چین کے جشن بہار کا حقیقی عالمگیر پیغام

رواں سال کا جشن بہار یونیسکو کے انسانیت کے غیرمادی ثقافتی ورثے کی نمائندہ فہرست میں شمولیت کے بعد پہلا فیسٹیول ہے۔ دنیا بھر میں چینی جشن بہار کے حوالے سے منائی جانے والی متنوع تقریبات اس ثقافتی رجحان کی وسیع عالمی کشش کو واضح طور پر ظاہر کرتی ہیں۔اقوام متحدہ کے نزدیک چین کا جشن بہار جو ملک میں خاندانی ملاقاتوں اور جشن کا وقت ہے ،اب ایک عالمی جشن میں تبدیل ہوگیا ہے ، جس میں چینی تہذیب کی اپیل شامل ہے اور یہ فیسٹیول امن ، ہم آہنگی اور خوشحالی کی اقدار کی یاد دلاتا ہے۔

چین کا جشن بہار اس وقت تقریباً 200 ممالک اور خطوں میں منایا جاتا ہے ، تقریباً 20 ممالک نے اسے سرکاری تعطیل کے طور پر نامزد کیا ہے۔ ہر سال، عالمی آبادی کا تقریباً پانچواں حصہ اس عظیم جشن میں حصہ لیتا ہے.

ہنگری کے دارالحکومت بوڈاپیسٹ میں چائنا ٹاؤن کی سڑکیں جشن بہار کی تقریبات سےسج اٹھیں۔ مہمانوں نے ڈمپلنگ، خطاطی اور لالٹین کرافٹنگ میں حصہ لیا۔سعودی عرب نے حال ہی میں ریاض کے کلچرل پیلس میں اپنی نوعیت کے منفرد جشن بہار مارکیٹ کی میزبانی کی ۔پاکستان میں بھی جشن بہار کی مختلف سرگرمیوں سمیت اہم عمارتوں پر چین کے جشن بہار کا سرخ رنگ چھایا رہا۔اسی طرح امریکہ ،برطانیہ ، روس، تھائی لینڈ، قبرص سمیت کئی ممالک میں جشن بہار سے متعلق دلچسپ تقریبات کا اہتمام کیا گیا جن میں چینی شہریوں سمیت مقامی باشندوں نے بھی بڑھ چڑھ کر حصہ لیا۔

حقیقی معنوں میں چین کا جشن بہار خوشی، ہم آہنگی اور خاندانی اتحاد کا جشن ہے، جس میں آج تمام انسانیت شریک ہے۔ اس جشن بہار کی گونج دنیا بھر میں سنائی دے رہی ہے ، جو مختلف ثقافتی پس منظر سے تعلق رکھنے والے لوگوں کے لئے گرمجوشی اور خوشی لاتی ہے۔چینی عوام کے دلوں کو دنیا کے لوگوں سے جوڑنے والے ایک قیمتی ربط کے طور پر کام کرنے والا یہ تہوار باہمی تفہیم کو فروغ دے رہا ہے اور حقیقی معنوں میں عالمی جشن کے طور پر اپنی ساکھ کو مزید مستحکم کر رہا ہے۔

ماہرین کے نزدیک قمری نیا سال سانپ کے سال کے آغاز کی علامت ہے، جو دانشمندی، احتیاط اور حکمت عملی جیسی خصوصیات سے وابستہ ہے، اور تبدیلی اور ترقی کی علامت ہے۔اس ضمن میں دنیا کو درپیش بے شمار چیلنجز کے پیش نظر قمری نئے سال کا جذبہ امید اور مثبت سوچ کی کرن فراہم کرتا ہے۔

