آپ کا بجلی کا بل اس وجہ سے زیادہ آتا ہے۔۔۔ ہزار احتیاط کے باوجود 5 غلطیاں جو آپ کا بل بڑھا دیتی ہیں

پاکستان میں بڑھتی مہنگائی میں بجلی کا بل ادا کرنا امیر اور غریب ہر طبقے کیلئے مشکل ہوچکا ہے۔ شہری سولر اور دیگر کئی طریقوں سے بجلی کا خرچ بچانے کی تدبیریں کرتے نظر آتے ہیں لیکن ہر حربہ آزمانے کے باوجود بجلی کے بل میں کمی نہیں ہورہی۔ ہم آپ کو بتاتے ہیں کہ آپ ہزار احتیاط کے باوجود کہاں غلطیاں کرکے اپنے بل میں خود اضافے کی وجہ بنتے ہیں۔

اے سی / مائیکرو ویو اون

مہنگائی کے باوجود مڈل کلاس طبقے میں بھی اے سی اور دیگر برقی آلات کا استعمال عام ہوچکا ہے اور یہ برقی اشیاء بہت زیادہ توانائی استعمال کرتی ہیں- لیکن حیرت کی بات تو یہ ہے کہ جب آپ ان چیزوں کو استعمال نہیں کرتے تب بھی یہ چیزیں ازخود بجلی استعمال کررہی ہوتی ہیں۔ جب بھی اے سی یا دیگر اشیاء کا استعمال نہ ہو تو ان کو سوئچ سے بند کریں کیونکہ یہ چیزیں یومیہ 100 واٹ سے زیادہ بجلی استعمال کرکے آپ کو بڑا جھٹکا دے سکتی ہیں۔ اس لئے بل کے جھٹکوں سے بچنے کیلئے بجلی بچانے کی کوشش کریں۔

ٹی وی

آج شہر ہو یا گاؤں ہر گھر میں ٹی وی لازمی ہے بلکہ ایک ایک گھر میں کئی کئی ٹی وی موجود ہیں جو آپ کو تفریح تو فراہم کرتے ہیں ساتھ ہی ساتھ بجلی کا بل بھی بڑھاتے ہیں۔ کوشش کریں کہ جب ٹی وی آف کریں تو اس کو سوئچ سے بھی بند کریں ورنہ اسٹینڈ بائے پر رہنے کی وجہ سے ٹی وی درجنوں واٹ کا ڈرامائی کٹ لگاکر آپ کی شکل پر بارہ بجاسکتا ہے۔

ڈیجیٹل ٹی وی باکس

ہر گھر میں انٹرنیٹ تک آسان رسائی کی وجہ سے آج گھروں میں ڈیجٹیل ٹی وی باکس بھی عام ہے، انٹرنیٹ کے ذریعے اس باکس کی مدد سے لوگ دنیا بھر کے چینلز اور یوٹیوب کے مزے اڑاتے ہیں لیکن اگر آپ اس کو سوئچ سے آف نہیں کریں گے تو بند ہونے کے باوجود آپ کو بل آنے پر یہ باکس ڈانس کرنے پر مجبور کرسکتا ہے۔

کمپیوٹر/لیپ ٹاپ

کورونا کے بعد ملک میں ورک فراہم ہوم یعنی گھر سے کام کرنے کے رجحان میں اضافہ دیکھا جارہا ہے جس کی وجہ سے گھروں میں کمپیوٹر اور لیپ ٹاپ لازمی ہوگئے ہیں۔ یہ حقیقت ہے کہ ورم فراہم ہوم ایک اچھی سہولت ہے لیکن اگر آپ اس کا درست استعمال نہیں کریں گے تو رحمت بھی آپ کیلئے زحمت بن جائیگی کیونکہ کمپیوٹر یا لیپ ٹاپ ٹھیک سے سوئچ سے بند نہ کرنے کی وجہ سے مسلسل اسٹینڈ بائے پر رکھنے سے آپ کا کمپیوٹر آپ کو بڑا نقصان پہنچا سکتا ہے۔

موبائل چارجرز

ٹیکنالوجی کے اس دور میں آج موبائل فون ہر انسان کی بنیادی ضرورت سمجھا جاتا ہے۔ ہر گھر میں ڈھیروں فونز موجود ہیں جن کو لوگ ہمیشہ ہاتھ میں رکھنا پسند کرتے ہیں اور استعمال زیادہ ہونے کی وجہ سے چارجنگ کیلئے بجلی بھی زیادہ استعمال ہوتی ہیں- لیکن اکثر لوگ فون چارج کرنے کے بعد چارجر کو یونہی آن چھوڑ دیتے ہیں جو خالی پڑا فون تو چارج نہیں کرتا ہاں البتہ آپ کے بل میں یونٹس ضرور بڑھا دیتا ہے۔