جرمنی کا ماحول دوست جزیرہ پَیل وورم

جزیرہ پیل وورم کی کل آبادی تقریبا ایک ہزار نفوس پر مشتمل ہے اور یہ سولر اور پن چکیوں سے توانائی حاصل کرنے کے حوالے سے ایک تاریخ رکھتا ہے۔ اب جرمن حکام مقامی سطح پر اس سوچ کا پرچار کر رہے ہیں کہ عام لوگوں کو صحت مند منافع کی ترغیب دے کر متبادل توانائی سے متعلق کاروبار کو مزید ترقی دی جائے، نہ کہ ایسے منصوبہ جات بڑی کمپنیوں کے سپرد کر دیے جائیں۔

جزیرہ پیل وورم کے میئر ژؤرگن فیڈرسن (Feddersen Juergen) کا کہنا ہے کہ وہاں سن 1980 میں مختلف قسم کی پن چکیوں کے علاوہ شمسی توانائی کے پینل کی آزمائش کی گئی تھی۔ فیڈرسن کے مطابق یہ اس وقت کیا گیا تھا، جب یہ ٹیکنالوجی ابھی ابتدائی دور سے گزر رہی تھی۔ وہ مزید بتاتے ہیں کہ اس مرحلے کے دوران ان کا جزیرہ متبادل توانائی کا حامل پہلا علاقہ بن گیا تھا۔
 

اگر جزیرے پر طائرانہ نگاہ ڈالی جائے تو یہ پیل وورم کسی طور پر بھی ایک ’ہائی ٹیک‘ جزیرہ دکھائی نہیں دیتا ہے۔ اس جزیرے پر صرف ایک پولیس افسر تعینات ہے، ایک سپر مارکیٹ ہے اور صرف ایک ہی ٹریفک سگنل ہے جبکہ جزیرے کی ساحلی پٹی پر نصف درجن پران پکڑنے والی کشتیاں کھڑی دکھائی دیتی ہیں۔

پیل وورم سے متبادل توانائی کے ذرائع سے حاصل ہونے والی اضافی بجلی کو زیر سمندر سے گزرنے والی ایک کیبل سے ایکسپورٹ بھی کرنا شروع کر دیا ہے۔ اب ایک نئے ریسرچ پراجیکٹ کے تحت اس جزیرے کو توانائی میں خود کفیل کر دیا جائے گا۔ جزیرے پر قائم شمسی توانائی کے مرکز میں شراکتی کمپنی ای آن ہینزے (E.ON Hanse) نے دیگر مقامی اور حکومتی افراد کے ساتھ مل کر توانائی کو ذخیرہ کرنے کے پہلوؤں پر غور و خوص شروع کر دیا ہے۔ پیل وورم پر انرجی پیدا کرنے کے لیے ایک سمارٹ گرڈ اسٹیشن کو عملی شکل دینے کے کوشش کی جا رہی ہے۔ حکام کے بقول یہ سمارٹ گرڈ اسٹیشن خود بخود طلب اور سپلائی کا توازن قائم کرے گا۔