خلا سے دیکھے گئے 2011 کے اہم واقعات

سال 2011 اپنے اختتام کی جانب گامزن ہے اور اب اس میں چند دن ہی باقی ہیں- اس وقت اس سال میں رونما ہونے والے واقعات کی یادداشتوں کو محفوظ کیا جارہا ہے- یوں تو اس سال بہت سے واقعات رونما ہوئے لیکن ہم چند بڑے واقعات کا ذکر کر رہے ہیں- سنہ دو ہزار گیارہ میں رونما ہونے والے یہ وہ بڑے واقعات ہیں جن کو خلا سے دیکھا بھی گیا اور کیمرے کی آنکھ کے ذریعے محفوظ بھی کیا گیا۔
 

مصر کے دارالحکومت قائرہ میں التحریر سکوائر کی تصویر جو خلا سے گیارہ فروری کو لی گئی تھی۔ التحریر سکوائر حکومت مخالف احتجاج کا مرکز بنا جس کے نتیجے میں صدر حسنی مبارک کو مستعفی ہونا پڑا۔
 

یہ تصویر بارہ مارچ کو جاپان کے شہر نٹوری شہر کی ہے جہاں گیارہ مارچ کو آنے والے سونامی نے تباہی مچا دی تھی۔
 

یہ تصویر جاپان کی سیندائی بندرگاہ کی ہے جہاں سونامی کے بعد کنٹینرز بکھرے پڑے ہیں۔
 

یہ تصویر سونامی کے بعد جاپان کے فوکوشیما ایٹمی پلانٹ کی ہے جہاں تصویر لینے سے تین منٹ قبل ہی دھماکہ ہوا تھا۔
 

بائیں تصویر دو مئی کی ہے٬ یہ تصویر پاکستان کے شہر ایبٹ آباد میں اسامہ بن لادن کے کمپاؤنڈ میں امریکی ہیلی کاپٹر کے ملبے کی ہے۔ دائیں تصویر میں خلا سے لی گئی تصویر میں اس کمپاؤنڈ اور ملبے کی نشاندہی کی گئی ہے۔
 

گیارہ جون کو چلی میں آتش فشاں پہاڑ نے لاوا اگلا اور اس کے نتیجے میں دھوئیں کے بادل میلوں تک پھیل گئے۔
 

اکیس جولائی کو بین الاقوامی خلائی سٹیشن سے اٹلانٹس کی زمین پر واپسی کی تصویر۔
 

سپین کے کنیری جزیرے میں زیرِ سمندر آتش فشاں پھٹنے سے سبز رنگ کا مواد سمندر میں خلا سے صاف دکھائی دیا۔