چار دوائیں ایک ہی گولی میں

ادویات ساز کمپنیاں اب ایسی دوائیں بنانے میں کامیاب ہو گئی ہیں جو ایک ٹیبلٹ میں متعدد ادویات کا مجموعہ ہیں اور طبی ماہرین اس کے استعمال پر زور دے رہے ہیں۔خاص طور سے دل کے مریضوں پر زور دیا جا رہا ہے کہ وہ ان نئی ٹیبلٹس کا استعمال کریں کیونکہ مجموعہ ادویات پر مشتمل یہ ٹیبلٹس زیادہ موثر ثابت ہو رہی ہیں۔
 

ڈوئچے ویلے کی رپورٹ کے مطابق ایک عالمی طبی جائزے کے نتائج سے پتہ چلا ہے کہ ڈاکٹر ’ریڈی لیبارٹریز لیمٹڈ‘ کی طرف سے تیار کردہ ٹیبلٹ ’Polypill‘ جو ’فور ان ون‘ یا چار ادویات کا مجموعہ ہے، کا استعمال دل کے مریضوں کے لیے واضح طور پر زیادہ موثر ہے۔ اس کا ایک فائدہ یہ بھی ہے کہ مریضوں کو چار مختلف گولیاں نگلنے نہیں پڑتیں بلکہ ایک وقت میں محض ایک ٹیبلٹ لینا پڑتی ہے۔ ٹیبلٹ ’Polypill‘ میں کولیسٹرول کم کرنے والی دوا اسپرین اور بلڈ پریشر کم کرنے والی دو اور دوائیں بھی شامل ہوتی ہیں۔ اس دوا کا ابتدائی تجربہ 2000 افراد پر کیا گیا۔ دل کے مرض کے علاوہ اس دوا کے مثبت اثرات بلڈپریشر اور کولیسٹرول کے مریضوں پر بھی مرتب ہوئے۔

امپیریل کالج لندن کے ڈاکٹر سائمن تھوم اس تحقیق کے نگران ہیں۔ ان کا کہنا ہے کہ ٹیبلٹ ’Polypill‘ کی مدد سے علاج نہایت سادہ اور کم خرچ ہو گیا ہے اور اس وجہ سے مریض اپنا علاج جاری رکھ سکتے ہیں۔ اس دوا کا تجربہ 1000 بھارتی اور اپنے ہی مصری مریضوں پر کیا گیا۔

ماہرین کا کہنا ہے کہ دل کے عارضے کے شکار مریضوں کا ایک عام مسئلہ یہ ہے کہ اُنہیں اکثر اپنے مرض کا اندازہ ہی نہیں ہوتا اور وہ اکثر دوائیں لینا بھول جاتے ہیں۔ اس تحقیق میں 15 ماہ تک دونوں طرح کے مریضوں پر نظر رکھی گئی اور اس کے نتائج سے پتہ چلا کہ ادویات کا مجموعہ ٹیبلٹ ’Polypill‘ کا استعمال کرنے والے مریضوں میں 86 فیصد پابندی سے یہ دوا لیتے رہے جبکہ علیحدہ علیحدہ چار ٹیبلٹس لینے والے مریضوں میں سے محض 65 فیصد نے دوائیں پابندی سے لیں۔ اس تحقیق کے نتائج امریکا کے جرنل آف میڈیسن میں شائع ہوئے ہیں