|
|
| |
| پاکستان تحریک انصاف کے سربراہ اور سابق وزیر اعظم عمران
خان کی جانب سے افواج پاکستان کے حوالے سے متنازع بیانات نے ملک میں سیاسی
درجہ حرارت کو ایک بار پھر نقطہ عروج پر پہنچا دیا ہے اور حیرت کی بات تو
یہ ہے کہ عمران خان کی ماضی کی تمام بے سروپا باتوں کا دفاع کرنے والے
ساتھی اور اتحادی بھی اس وقت ان بیانات پر پہلو بچاتے نظر آتے ہیں۔ |
| |
| عمران خان کا بیان |
| سابق وزیراعظم عمران خان نے اتوار کے روز فیصل آباد کے
جلسے میں نواز شریف اور آصف علی زرداری کو نشانہ بناتے ہوئے کہا تھا کہ
نواز شریف اور آصف زرداری الیکشن سے اس لیے بھاگ رہے ہیں کہ یہ نومبر میں
اپنی مرضی کا آرمی چیف لگانا چاہتے ہیں- ان کی پوری کوشش ہے کہ اپنا آرمی
چیف لائیں جو ان کے حق میں بہتر ہو، یہ ڈرتے ہیں کہ تگڑا اور محب وطن آرمی
چیف آگیا تو وہ ان سے پوچھے گا کیونکہ انہوں نے پیسہ چوری کیا ہوا ہے۔ |
|
|
|
آٓئی ایس پی آر کا ردعمل |
|
پاک فوج کی سینئر قیادت سے متعلق عمران خان کے ہتک آمیز بیان پر آئی ایس
پی آر کی جانب سے جاری بیان میں شدید غم و غصے کا اظہار کیا گیا، آئی ایس
پی آر کا کہنا تھا کہ آرمی چیف کے انتخاب کے عمل کو متنازع بنانا ریاست
پاکستان اور ادارے کے مفاد میں نہیں۔ پاک فوج کی سینئر قیادت کی اہلیت اور
حب الوطنی دہائیوں پر محیط بے داغ، شاندار عسکری خدمات سے عیاں ہے، کیا
کوئی یہ کہہ سکتا ہے افواجِ پاکستان میں کوئی محب وطن نہیں ہوگا؟،نازک وقت
میں پاک فوج کی سینئر قیادت کو متنازع بنانے کی کوشش انتہائی افسوسناک ہے۔ |
|
|
|
صدر مملکت عارف علوی |
|
صدر عارف علوی نے بھی سابق وزیراعظم کے بیان سے اظہار لاتعلقی کرتے ہوئے
کہا کہ عمران خان اپنے بیان کی خود وضاحت کریں کہ ان کے کہنے کا کیا مقصد
تھا۔ فوج محبِ وطن ہے، آرمی چیف سمیت پوری فوج کی حب الوطنی پر شک نہیں
کیا جا سکتا، موجودہ حکومت سمیت سب ادارے محب وطن ہیں۔ |
|
|
|
|
| |
| حکومتی اتحاد |
| حکومتی اتحادی جماعتوں نے فوج کے بارے میں متنازع بیان
پر کہا کہ عمران خان عوام کو فوج سے لڑانا اور ملک کو سری لنکا بنانا چاہتے
ہیں، چیئرمین پی ٹی آئی کی اداروں کو بدنام کرنے کیلئے نفرت انگیز باتیں
نئی انتہا کو چھو رہی ہیں، سپاہی سے لیکر جرنیل تک ہر ایک بہادر اور محب
وطن ہے،عمران خان نے ملک کو کمزور کرنے کا ٹھیکہ لیا ہوا ہے، عدلیہ سمیت
تمام شراکت داروں نے عمران خان سے فیصلہ کن انداز میں نہ ٹمنا تو پاکستان
کو مزید نقصان ہوگا۔ |
| |
| اسد عمر |
| پاکستان تحریک انصاف کے مرکزی رہنما اسد عمر کا کہنا ہے
