پاکستان میں کانگو وائرس٬ علامات اور احتیاطی تدابیر

عیدالاضحیٰ کی آمد کے ساتھ ہی ملک بھر کے مختلف شہروں میں کانگو وائرس کے مریضوں میں اضافہ دیکھنے میں آتا ہے- کانگو وائرس بیمار اور لاغر جانوروں سے انسانوں میں منتقل ہوتا ہے-

بیمار جانوروں کی کھال پر چپکے پسو کسی کو بھی کاٹ لیں تو اس میں کانگو وائرس متحرک ہوجاتا ہے-

ماہرین طب کے مطابق جیسے ہی وائرس خون میں شامل ہوتا ہے متاثرہ شخص کو تیز بخار ہونا شروع ہوجاتا ہے جس کو ہیمر جیک فیور بھی کہا جاتا ہے-
 

مریض کے ناک٬ مسوڑوں سمیت اندرونی اعضا سے خون رسنا شروع ہوجاتا ہے اور اس کے پلیٹ لیٹس اس حد تک کم ہوجاتے ہیں کہ یہ جان لیوا ثابت ہوسکتا ہے-

یہ وائرس متاثرہ جانور کے خون کے ذریعے بھی پھیلتا ہے- قصاب یا کوئی شخص متاثرہ جانور ذبح کرلے تو وہ اس کا باآسانی شکار بن سکتا ہے-

جانوروں کے بیوپاری یا قصاب کے جسم کے کسی زخمی حصے پر متاثرہ جانور کا خون لگ جائے تو یہ وائرس زندگی کو دیمک کی طرح کھا جاتا ہے-

صفائی کے ناقص انتظامات کی وجہ سے جانوروں میں موجود خطرناک پسو اس بیماری میں اضافے کا سبب بن رہے ہیں-

ماہرین طب کا کہنا ہے کہ اس وائرس سے بچنا ہے تو احتیاط ضروری ہے- جانور کو ذبح کرتے ہوئے مخصوص لباس ہو٬ دستانوں کا استعمال کیا جائے جبکہ جانوروں کا مکمل میڈیکل چیک اپ کرایا جانا چاہیے-