فیس بک کے بانی کا پیج ہیک٬ ملازمتوں کی بھرمار

ايک بے روزگار فلسطينی نے فيس بک پر ايک ’پرائيوسی بگ‘ تلاش کرنے کے بعد اس ويب سائٹ کے بانی مارک زوکربرگ کا اکاؤنٹ ’ہيک‘ کر ڈالا۔ در اصل تيس سالہ خليل شريتھ فيس بک انتظاميہ سے پانچ سو ڈالر بطور انعام وصول کرنا چاہتا تھا۔
 

ڈی ڈبلیو ورلڈ کی رپورٹ کے مطابق فلسطين سے تعلق رکھنے والے تيس سالہ خليل شريتھ نے جب فيس بک کی ويب سائٹ پر ايک ’پرائيوسی بگ‘ يعنی ايک ايسی تکنيکی خامی کہ جس کے ذريعے کسی بھی شخص کے اکاؤنٹ تک رسائی حاصل ہو سکے، دريافت کر لی تو اس نے فوری طور پر فيس بک انتظاميہ سے رابطہ کيا۔ شریتھ کی دريافت شدہ خامی کے ذریعے فیس بک صارفین کسی کی بھی دوستوں کی فہرست میں شامل ہوئے بغیر ہی ان کی ذاتی وال پر پیغام لکھ سکتے تھے۔ اس سلسلے ميں شریتھ نے فيس بک سے رابطہ کيا ليکن جب انتظاميہ نے اس کے دو پيغامات پر کسی رد عمل کا اظہار نہ کيا تو خليل شريتھ نے انہونی کو ہونی کر ڈالا۔ اس نے ويب سائٹ کے بانی مارک زوکر برگ کے فيس بک صفحے کو ہی ہيک کر ڈالا۔

خليل شريتھ نے مارک زوکر برگ کے صفحے تک رسائی حاصل کرنے کے بعد ان کی ’وال‘ پر مندرجہ ذيل پيغام لکھا، ’’آپ کی پرائيوسی کی خلاف ورزی کرنے پر معذرت چاہتا ہوں۔ ان تمام رپورٹوں کے بعد جو ميں نے فيس بک ٹيم کو بھيجيں، ميرے پاس اور کوئی راستہ بچا ہی نہيں تھا۔ جيسا کہ آپ ديکھ سکتے ہيں کہ ميں آپ کے دوستوں کی فہرست ميں نہيں ہوں ليکن اس کے باوجود ميں آپ کی ٹائم لائن پر يہ پيغام درج کر سکتا ہوں۔‘‘

اگرچہ اس عمل کے بعد خليل شريتھ کے ہاتھ فيس بک کا پانچ سو ڈالر کا وہ انعام نہ لگ سکا جو انتظاميہ کسی خامی کی نشاندہی کرنے والے کو ادا کرتی ہے تاہم پھر بھی وہ کافی مطمئن ہے۔ وجہ يہ کہ ايک تو اس عمل کے ذريعے اس نے اپنے ليے خوب نام کمايا اور پھر دنيا کے کامياب ترين سوشل نيٹ ورک کے بانی کے اکاؤنٹ تک پہنچنے پر اس کے ليے ملازمتوں کی ايک قطار بھی لگ گئی ہے۔