کہ عمران خان کے بیان میں اصل تنقید نواز اور زرداری پر تھی، ان کے بیان
میں فوج ہدف نہیں تھی تاہم انہوں نے یہ بھی اعتراف کیا کہ عمران خان کے
بیانات میں الفاظ کا چناؤ تو ہمیشہ ہی بہتر ہوسکتا ہے۔ |
| |
| شیریں مزاری |
| پاکستان تحریک انصاف کی رہنما شیریں مزاری بھی پارٹی
چیئرمین کے متنازع بیان کی ذمہ داری لینے کو تیار نہیں بلکہ انہوں نے ایک
واضح بیان کی الگ ہی تشریح بیان کرتے ہوئے بتایا کہ پی ڈی ایم جان بوجھ کر
عمران خان کے بیان کو توڑ مروڑ کر نشانہ بنا رہی ہے اور یہ بھی دعویٰ کیا
کہ عمران خان نے کسی موقع پر فوج اور فوجی قیادت پر تنقید نہیں کی۔ |
| |
|
|
| |
| شیخ رشید |
| عوامی مسلم لیگ کے سربراہ یوں تو اپنی الگ
پارٹی رکھتے ہیں لیکن پی ٹی آئی حکومت میں عمران خان کے قریبی ساتھی کے
طور پر ہمیشہ ان کا دفاع کرتے رہے اور عمران خان کیلئے کسی بھی حد سے گزرنے
کیلئے تیار ہیں لیکن فوج مخالف بیان پر ان کا بھی کہنا ہے کہ عمران خان
آرمی کے بارے میں بیان دیتے ہیں، یہ ان کی پارٹی کی پالیسی ہے لیکن نہ میں
اداروں کے خلاف تھا اور نہ ہوں گا۔ |
| |
| پرویز الہیٰ |
| پی ٹی آئی نے پنجاب میں سب سے زیادہ سیٹیں
رکھنے کے باوجود وزیراعلیٰ کا تاج پرویز الٰہی کے سر پر سجایا اور پرویز
الٰہی نے بھی صرف وزارت اعلیٰ کیلئے اپنی پارٹی کے دو ٹکڑے کردیئے اور اپنے
کزن چوہدری شجاعت کو بھی چھوڑ دیا اور حیرت کی بات تو یہ ہے کہ الگ جماعت
ہونے کے باوجود ان دنوں پرویز الٰہی اور ان کے صاحبزادے مونس الٰہی عمران
خان کو اپنا قائد مان چکے ہیں لیکن عمران خان کے فوج کے خلاف بیان پر پرویز
الٰہی کا کہنا ہے کہ اسلام کی خدمت، جمہوریت اور ملکی دفاع کے حوالے سے
آرمی چیف جنرل قمر جاوید باجوہ کا کردار قابلِ تحسین ہے۔ ملک کو انتشار و
فساد، خانہ جنگی اور ہر قسم کے حالات سے پاک فوج اور علمائے کرام نے بچا
رکھا ہے۔ فوج کے خلاف بات کرنے والے قوم اور دین کے دشمن ہیں۔ |
| |
| ملک کی صورتحال |
| عمران خان نے منگل کو پشاور کے جلسے میں حسب
روایت اپنے بیان پر یوٹرن لینے کی کوشش تو کی لیکن بندوق سے نکلی گولی کی
طرح منہ سے نکلی بات چاہے کتنی بھی وضاحتیں کرلیں واپس آنا مشکل ہے۔ عمران
خان کی وضاحتوں کے باوجود ملک میں اس وقت ایک بار پھر کشیدگی واضح نظر
آرہی ہے اور گزشتہ روز اسلام آباد ہائیکورٹ نے بھی عمران خان کی سرزنش کی
اور حکومت نے اداروں سے چیئرمین پی ٹی آئی کیخلاف ایکشن لینے کا مطالبہ
کیا ہے اور افواج پاکستان کو متنازع بنانے پر اگر عمران خان کیخلاف
کارروائی ہوتی ہے تو شائد ایم کیو ایم کی طرح پی ٹی آئی بھی پتوں کی طرح
بکھری نظر آئے گی۔ |