میں نہیں جانتا کہ مجھے گولی کب لگی٬ 77 سال سے گردن میں موجود گولی کے ساتھ زندہ رہنے والے شخص کو حقیقت کا پتہ کیسے چلا؟

یقیناً عام طور پر بندوق سے نکلنے والی ایک گولی کسی کو بھی زخمی کرنے یا پھر جان لینے کے لیے کافی ہوتی ہے لیکن اس کے باوجود دنیا میں کئی ایسے حیران کن واقعات بھی سامنے آچکے ہیں جن میں گولی تو چلی اور انسان کے جسم میں داخل بھی ہوئی لیکن متاثرہ شخص کی زندگی پر کوئی فرق نہ پڑا-

ایسا ہی ایک واقعہ گزشتہ دنوں چین میں بھی سامنے آیا ہے جس کے مطابق ایک 95 سالہ چینی فوجی پر حال ہی میں انکشاف ہوا کہ وہ تقریباً آٹھ دہائیوں سے اپنی گردن میں لگی ایک گولی کے ساتھ زندگی گزار رہا ہے اور ایک طویل عمر گزار چکا ہے-

چین کے شہر شیڈونگ کے رہائشی ژاؤ (Zhao) پر یہ انکشاف اس وقت ہوا جب وہ اپنے گھر کی بالکونی سے نیچے جا گرا اور اسے اپنی گردن میں ہلکی تکلیف محسوس ہوئی جس کی شکایت اس نے بیٹے سے کی-

جس کے بعد چینی فوجی کو چیک اپ کے اسپتال لے جایا گیا جہاں ڈاکٹروں نے گردن کے ایکسرے کا فیصلہ کیا تاکہ پتہ لگایا جاسکے کہ گردن کو کوئی نقصان تو نہیں پہنچا-

لیکن ایکسرے رپورٹ دیکھ کر ڈاکٹر اس وقت حیران رہ گئے جب انہوں نے گردن میں کوئی غیر معمولی چیز پھنسی ہوئی دیکھی جسے بعد میں پرانی گولی کے طور پر شناخت کیا گیا-

چینی شخص نے ڈاکٹروں کو بتایا کہ اس نے نوعمری میں چینی فوج میں شمولیت اختیار کی تھی اور دو جنگیں بھی لڑی تھیں -ایک دوسری جنگ عظیم (1931-1945) کے دوران جاپانی حملہ آوروں کے خلاف لڑی اور کوریائی جنگ کے دوران شمالی کوریا کی طرف سے ( 1950-1953)۔ فوج میں اپنے وقت کے دوران اسے متعدد چوٹیں آئیں لیکن انہیں گردن میں گولی لگنے کے بارے میں کچھ یاد نہیں۔

چینی شہری کا خیال ہے کہ یہ گولی اسے 1944 میں اس وقت لگی ہوگی جب وہ جنگ کے دوران اپنے ایک زخمی ساتھی کی جان بچانے کے لیے اسے دریا پار کروانے کی کوشش کر رہا تھا اور اس کوشش کے دوران وہ خود بھی گولی سے زخمی ہوگیا تھا-

گولی مبینہ طور پر ناک کے بائیں جانب سے اندر گئی، اس کے اوپری جبڑے کو سوراخ کرتی ہوئی اور گردن میں داخل ہونے سے پہلے اس کے دانتوں سے باہر نکل گئی- تاہم یہ سب سے اس چینی شہری کا ایک صرف اندازہ ہی ہے-

ایکسرے کا معائنہ کرنے کے بعد، ڈاکٹروں نے چینی شہری اور اس کے اہل خانہ کو بتایا کہ گولی خون کی کچھ بڑی شریانوں کے قریب ہے اور چونکہ اس سے انہیں کوئی پریشانی بھی نہیں ہورہی، تو اس لیے اس گولی کو نکالنے سے زیادہ بہتر ہے کہ اندر ہی رہنا دیا جائے۔