب ڈالرز سے زائد کا پام آئل درآمد کیا گیا۔

6۔ ادویات

پاکستان ادویات کی درآمدات پر بھی سالانہ بھاری زرمبادلہ خرچ کرتا ہے اورجولائی 2021ء تا اپریل 2022ء کے دوران 3 ارب 86 کروڑ 96 لاکھ ڈالرز کی میڈیسن مصنوعات درآمد کی گئی۔

7۔ موبائل فونز

پاکستان جیسے غریب اور ترقی پذیر ملک کے لوگوں کیلئے سالانہ اربوں ڈالر خرچ کردیئے جاتے ہیں اور رواں مالی سال بھی پاکستانیوں کے شوق کو پورا کرنے کیلئے 1ارب 81 کروڑ ڈالرز کے موبائل درآمد کئے گئے۔

8۔ ٹیکسٹائل اور سونا

پاکستان کو ٹیکسٹائل کی صنعت کیلئے مختلف اشیاء اور سونا بھی باہر سے منگوانا پڑتا ہے اور رواں مالی سال میں ٹیکسٹائل درآمدات کا حجم 3 ارب 93 کروڑ ڈالرز اور سونا درآمد کرنے کیلئے 1کروڑ 80 لاکھ ڈالرز ادا کرنا پڑے۔

9۔ ٹرانسپورٹ اور پاور مشینری

پاکستان کو لگژری گاڑیوں اور موٹر سائیکلوں کی امپورٹ اور پاور مشینری کیلئے بھی اربوں ڈالر سالانہ بیرون ممالک کو ادا کرنے پڑتے ہیں اور رواں مالی سال ملک میں ٹرانسپورٹ کے شعبے میں 3 ارب 73 کروڑ 78 لاکھ ڈالرز کی درآمدات ہوئیں جبکہ ایک ارب 30 کروڑ ڈالرز کی پاور مشینری درآمد کی گئی۔

10۔ آئرن اور اسٹیل

ملک میں آئرن اور اسٹیل کی طلب کو پورا کرنے کیلئے بیرون ممالک سے منگوائے جانے والے آئرن اور اسٹیل کا بل 2 ارب 37 کروڑ 72 لاکھ ڈالرز رہا۔

< Previous مسئلہ کشمیر اور چند تاریخی حقائق NEXT > کپتان کے مداحوں کی ایسی 10 تصاویر جو دوسرے کارکنوں کا خون گرما دیں۔۔۔