جشن بہار کی عالمی مقبولیت بھی چین کی "کامیابی کی کہانی" کی اپیل کا ثبوت ہے۔ گزشتہ چند دہائیوں میں چین کی قابل ذکر اقتصادی ترقی اور سماجی ترقی نے اسے دنیا کی دوسری سب سے بڑی معیشت بنا دیا ہے۔ دنیا بھر کے لوگ چین کی خوشحال ثقافت کو تلاش کرنے اور اس کی کامیابی کے پیچھے بنیادی اقدار کو سمجھنے کی کوشش کرتے ہیں۔اس تناظر میں جشن بہار چینی فلسفے اور اقدار کو روشن انداز میں پیش کرتا ہے اور قوم کے مشترکہ وژن کے بارے میں بصیرت فراہم کرتا ہے۔

یہ ایک حقیقت ہے کہ ثقافت پائیدار روابط تخلیق کرنے، رواداری کو فروغ دینے اور تقسیم کے درمیان پل تعمیر کرنے میں مدد کرتی ہے. جب ایک دوسرے کی روایات کا اشتراک کیا جاتا ہے تو اپنی مماثلت اور اپنے اختلافات دونوں کا جشن منایا جاتا ہے ۔اس ضمن میں چین کا جشن بہار لوگوں کو جوڑنے والا ایک پل ہے . اس طرح کے تہوار ممالک کے درمیان گہری تفہیم اور دوستی کو فروغ دینے میں واقعی اہم ہیں۔

یہ بھی ایک حقیقت ہے کہ چین کا بنی نوع انسان کے ہم نصیب سماج کی تعمیر کا وژن جشن بہار کی روح سے قریبی مطابقت رکھتا ہے۔ یہ تصور تمام انسانیت کے مستقبل اور تقدیر پر مرکوز ہے اور پائیدار امن، عالمگیر سلامتی اور مشترکہ خوشحالی کی ایک کھلی، جامع، صاف اور خوبصورت دنیا کی تعمیر کی وکالت کرتا ہے۔

چین کی جانب سے گلوبل سیکیورٹی انیشی ایٹو، گلوبل ڈیولپمنٹ انیشی ایٹو اور گلوبل سولائزیشن انیشی ایٹو کا تعارف آج کی دنیا میں امن اور ترقی کے موضوع اور اتحاد اور مشترکہ ترقی کے لئے تمام ممالک کے عوام کی امنگوں سے مطابقت رکھتا ہے۔ یہ تمام ممالک کے درمیان ہم آہنگی کو فروغ دینے کے لئے چین کے عزم کو ظاہر کرتا ہے۔ جشن بہار سے سامنے آنے والی گرم جوشی کی طرح، یہ اقدار بھی بین الاقوامی سطح پر ایک ذمہ دار بڑے ملک کے طور پر چین کے کردار کو ظاہر کرتی ہیں۔ یہ تینوں انیشی ایٹوز دنیا کو چینی ثقافت میں شامل جامعیت، دوستی اور جیت جیت نتائج پر مبنی اقدار کا صحیح معنوں میں تجربہ کرنے کی اجازت دیتے ہیں۔

آج کی دنیا میں، جہاں پیچیدگیاں اور چیلنجز بہت زیادہ ہیں، تہذیبوں اور ثقافتوں کے درمیان باہمی احترام اور تفہیم کو فروغ دینا غلط فہمیوں کو دور کرنے اور اختلافات کو دور کرنے کے لئے ضروری ہے.اس تناظر میں جشن بہار نہ صرف چینی ثقافت کی ایک پسندیدہ علامت ہے بلکہ دنیا بھر کے لوگوں کے لئے ایک مشترکہ روحانی خزانہ بھی ہے۔متنوع روایات کے امتزاج کے درمیان، انسانیت ہم آہنگی، خوشی اور بہتر زندگی کی عالمگیر تلاش میں متحد ہے ، جبکہ ایک زیادہ مربوط، متحرک اور امید افزا مستقبل کا تصور کرتی ہے۔ایسے میں جشن بہار سے چین کا پیغام بڑا واضح ہے کہ آئیے ہم سب کے لیے ایک بہتر مستقبل تخلیق کرنے کے لیے امید اور عزم کے ساتھ نئی شروعات کو اپنائیں۔