|
ازدواجی تعلق خدائی منصوبہ اور فطری عمل ہے، ازدواجی
تعلقات میں اصل پیار اور محبت ہے جو میاں بیوی کے مابین خوشگوار ذہنی حالت
اور کیفیت کا باعث ہوتا ہے۔ لیکن اگر میاں بیوی کے درمیان ناچاقی، نفرت اور
ناخوشگوار کیفیت ہو جائے تو اس کا حل بھی پیش کرتا ہے۔
حق عربی زبان کا مفرد لفظ ہے، اس کے معنی فرد یا جماعت کا واجب حصہ ہوتا
ہے، اس کی جمع حقوق آتی ہے۔
اسلام كا ایک نماياں وصف یہ ہے کہ اس میں انسانی زندگی کے ہرمسئلے کےبارے
میں رہنمائی دی گئی ہے ۔حتی کہ مردوعورت کے جنسی تعلقات کےبارےمیں بھی اہم
ہدایات عطاکی گئی ہیں۔
ﷲ پاک نے شوہروں کو بیویوں پر حاکم بنایا ہے اور بہت بڑی بزرگی دی ہے۔ اس
لئے ہر عورت پر فرض ہے کہ وہ اپنے شوہر کا حکم مانے اور خوشی خوشی اپنے
شوہر کے ہر حکم کی تابعداری کرے۔
اپنے شوہر کو راضی و خوش رکھنا بہت بڑی عبادت ہے اور شوہر کو نا خوش اور
ناراض رکھنا بہت بڑا گناہ ہے۔ رسول اﷲ ﷺ نے فرمایا کہ ”اگر میں خدا کے سوا
کسی دوسرے کے لئے سجدہ کرنے کا حکم دیتا تو میں عورتوں کو حکم دیتا کو وہ
اپنے شوہروں کو سجدہ کیا کریں۔
رسول اﷲ ﷺ نے یہ بھی فرمایا ہے کہ ”جس عورت کی موت ایسی حالت میں آئے کہ
مرتے وقت اس کا شوہر اس سے خوش ہو وہ عورت جنت میں جائے گی۔
اور یہ بھی فرمایا کہ ”جب کوئی مرد اپنی بیوی کو کسی کام کے لئے بلائے تو
وہ عورت اگر چہ چولھے کے پاس بیٹھی ہو اس کو لازم ہے کہ وہ اٹھ کر شوہر کے
پاس چلی آئے۔
رسول اﷲ ﷺ نے عورتوں کو یہ بھی حکم دیا کہ ”اگر شوہر اپنی عورت کو یہ حکم
دے کہ پیلے رنگ کے پہاڑ کو کالے رنگ کا بنادے اور کالے رنگ کے پہاڑ کو سفید
بنادے تو عورت کو اپنے شوہر کا یہ حکم بھی بجا لانا چاہے۔
رسول اﷲ ﷺ کا یہ بھی فرمان ہے کہ ”شوہر بیوی کو اپنے بچھونے پر بلائے اور
عورت آنے سے انکار کردے اور اس کا شوہر اس بات سے ناراض ہو کر سورہے تو رات
بھر خدا کے فرشتے اس عورت پر لعنت کرتے رہتے ہیں۔
عورت بغیر اپنے شوہر کی اجازت کے گھر سے باہر کہیں نہ جائے نہ اپنے رشتہ
داروں کے گھر نہ کسی دوسرے کے گھر۔
شوہر کی غیر موجودگی میں عورت پر فرض ہے کہ شوہر کے مکان اور مال و سامان
کی حفاظت کرے اور بغیر شوہر کی اجازت کسی کو بھی نہ مکان میں آنے دے نہ
شوہر کی چھوٹی بڑی چیز کسی کو دے۔
شوہر کا مکان اور مال و سامان یہ سب شوہر کی امانتیں ہیں اور بیوی ان سب
