|
چین کی جانب سے حال ہی میں موسمیاتی تبدیلی سے نمٹنے کے لئے ملک کی
پالیسیوں اور اقدامات پر ایک رپورٹ جاری کی گئی ہے۔ رپورٹ میں 2023 کے بعد
سے موسمیاتی تبدیلی سے نمٹنے میں چین کی پیش رفت اور کامیابیوں کا جامع
خلاصہ پیش کیا گیا ہے۔رواں سال موسمیاتی تبدیلی سے متعلق اقوام متحدہ کے
فریم ورک کنونشن (یو این ایف سی) کے نفاذ کی 30 ویں سالگرہ ہے۔دیکھا جائے
تو چین نے حالیہ برسوں کے دوران موسمیاتی تبدیلی سے نمٹنے کو اعلیٰ ترجیح
دی ہے ، ملک یو این ایف سی میں شامل ہونے والے اولین فریقوں میں سے ایک ہے
اور پیرس معاہدے پر دستخط اور توثیق کرنے والے ابتدائی ممالک میں سے ایک ہے۔
چین نے اپنی قومی سطح پر طے شدہ شراکت کو جامع طور پر آگے بڑھانے کے لئے
متعدد اقدامات کیے ہیں اور مثبت نتائج حاصل کیے ہیں۔ملک نے کاربن کی شدت کو
کم کرنے کے لیے مسلسل کام کیا ہے۔ 2023 میں غیر فوسل انرجی کل توانائی کی
کھپت کا 17.9 فیصد تھی جبکہ کوئلے کا تناسب 2013 میں 67.4 فیصد سے کم ہو کر
55.3 فیصد رہ گیا۔جنگلات کے ذخائر کا حجم 19.493 بلین مکعب میٹر تک پہنچ
گیا ، جو 2005 کے مقابلے میں 6.5 بلین مکعب میٹر کا اضافہ ہے۔اس سال جولائی
کے آخر تک ہوا اور شمسی توانائی کی کل نصب شدہ صلاحیت 1.206 بلین کلو واٹ
تک پہنچ گئی ، جو 2020 کے آخر کے مقابلے میں 2.25 گنا زیادہ ہے ، جس نے
مقررہ وقت سے چھ سال پہلے اپنا ہدف حاصل کیا ہے۔
چین کی قومی کاربن ٹریڈنگ مارکیٹ دوہرے کاربن اہداف کے حصول میں ایک اہم
پالیسی ٹول کے طور پر کام کرتی ہے۔جولائی 2021 میں شروع ہونے کے بعد سے ،
قومی کاربن ٹریڈنگ مارکیٹ نے مستحکم ترقی کا مظاہرہ کیا ہے ، جس میں مجموعی
تجارتی حجم تقریباً 500 ملین ٹن کاربن الاؤنسز اور مجموعی لین دین 29.7
بلین یوآن (4.11 بلین ڈالر) تک پہنچ گیا ہے۔ مارکیٹ نے آہستہ آہستہ کاربن
کی قیمتوں میں اضافے کے ساتھ مستحکم آپریشن دکھایا ہے۔
اس سال مئی میں ، چینی حکومت نے ایک متحد کاربن فٹ پرنٹ مینجمنٹ سسٹم کی
تعمیر اور نفاذ کے لئے ایک منصوبہ جاری کیا ، جو واضح طور پر کاربن فٹ پرنٹ
مینجمنٹ سسٹم کی تعمیر کے مقاصد کی وضاحت کرتا ہے۔موسمیاتی تبدیلی سے نمٹنے
کے لیے چین کی پالیسیوں اور اقدامات سے متعلق رپورٹ کے مطابق نیشنل کلائمیٹ
چینج ایڈاپٹیشن اسٹریٹجی 2035 پر کامیابی سے عمل درآمد کیا جا رہا ہے۔حکومت
نے ملک بھر میں 39 شہروں کو بہتر آب و ہوا سے مطابقت پذیر شہر کی ترقی کے
لئے پائلٹ سائٹس کے طور پر نامزد کیا ہے ، جو آب و ہوا سے مطابقت پذیر
شہروں کے لئے ترقی کے راستوں اور ماڈلز کو فعال طور پر تلاش کرتے ہیں۔
چین نے فعال طور پر عالمی آب و ہوا کی حکمرانی میں شمولیت اختیار کی ہے اور
اس کی قیادت کی ہے۔ موسمیاتی تبدیلی کے فریم ورک پر جنوب۔جنوب تعاون کے
ذریعے، چین نے طویل عرصے سے دیگر ترقی پذیر ممالک، خاص طور پر چھوٹے جزیرہ
نما ممالک، کم ترقی یافتہ ممالک اور افریقی ممالک کو آب و ہوا سے نمٹنے کی
کوششوں میں مدد فراہم کی ہے.چین نے 42 ترقی پذیر ممالک کے ساتھ جنوب۔جنوب
آب و ہوا تعاون پر 53 مفاہمتی یادداشتوں پر دستخط کیے ہیں۔ اس تعاون میں کم
کاربن کے مظاہرے والے علاقوں کا قیام، تخفیف اور موافقت کے منصوبوں کو
انجام دینا اور ان ممالک کی آب و ہوا سے نمٹنے کی صلاحیتوں کو مضبوط بنانے
کے لئے تبادلے کی ورکشاپس کا انعقاد شامل ہے۔
آب و ہوا سے جڑے بین الاقوامی چیلنجز کے حل میں موسمیاتی فنانس کثیر الجہتی
پیش رفت کی کلید ہے. کاپ 29 اجلاس میں، فریقین سے یہ امید وابستہ کی گئی ہے
کہ وہ 2025 کے بعد کی مدت کے لئے عالمی موسمیاتی مالیاتی اہداف اور متعلقہ
انتظامات کو حتمی شکل دیں گے۔اس ضمن میں چین پیرس معاہدے کے اصولوں، شقوں
اور مینڈیٹ کو برقرار رکھنے کی وکالت کرتا ہے ۔چین کے نزدیک ترقی یافتہ
ممالک کو اپنے مالی وعدوں کو پورا کرنا چاہئے اور فنڈز کو متحرک کرنے میں
قائدانہ کردار جاری رکھنا چاہئے ، جبکہ رضاکارانہ عطیات کی بھی حوصلہ
افزائی کی جانی چاہئے۔
چین کی جانب سے تمام علاقائی اور عالمی پلیٹ فارمز پر یہ عزم ظاہر کیا گیا
ہے کہ وہ موسمیاتی تبدیلی کے چیلنجوں سے مشترکہ طور پر نمٹنے، پیرس معاہدے
کے جامع اور موثر نفاذ کی حمایت کرنے اور منصفانہ، معقول اور باہمی طور پر
فائدہ مند عالمی ماحولیاتی حکمرانی کے نظام کے قیام کو فروغ دینے کے لئے
تمام فریقوں کے ساتھ تبادلے اور تعاون کو بڑھانے کا خواہاں ہے۔
|