|
ابھی حال ہی میں چین میں ورلڈ انٹرنیٹ کانفرنس 2024 ووچین
سمٹ کا انعقاد کیا گیا۔ جس کا موضوع "عوام پر مرکوز اور بہتر ڈیجیٹل مستقبل
کے لئے مصنوعی ذہانت کو اپنانا - سائبر اسپیس میں مشترکہ مستقبل کی حامل
ایک کمیونٹی کی تعمیر" رہا۔سمٹ میں گلوبل ڈیولپمنٹ انیشی ایٹو، ڈیجیٹل
اکانومی اور ڈیٹا گورننس جیسے موضوعات پر کل 24 ذیلی فورمز کے ساتھ ساتھ
دیگر سرگرمیوں کے ایک جامع سلسلے کا اہتمام کیا گیا۔ ووچین سمٹ 2014 سے ،
لگاتار 10 سالوں سے منعقد ہو رہی ہے۔ اس مرتبہ ورلڈ انٹرنیٹ کانفرنس میں چھ
براعظموں کے 30 سے زائد ممالک اور خطوں سے تعلق رکھنے والے تقریباً 170
ادارے، تنظیمیں، کمپنیاں اور ماہرین شریک رہے۔
اس میں کوئی شک نہیں کہ مصنوعی ذہانت اور ڈیجیٹل ٹیکنالوجی میں چین کی تیز
رفتار ترقی اس کے اپنے منظر نامے کو تبدیل کر رہی ہے اور دنیا کے لیے فوائد
لا رہی ہے۔ ورلڈ انٹرنیٹ کانفرنس جدید اختراعات کے ساتھ ساتھ نئی پیشرفتوں
کو چلانے والی چینی مہارت کو بھی ظاہر کرتی ہے۔ مصنوعی ذہانت اور ڈیجیٹل
ٹیکنالوجی کی بدولت چین میں صحت کی دیکھ بھال، ماحولیاتی استحکام، عالمی
مواصلات اور معاشی ترقی جیسے شعبوں میں پیش رفت ہو رہی ہے۔ چین کا ڈیجیٹل
انقلاب زیادہ مربوط، موثر اور خوشحال مستقبل میں حصہ ڈال رہا ہے۔یہی وجہ ہے
کہ ورلڈ انٹرنیٹ کانفرنس میں، بین الاقوامی ماہرین اس تکنیکی اضافے کے مثبت
اثرات کے بارے میں اپنے براہ راست تجربات کا اشتراک کرتے ہیں.
ورلڈ انٹرنیٹ کانفرنس ووچین سمٹ کے دوران لائٹ آف انٹرنیٹ ایکسپو مرکزی
حیثیت کی حامل سرگرمی رہی۔اس ایکسپو میں مصنوعی ذہانت کی عمدگی سے نمائش کی
گئی ۔ایکسپو میں تازہ ترین پیش رفت کو ظاہر کرنے کے لئے مخصوص مصنوعی ذہانت
کے تجرباتی زون اور انسان نما روبوٹ نمائشی زون قائم کیے گئے۔ایک انسان نما
روبوٹ ، متعدد اپ گریڈ کے بعد نمائش کنندہ کی جانب سے پیش کردہ تازہ ترین
مصنوعات میں شامل رہا۔یہ جدید انداز سے نقل اور مضبوط سیکھنے کی خصوصیات
رکھتا ہے۔ یہ روبوٹ آسانی سے چل سکتا ہے ، دوڑ سکتا ہے ، اور یہاں تک کہ
رقص بھی کرسکتا ہے ، جس سے یہ صنعتی ایپلی کیشنز اور روزمرہ زندگی کے
منظرنامے میں استعمال کے لئے ورسٹائل انتخاب بن سکتا ہے۔خوبصورت چینی
روایتی ملبوسات میں ملبوس ایک اور انسان نما روبوٹ نے ایکسپو میں رقص کا
مظاہرہ کیا ، جس نے مہمانوں کی بڑی تعداد کو اپنی طرف متوجہ کیا۔ روبوٹ کو
لوگوں کے نازک تاثرات جیسے پلک جھپکنے اور حرکت پذیر آنکھوں کی عکاسی کرنے
کے لئے ڈیزائن کیا گیا ہے۔ ڈیزائنرز نے کہا کہ اسے عجائب گھروں اور قدرتی
علاقوں میں ٹور گائیڈ کے طور پر استعمال کیا جاسکتا ہے۔
مجموعی طور پر 665 ملکی اور بین الاقوامی نمائش کنندگان نے آن لائن اور آف
لائن چینلز کے ذریعے نمائش میں حصہ لیا ، جس میں جدید ترین ٹیکنالوجیز اور
مصنوعی ذہانت کے الگورتھم، ذہین منسلک گاڑیاں اور کم اونچائی والی معیشت
جیسے شعبوں میں جدید ترین ایپلی کیشنز کی نمائش کی گئی۔ایکسپو میں نئی
مصنوعات اور ٹیکنالوجیز کی 100 سے زائد لانچنگ تقریبات بھی شامل رہین، جو
ایکسپو کی تاریخ میں سب سے زیادہ تعداد ہے۔
اسمارٹ ٹیکنالوجی میں کامیابیاں نہ صرف ایکسپو میں نمائش کے دوران اجاگر کی
گئیں بلکہ اس سال اُن کا عملی استعمال بھی شامل رہا۔پہلی بار روبوٹک کتوں،
بغیر پائلٹ کی کشتیوں اور آٹو پائلٹ گاڑیوں پر مشتمل اسمارٹ پولیس گشتی ٹیم
تعینات کی گئیں۔ یہ آلات سیڑھیاں چڑھ سکتے ہیں، دشوار گزار علاقوں کو
نیویگیٹ کرسکتے ہیں، اور قانون نافذ کرنے والے آپریشنز کو موثر طریقے سے
اسپورٹ کرنے کے لئے مختلف جدید اسمارٹ سسٹم سے لیس ہیں۔ممکنہ مواصلاتی
لہروں سے نمٹنے کے لئے ، ووچین نے اس سال پورے واٹر ٹاؤن میں کم تاخیر والے
5 جی ۔اے نیٹ ورک کو نافذ کیا۔یہ نیٹ ورک مصنوعی ذہانت اور سینسنگ
ٹیکنالوجیز کو مربوط کرتا ہے ، جس سے متعدد نئے اسمارٹ ایپلی کیشن
منظرناموں کو لانچ کرنے کے قابل بنایا جاتا ہے۔
اس اہم عالمی سرگرمی کے دوران شرکاء نے اتفاق کیا کہ انسانی فلاح و بہبود
کو بہتر بنانے کے مقصد سے مصنوعی ذہانت کی ترقی نہایت اہم ہے ۔ اس کوشش میں
سماجی تحفظ، انسانی حقوق کے احترام، مشترکہ عالمی اقدار اور مصنوعی ذہانت
کے حوالے سے عوام پر مبنی، اخلاقی نقطہ نظر کو ترجیح دی جانی چاہیے۔
|