چیزوں کی امین ہے اگر عورت نے اپنے شوہر کی کسی چیز کو جان بوجھ کر برباد
کردیا تو عورت پر امانت میں خیانت کرنے کا گناہ لازم ہوگا اور اس پر خداکا
بہت بڑا عذاب ہوگا۔
عورت ہر گز ہر گز کوئی ایسا کام نہ کرے جو شوہر کو ناپسند ہو۔
بچوں کی نگہداشت ‘ ان کی تربیت اور پرورش خصوصاََ شوہر کی غیر موجودگی میں
عورت کے لئے بہت بڑا فریضہ ہے۔
عورت کو لازم ہے کہ مکان اور اپنے بدن اور کپڑوں کی صفائی ستھرائی کا خاص
طور پر دھیان رکھے۔ پھوہڑ میلی کچیلی نہ بنی رہے بلکہ بناؤ سنگھار سے رہا
کرے تاکہ شوہر اس کودیکھ کر خوش ہو جائے۔
حدیث شریف میں ہے کہ ”بہترین عورت وہ ہے کہ جب شوہر اس کی طرف دیکھے تو وہ
اپنے بناؤ سنگھار اور اپنی اداؤں سے شوہر کا دل خوش کردے اور اگر شوہر کسی
بات کی قسم کھا جائے تو وہ اس قسم کو پوری کردے اور اگر شوہر غائب رہے تو
وہ اپنی ذات اور شوہر کے مال میں حفاظت اور خیر خواہی کا کردار ادا کرتی
رہے۔
ازدواجی زندگی ایک اہم زندگی ہوتی ہے، اس میں زوجین، خاندان، گھر اور سماج
کے تئیں بے شمار ذمہ داریاں عائد ہوتی ہیں۔ میاں بیوی کے درمیان تعلقات
خوشگوار رکھنے کی ہر ممکن کوشش کرنی چاہیے، ان کی علیحدگی سے بے شمار مسائل
میدا ہوتے ہیں، خصوصا اولاد پر برا اثر پڑتا ہے۔
پیغمبر اسلام محمد صلی اللہ علیہ وآلہ وسلم اس پر بہت توجہ دیتے تھے۔ شوہر
کے بیوی پر حقوق درج ذیل ہیں:
مالی حقوق
مہر
نفقہ
رہائش
غیر مالی حقوق
عدل و انصاف
حسن سلوک
ایذا رسانی سے بچنا
مہر:
ایک اسلامی اصطلاح ہے جو شادی کے وقت مرد کی طرف سے عورت کے لیے مخصوص کی
جاتی ہے۔ مہر شادی کا ایک لازمی جزو ہے۔ حق مہر ادا نہ کرنے کی نیت سے نکاح
کرنے پر حدیث میں سخت وعید ہے کہ ایسے مرد و عورت قیامت کے روز زانی و
زانیہ اُٹھیں گے۔ یہ عورت کو بطور اکرام اور واجب حق کے دی جاتی ہے۔ اگر
مہر کی مقدار کو نکاح کے عقد میں متعین نہیں کی گیا تو بھی مہر مثل یعنی
عورت کی خاندانی مہر واجب ہوگی۔
رہائش:
یہ بھی بہت اہم حق ہے۔ یعنی شوہر پر اپنی استطاعت اور قدرت کے اعتبار سے
رہائش کا انتظام کرنا واجب ہے۔
نفقہ:
یعنی بیوی کے اخراجات۔ علمائے اسلام کا اتفاق ہے کہ بیویوں کے اخراجات ان
کے شوہروں پر واجب ہیں جب تک بیویاں ان کے حق میں ہیں، اگر بیوی شوہر سے
جدا ہو جائے تو شوہر پر نفقہ ضروری نہیں ہوگا۔ نفقہ کی حکمت یہ ہے کہ بیوی،
