چپس کے پیکٹ کو ہمیشہ الٹا کھولیں٬ 5 گھریلو ٹوٹکے جو پیسہ بھی بچائیں اور زندگی بھی آسان بنائیں

انٹرنیٹ کی دنیا اسے گھریلو ٹوٹکوں سے بھری ہوئی ہے جو آپ کے دن بھر کے کاموں میں آسانی پیدا کرسکتے ہیں- یہ ٹوٹکے نہ صرف آپ کے پیسے اور وسائل بچاتے ہیں بلکہ آپ اہم وقت کی بھی بچت کرنے میں مددگار ثابت ہوتے ہیں- ایسے ہی 5 طریقے یا ٹوٹکے ہم آپ کو آج بتارہے ہیں جنہیں اختیار کر کے آپ اپنی زندگی کسی نہ کسی حد تک آسان بنا سکتے ہیں-

مرچوں کی جلن

کسی بھی قسم کی مرچ کاٹنا اکثر خطرناک ثابت ہوتا ہے- اس کی وجہ یہ ہے کہ مرچ کاٹنے کے بعد اگر آپ ہاتھ دھو بھی لیتے ہیں تو اس کے اثرات آپ کے ہاتھوں پر موجود رہتے ہیں- ایسے میں جب آپ یہ ہاتھ اپنے چہرے یا آنکھوں پر لگاتے ہیں تو فوراً جلن شروع ہوجاتی ہے- اس سے بچنے کا بہترین طریقہ یہ ہے کہ صابن سے ہاتھ دھونے سے قبل اپنے ہاتھوں پر سبزیوں کا تیل اچھی طرح لگا لیں- اس طرح آپ تکلیف سے بچ سکتے ہیں-

گیس کی بچت

آپ ایک ہی وقت میں 2 ڈشز ایک ساتھ پکا کر بھی گیس کی بچت کر سکتے ہیں- اس کے لیے آپ پتیلوں کی ایک ہی برنر پر ایک دوسرے کے اوپر ایسے رکھیں کہ ان کی پوزیشن درست ہو اور گرنے نہ پائیں- اس طرح نہ صرف وقت کی بچت ممکن ہے بلکہ گیس کی بچت بھی یقینی ہے-

اضافی ابال سے بچائیں

دیگچی کے ڈھکن اور دیگچی کے درمیان ایک لکڑی کا ٹوٹھ پک پھنسا کر رکھیں- اس طرح آپ جو بھی چیز ایسی پکا یا ابال رہی ہوں جس کے گرنے کا خطرہ موجود ہو وہ برتن سے باہر گرنے سے بچ جائے گی-

آلو اور پیازوں کو محفوظ رکھنے کا طریقہ

آلو اور پیاز کو ایک ساتھ جالی میں رکھنا ہمارے گھروں میں ایک عام سے بات ہے- لیکن حقیقت میں یہ طریقہ بہت غلط ہے جو ہم اختیار کرتے ہیں کیونکہ آلو کچھ ایسی گیسیں خارج کرتے ہیں جو پیاز کو خراب کرسکتی ہیں- اس کے لیے بہتر یہی ہے آپ ان دونوں سبزیوں کو علیحدہ علیحدہ جالیوں میں محفوظ بنائیں اس سے ان کی زندگی بھی طویل ہوجائے گی-

چپس کا پیکٹ الٹا کھولیں

روایتی طور پر چپس کے پیکٹ لمبے عرصے تک دکانوں اور اسٹورز وغیرہ میں شیلف پر سیدھے رکھے جاتے ہیں- جس کی وجہ سے ان کا مصالحہ نیچے بیٹھ جاتا ہے- اس مسئلے سے بچنے کے لیے ضروری ہے کہ آپ ہمیشہ چپس کے پیکٹ الٹا کھولیں اور اسے کھولنے سے قبل پیکٹ کو اچھی طرح ہلا بھی لیں مصالحہ مکس ہوجائے گا-