ٹھہریے اسے پھینکیے مت٬ چند غذائیں جنہیں ایکسپائری ڈیٹ گزرنے کے بعد بھی کھایا جاسکتا ہے

میعاد ختم ہونے کی تاریخ یا عام لفظوں میں ایکسپائری ڈیٹ یہ جاننے کا ایک اچھا طریقہ ہے کہ آیا کوئی چیز اب استعمال کے لیے محفوظ ہے یا نہیں، کچھ اشیاء کے لیے ایکسپائری ڈیٹ کا اصول واقعی بہت سخت ہوتا ہے کہ ان اشیاﺀ کو ایکسپائری ڈیٹ گزرنے کے بعد ہرگز استعمال نہ کیا جائے جیسے کہ دوائیں۔ لیکن چند مخصوص غذاؤں کے بارے میں یہ ایکسپائری ڈیٹ کسی حد تک لچکدار ثابت ہوتی ہے لیکن اس کی بنیادی شرط یہ ہے ان غذاؤں کو مناسب طریقے سے محفوظ کیا گیا ہو- بہت سی خوراکیں ایسی ہیں جنہیں محفوظ طریقے سے رکھنے کے بعد بھی ان کی میعاد ختم ہونے کے باوجود کھایا جا سکتا ہے۔ لیکن اس بات کو ذہن میں رکھیں کہ آپ کی آنکھیں اور ناک اب بھی یہ چیک کرسکتی ہیں کہ آیا کوئی پروڈکٹ اب بھی کھانے کے لیے اچھی ہے یا نہیں۔ مندرجہ ذیل میں چند ایسی ہی اشیاﺀ موجود ہیں جن کی فہرست بین الاقوامی ویب سال ایم ایس این نے جاری کی ہے-

ڈبے میں بند اشیا

زیادہ تر ڈبے میں بند اشیا کی میعاد ختم ہونے کی مخصوص تاریخ ہوتی ہے جو انہیں محفوظ کیے جانے کے تقریباً تین سال بعد کی ہوتی ہے، لیکن جب تک کہ کین پر کوئی ڈینٹ یا زنگ نہ ہو، اور انہیں ٹھنڈی جگہ پر محفوظ کیا گیا ہو، وہ کھانے کے لیے محفوظ رہتی ہیں۔

انڈے

انڈے ایسی چیز ہیں جو ہر گھر میں استعمال ہوتے ہیں اس لیے یہ زیادہ دیر کم ہی بچ پاتے ہیں- لیکن اگر آپ کسی انڈے کی جانچ کرنا چاہتے ہیں کہ وہ کھانے کے قابل ہے بھی یا نہیں تو اسے ایک گلاس میں پانی میں ڈال دیجیے- اگر انڈہ اس پانی میں ڈوب جاتا ہے تو استعمال کرلیں اور اگر اوپر تیرنا شروع کر دے تو پھینک دیں-

پاستا

یوں تو خشک پاستا کی زندگی ڈبوں پر صرف ایک یا دو سال کی درج ہوتی ہے لیکن چونکہ اس میں پانی نہیں ہوتا تو یہ اس سے زیادہ بھی چل سکتا ہے- اس کی زندگی کو طویل کرنے کے لیے ضروری ہے کہ پاستا کو کسی خشک اور ٹھنڈی جگہ پر رکھا جائے-

مکھن

دکاندار کے لیے بہتر تو یہ ہوتا ہے کہ چھوٹے مکھن فروخت کرے تاکہ اس کے خراب ہونے سے پہلے ہی یہ ختم ہوجائیں- لیکن فریج یا فریزر میں رکھا ہوا مکھن اس کی ایکسپائری کے بعد بھی اس وقت تک قابلِ استعمال ہوتا ہے جب تک کہ اس میں سے بدبو نہ آنا شروع ہوجائے-

چپس

چپس تھوڑی سی باسی ہو سکتی ہیں اگر آپ ان کی میعاد ختم ہونے کی تاریخ گزر گئی ہے تو، لیکن وہ اب بھی کھانے کے لیے بالکل محفوظ ہیں۔ اگر چپس کے بیگ کو مضبوطی سے بند کیا جاتا ہے تو یا پھر وہ مکمل طور پر سیل ہے تو مزید چند ہفتوں کے لیے اس میں موجود چپس کو استعمال کیا جاسکتا ہے۔

چاکلیٹ

آپ نے اپنی چاکلیٹ پر ایک سفید نشان ضرور دیکھا ہوگا، لیکن پریشان نہ ہوں، یہ کوئی خرابی نہیں ہے سے چاکلیٹ بلوم کے نام سے جانا جاتا ہے۔ جب تک آپ چاکلیٹ کو ٹھنڈی جگہ پر رکھتے ہیں، اس سے لطف اندوز ہونا آپ کے لیے بالکل محفوظ ہوتا ہے۔

جام

جام میں بہت زیادہ چینی ہوتی ہے جو اسے محفوظ رکھنے میں مدد دیتی ہے اور اس کی ایکسپائری ڈیٹ کے بعد بھی اسے کھانے کے لیے محفوظ رکھتی ہے۔ جب تک کہ آپ اسے غلط یا کسی اور چیز میں استعمال کیے گئے چمچ سے آلودہ نہیں کرتے ہیں-