نکاح کے عقد کے ذریعہ شوہر کی ملکیت اور اختیار میں ہو جاتی ہے، حتی کہ
بیوی کا کمانے کی غرض سے شوہر کی اجازت کے بغیر باہر نکلنا بھی درست نہیں
ہے۔ لہذا شوہر پر اس کی استطاعت کے مطابق بیوی کے اخراجات واجب ہیں گرچہ
بیوی بذات خود دولت مند ہو۔
بیوی اگر شوہر کی اجازت سے کچھ کماتی ہے تو بیوی پر لازم نہیں ہوگا کہ وہ
گھر کے اخراجات میں خرچ کرے، البتہ وہ اپنی جانب سے تبرعاً کر سکتی ہے۔
عدل وانصاف:
شوہر پر اپنی بیویوں کے درمیان نفقہ، رہائش اور لباس وغیرہ میں انصاف کرنا
ضروری ہے۔
ایذا رسانی سے بچنا:
یہ تو اسلام کی بنیادی تعلیم ہے، اسلام نے دوسروں کو ایذا رسانی سے منع کیا
ہے، تو بیوی پر ایذا رسانی بدرجہ اولی حرام ہے۔ عبادہ بن صامت نے فرمایا کہ
رسول اللہ صلی اللہ علیہ وآلہ وسلم نے فیصلہ فرمایا کہ نقصان اٹھانا اور
پہنچانا دونوں منع ہے۔
حسن سلوک:
بیوی کے ساتھ حسن سلوک کرنا، اس کے حقوق کو ادا کرنا اور اس کی جائز
خواہشات کی رعایت کرنا، شوہر پر ضروری ہے۔ اسلام نے عورتوں کے ساتھ حسن
سلوک کی جابجا تعلیم اور تاکید کی ہے۔ سورہ نسا میں تفصیل سے حسن سلوک اور
رعایات کا بیان ہے۔
اسی طرح صحابی عمرو بن اخوص سے روایت ہے کہ حجۃ الوداع کے موقع پر رسول
اللہ صلی اللّٰہ علیہ وآلہ وسلم نے حمد وثنا کے بعد وعظ فرمایا، اس میں
فرمایا کہ:
” کہ عورتوں کے ساتھ ضرور حسن سلوک کا معاملہ کیا کرو، کیونکہ وہ تمھارے
مقابلہ میں کمزور ہیں، تمھیں کوئی حق نہیں کہ ان کے ساتھ سختی کرو سوائے اس
کے کہ وہ کھل کر فحش کام کریں، اگر وہ ایسا کرتی ہیں تو ان کے بستر کو الگ
کر دو، اور ان پر ظلم نہ کرتے ہوئے کچھ مارو۔ اور اگر وہ تمھاری
فرمانبرداری کرتی ہیں تو تمھیں ان پر سختی کرنے کا کوئی حق نہیں ہے۔
حوالہ جات[−]
حوالہ جات
↑1 جامع الترمذی، کتاب الرضاع (۱۰)باب ماجاء فی حق الزوج علی المرأۃ ، رقم
۱۱۶۲،ج۲،ص۳۸۶
↑2 سنن ابن ماجہ، کتاب النکاح ،۴۴۔باب حق الزوج علی المرأۃ ، رقم
۱۸۵۴،ج۲،ص۴۱۲
↑3 جامع الترمذی ، کتاب الرضاع، باب ماجاء فی حق الزوج علی المرأۃ (ت:۱۰)
رقم ۱۶۶۳،ج۲،ص۳۸۶
↑4 سنن ابن ماجہ ، کتاب النکاح ، ۴/۴۔باب حق الزوج علی المرأۃ ، رقم
۱۸۵۲،ج۲،ص۴۱۱
↑5 صحیح مسلم، کتاب النکاح ، باب تحریم امتناعھا من فراش زوجھا، رقم
۱۴۳۶،ص۷۵۳
↑6 سنن ابن ماجہ ، کتاب النکاح، باب فضل النساء ، رقم ۱۸۵۷،ج۲،ص۴۱۴
|