اس میں بھارت کے لیے ایک بڑا پیغام چُھپا ہے۔۔۔ مار خور اور آئی ایس آئی کا آپس میں کیا تعلق؟

آج کل مار خور سوشل میڈیا پر اسی طرح وائرل ہوتا ہوا نظر آرہا ہے جیسے کچھ عرصہ قبل ویگو (ٹویوٹا برانڈ کا معروف منی ٹرک) کے چرچے سوشل میڈیا پر نظر آرہے تھے اور وقت کے ساتھ ساتھ سوشل میڈیا پر قومی اداروں پر تنقید کا سلسلہ دراز ہوتا جارہا ہے۔ تنقید کی وجہ کچھ بھی ہو اس سے قطع نظر ہم آپ کو صرف یہ بتاتے چلیں کہ مار خور اور پاک فوج کے معروف خفیہ ادارے آئی ایس آئی میں براہ راست کیا تعلق ہے ۔ تو چلئے اس گہرے تعلق کی تفصیل جانتے ہیں۔

یہ تو آپ جانتے ہوں گے کہ مارخور پاکستان کا قومی جانور ہے اور پاکستان کی خفیہ ایجنسی آئی ایس آئی کا مونوگرام بھی مارخور کی تصویر کے ساتھ سجا ہوا ہے۔ لیکن نوجوان نسل میں سے بہت کم لوگ جانتے ہوں گے کہ مارخور کا لفظی معنی کیا ہے۔

اگر آپ نہیں جانتے تو ہم آپ کو بتائیں گے۔ لفظ مار کا مطلب سانپ اور خور کا مطلب کھانے والا ہے اور قدیم داستانوں کے مطابق مارخور سانپ کو مار کر چباتا ہے اور کاٹنے سے اس کے منہ سے جھاگ نکلتا ہے جو نیچے گر کر خشک اور سخت ہو جاتا ہے۔ لوگ اس خشک جھاگ کو تلاش کرتے ہیں اور اسے سانپ کے کاٹنے کے علاج کے لیے استعمال کرتے ہیں۔

اب آپ سوچیں گے کہ مارخور کے منہ میں سانپ آئی ایس آئی کی سرکاری علامت کیوں بن گیا تو اس کا جواب یہ ہے کہ مارخور پاکستان کا قومی جانور ہے اور سانپ کی بھارت میں پوجا کی جاتی ہے، آئی ایس آئی کی سرکاری علامت میں پاکستان کا قومی جانور مارخور بھارت کے رینگنے والے قومی جانور سانپ کو کھا رہا ہے جو پاکستان کی بھارت پر فتح کی علامت ہے۔

سانپ کو بدقسمتی، دشمنی اور مخصوص دیگر منفی صفات کی علامت سمجھا جاتا ہے اور مارخور سانپ کھاتا ہے، ویسے تو یہ ایک شریف النفس جانور کہلاتا ہے لیکن جہاں دشمن کی بات ہو تو انتہائی خطرناک ثابت ہوتا ہے اور اسی طرح اگر ہم آئی ایس آئی کی بات کریں تو انتہائی خاموشی اور تندہی سے کام کرنے والے آئی ایس آئی کے جوان ہمیں مار خور کی طرح ہی دشمن کے خطرے سے بچائے رکھتے ہیں اور ملک کی سلامتی اور دفاع کا تحفظ کرتے ہیں۔

مارخور پہاڑی خطوں سے اچھی طرح مطابقت رکھتا ہے اور ہزاروں میٹر کی بلندی کے درمیان پایا جا سکتا ہے اور پہاڑی کناروں کے قریب رہتا ہے۔ اسی طرح پاکستان کے دفاع کیلئے شب و روز کوشاں آئی ایس آئی کے جوان بھی دشوار گزار پہاڑوں اور سرد ترین علاقوں میں بھی ہماری خاطر زندگیاں گزارتے ہیں۔

آئی ایس آئی پاکستان کی طاقتور ترین ایجنسی ہے اور شاید دنیا کی طاقتور ترین ایجنسیوں میں سے ایک ہے اور جس طرح مار خور بل میں چھپے سانپوں کی تاک میں رہتا اور ان ڈھونڈ ڈھونڈ کر ختم کرتا ہے ، بالکل اسی طرح پاکستان کی قابل فخر انٹیلی جنس ایجنسی پاکستان میں چھپے ملک دشمنوں کو پکڑ پکڑ کا خاتمہ کرتی ہے۔

مار خور صرف سانپ جیسے دشمنوں کا سر کچلتا ہے اسی لئے اردگرد رہنے والے اکثر اس شریف النفس اور بہادر جانور کے خلاف سازش کے جال بھی بنُتے رہتے ہیں لیکن یہ اپنا کام کرتا رہتا ہے۔ اسی طرح آئی ایس آئی کے خلاف اندرون اور بیرون ملک کئی سازشیں بُنی جاتی ہیں لیکن آئی ایس آئی تنازعات میں الجھنے کے بجائے اپنے لوگوں کا تحفظ یقینی بناتی ہے اور سازش کرنے والوں کو بھی خطرات سے محفوظ رکھتی ہے۔

اپنی زندگی پہاڑوں پر سر مارتے ہوئے گزارنے والا مار خور کبھی انسانوں سے بدلے کی امید نہیں رکھتا بالکل اسی طرح آئی ایس آئی کے بہادر اور خوبصورت جوان اپنی زندگیاں گمنامی کے اندھیروں میں گزار دیتے ہیں لیکن کبھی شہرت اور انعام کے لالچ میں نہیں آتے اور ملک و قوم کی خاطر اپنی زندگیاں داؤ پر لگا دیتے ہیں۔

فوج ہو یا خفیہ ادارے عوام میں ان کی ساکھ مضبوط ہونا بہت ضروری ہے لیکن بدقسمتی سے ان دنوں پاکستان میں قومی اداروں کے حوالے سے نوجوان نسل میں ناراضگی کا عنصر بڑھتا جارہا ہے جو ہماری قومی سلامتی کیلئے کسی صورت ٹھیک نہیں۔

ضرورت اس امر کی ہے کہ ادارے نیوٹرل رہنے کے ساتھ عوام میں اپنی ساکھ بہتر بنانے کیلئے بھی اقدامات اٹھائیں تاکہ عوام میں ان کی جڑیں مزید مضبوط ہوسکیں۔

< Previous عیدالاضحیٰ: دنیا کے مختلف ممالک میں کونسے جانور زیادہ قربان کیے جاتے ہیں؟ NEXT > کچھ تو گڑبڑ چھپی ہے، ان تصاویر میں موجود غلطیاں ڈھونڈنے والا سوپر سے بھی اوپر ذہین قرار - جوابات