برطانیہ میں لڑکیوں کا ایک معروف اسکول ’ ناکامی کا ہفتہ‘ منانے کی
تیاریاں کررہا ہے تاکہ طالبات کو خطرات کا سامنا کرنے، صدمے یا کمزوری سے
نمٹنے اور اپنی غلطیوں سے سیکھنے کی تربیت دی جاسکے۔
برطانیہ کے ومبلیڈن ہائی اسکول کی انتظامیہ کہتی ہے کہ ’ہفتہ ناکامی‘ کے
دوران اس بات پر زور ہوگا کہ خطرہ مول لینے سے گریز کرنے کے بجائے کوشش
کرنے کی اہمیت پر زور دیا جائے گا۔
’ہفتہ ناکامی‘ میں طالبات سے پوچھا جائے گا کہ جب وہ ناکام ہوتی ہیں تو
کیسا محسوس کرتی ہیں۔
اسکول کی ہیڈ مسٹریس ہیتھر ہینبری نے کہا کہ وہ یہ دکھانا چاہتی ہیں کہ
زندگی میں بعض دفعہ کامیاب نہ ہونا بالکل نارمل اور قابل قبول بات ہے۔ |
|
مس ہینبری کے اسکول کی طالبات برطانیہ میں نمایاں ترین مارکس حاصل کرتی رہی
ہیں لیکن پیر سے جب ناکامی کا ہفتہ منانے کا آغاز ہوگا تو ان طالبات کو
اپنی ناکامیوں پر توجہ دینے کے لیے کہا جائے گا۔
اسکول نے اس سلسلے میں طالبات کے لیے ورکشاپس، اسمبلیز اور دوسرے پروگرام
ترتیب دیے ہیں جن میں ان کے والدین اور اساتذہ بھی حصہ لیں گے اور اپنی
اپنی ناکامیوں کی داستانیں سنائیں گے۔
|
|
اسی طرح مشہور اور کامیاب افراد کے ویڈیو کلپس بھی چلائے جائیں گے جن کے
راستے میں ناکامیاں آئیں لیکن وہ آگے بڑھتے گئے۔
ہفتہ ناکامی کے دوران طالبات کے درمیان اس بات پر بحث و مباحثہ بھی کرایا
جائے گا کہ ناکامی کے فائدے کیا ہوتے ہیں اور یہ بھی کہ ناکامی سے بچنے کے
لیے بے تحاشہ کوشش کرنے کا منفی پہلو کیا ہوتا ہے۔
|