|
سیم سنگ نے گیلیکسی ایس 4 فون کا چھوٹا اور سستا روپ لانچ
کر دیا ہے جسے ایس 4 منی کا نام دیا گیا ہے۔ اس فون کی سکرین 4.3 انچ ہے جو
ایس 3 منی سے تھوڑی سی بڑی ہے۔ اس کے مقابلے پر ایس 4 کی سکرین پانچ انچ ہے۔
|
|
|
|
بی بی سی رپورٹ کے مطابق کمپنی اگلے ماہ ایک تقریب میں اس فون کو باقاعدہ
لانچ کرے گی، لیکن اس نے یہ نہیں بتایا کہ فون کب فروخت کے لیے پیش کیا
جائے گا۔
ایس 4 اپریل میں لانچ کیا گیا تھا، اور سیم سنگ کے مطابق اب تک ایک کروڑ
فون ایس 4 فون بک چکے ہیں۔
ایس 4 منی کی تفصیلات اس ہفتے کے آغاز میں انٹرنیٹ پر افشا ہو گئی تھیں۔
سیم سنگ کے لیے اب صارفین کو یہ باور کرانے کی ضرورت ہوگی کہ یہ ایس 4 کا
کمزور روپ نہیں ہے بلکہ اس کی اپنی اہمیت ہے۔ گذشتہ برس کمپنی نے جب ایس 3
متعارف کروایا تو اس پر تنقید کی گئی تھی کہ بڑے فون کے مقابلے پر بہت کم
طاقت والا فون ہے۔
|
|
|
ٹیکنالوجی کی خبروں کی ویب سائٹ گیگا او ایم نے ایس 3 منی کی لانچ کے موقعے
پر لکھا تھا: ’جن لوگوں کو امید تھی کہ ایس 3 منی بڑے فون کا چھوٹا روپ ہے،
انھیں مایوسی ہوئی ہوگی۔ یہ فون بجٹ مارکیٹ کے لیے ہے۔‘
ایک اور ویب سائٹ نے لکھا: ’اس قسم کے دوسرے فونوں کے مقابلے پر یہ بہت
مہنگا ہے۔‘
ایس 4 منی میں آٹھ میگاپکسل کیمرا ہے، جبکہ ایس 4 کا کیمرا 13 میگاپکسل کا
ہے۔ منی کا پروسیسر 1.7GHz ڈوئل کور ہے، جو ایک بار پھر ایس 4 سے کمزور ہے،
جس میں کواڈ کور پروسیسر ہے۔
تاہم موبائل کے تجزیہ کار نک ڈلینون کہتے ہیں کہ ہارڈویئر میں اس قسم کی
کمیاں سمجھ میں آتی ہیں:
’اس فون کا مقصد یہ ہے کہ بڑے فون کی کچھ خصوصیات کو ایسے صارفین تک
پہنچایا جائے جن کی اتنی ضروریات نہیں ہیں، اور جنھیں جدید ترین فیچرز کی
کوئی خاص خواہش نہیں ہے۔
|
|
|
وہ پروسیسر، سکرین اور میموری وغیرہ کو کاٹ کر قیمت کم کر رہے ہیں، لیکن
تجربہ وہی ہوگا (جو ایس 4 کا ہے۔)‘
سیم سنگ نے کہا ہے کہ گیلیکسی ایس 4 کے بہت سے سافٹ ویئر فنکشن منی میں بھی
دستیاب ہوں گے۔
ایس 4 سیم سنگ کے اس حکمتِ عملی کے تحت ایک اور قدم ہے جس میں صارفین کو
قسماقسم کی ڈیوائسز کے انتخاب کا موقع دیا جاتا ہے۔ اس کے مقابلے پر ایپل
کمپنی سال بھر میں صرف ایک آئی فون ہی متعارف کرواتی ہے۔
حال ہی میں ایپل کے سربراہ ٹم کک نے کہا کہ ان کی کمپنی بہت سی مصنوعات
جاری کرنے کا ارتکاز کھونا نہیں چاہتی۔ تاہم انھوں نے مستقبل میں آئی فون
کے مختلف روپ لانچ کرنے کے امکان کو رد نہیں کیا۔
’فون کو صحیح طریقے سے بنانے کے لے بہت کام کرنا پڑتا ہے، بہت سا تفصیلی
کام، جس میں ہارڈ ویئر اور سافٹ ویئر دونوں کو منظم کرنا پڑتا ہے۔
’ہم نے فیصلہ کیا ہے کہ ہم اپنی توانائیوں کو اس چیزوں کو درست طریقے سے
کرنے میں صرف کریں۔‘
تجزیہ کاروں کا اندازہ ہے کہ 20 جون کو ہونے والی تقریب میں سیم سنگ کی
تقریب میں گیلیکسی برانڈ کی اور مصنوعات بھی متعارف کرائے گا، جن میں ممکنہ
طور پر آپٹیکل زوم والا کیمرا شامل ہوگا، اور شاید ایک واٹر پروف فون بھی۔ |