زلزلے کی صورت میں احتیاطی تدابیر

پاکستان کے جنوبی صوبوں سندھ اور بلوچستان اور بھارت کے دارالحکومت نئی دہلی سمیت کئی علاقوں میں منگل کی سہ پہر زلزلے کے شدید جھٹکے محسوس کیے گئے تھے جن کی شدت پاکستان کے جیولوجیکل سروے کے مطابق 7.7 تھی۔ یہ زلزلہ زمین سے صرف دس کلومیٹر کی گہرائی میں آیا تھا اور اسی وجہ سے اس سے بڑے پیمانے پر نقصان ہوا۔

زلزلے کا مرکز صوبہ بلوچستان کے جنوبی علاقے مکران ڈویژن اور خضدار سے 120 کلومیٹر کے فاصلے پر جنوب مشرق میں بنتا ہے۔ بلوچستان پاکستان کا سب سے بڑا لیکن سب سے کم آبادی والا صوبہ ہے۔

یہ صوبہ ماضی میں بھی زلزلوں کا نشانہ بنتا رہا ہے۔ قیامِ پاکستان سے قبل یہاں 1935 میں ایک شدید زلزلہ آیا تھا جس نے کوئٹہ شہر کو تباہ کر دیا تھا۔ اس زلزلے میں 60 ہزار افراد ہلاک ہوئے تھے۔
 

منگل کی سہ پہر آنے والے شدید زلزلے سے صوبہ بلوچستان میں وسیع پیمانے پر تباہی ہوئی ہے اور حکام کے مطابق صوبے کے مختلف علاقوں میں ہلاک ہونے والوں کی تعداد 290 سے تجاوز کر گئی ہے۔ بلوچستان میں قدرتی آقات سے نمٹنے کے صوبائی ادارے کے مطابق زلزلے سے آواران، کیچ، خاران، پنجگور،گوادر کے علاقے متاثر ہوئے ہیں۔

اس میں شک نہیں کہ کائنات میں کوئی واقعہ خدا کی رضامندی و منشاء کے بغیر ہوہی نہیں سکتا۔ مگر ہر وقت آفت کو عذاب الٰہی کہہ دینا ہماری غیر ذمے داری ہے۔ بر وقت تیاری نہ ہونے کی وجہ سے ہم ہر آفت آنے پر ہزاروں جانوں کا نذرانہ پیش کرنے پر مجبور ہوجاتے ہیں۔ ہمیں اپنی پہلے کوتاہیوں سے سبق لینا چاہیے۔ یہ صرف شعور اور آگہی ہی سے ہے جس کی وجہ سے ترقی یافتہ ممالک میں مالی و جانی نقصان کم ہوتے ہیں جبکہ ہمارے ہاں انسانی جان ہی سب سے ارزاں جنس ہے۔

نا گہانی آفات سے بچاﺅ کے لیے ضروری ہے کہ ہر فرد کو معلوم ہو کہ زلزلہ یا کوئی دوسرا سانحہ ہوجائے تو اسے کیا کرنا چاہیے۔

زلزلے کی صورت میں احتیاطی تدابیر
یہاں ان احتیاطی تدابیر کا مفصلاً احاطہ کیا جارہا ہے جن پر عملدرآمد سے جانی نقصانات کو ممکن حد تک کم کیا جاسکتا ہے ۔ ان اقدامات اور قبل از وقت آگاہی سے ہم زلزلوں سے ہونے والے جانی نقصان سے بچ سکتے ہیں ۔

اگر زلزلے کا جھٹکا محسوس کریں تو اپنے ہوش وحواس قابو میں رکھیں ۔ خوفزدہ ہو کر بغیر سوچے سمجھے بھاگنے، اوپر کی منزل سے چھلانگ لگانے اور چیخنے چلانے کی بجائےا گر با آسانی عمارت سے باہر نکل سکتے ہیں تو نکل آئیں ورنہ بہتر ہوگا کہ جہاں ہیں وہیں رہیں۔

اپنے سر کو دونوں ہاتھوں کو مٹھیوں سے ڈھانپ کر کمرے کی وسط کی بجائے کسی کونے میں نیچے بیٹھ جائیں۔ اگر کوئی مضبوط میز یا بیڈ ہوتو اس کے نیچے پناہ لیں۔ اگر کوئی بھاری مضبوط فرنیچر نزدیک نہیں تو دروازے کی چوکھٹ کے نیچے یا سیڑھیوں کے نیچے پناہ لیں مرکزی دروازہ کھلا رکھیں کیونکہ جھٹکوں سے بعض اوقات دروازے جام ہوجاتے ہیں۔

کچن یا لیب میں موجود ہوں تو فوراً والو بند کردیں جیسے ہی جھٹکے ہلکے ہوں، باہر نکلنے کی کوشش کریں۔ اگر اوپر کی منزل پر ہیں تو زلزلوں کے جھٹکوں کے دوران سیڑھیاں مت اتریں۔ لفٹ ہرگز استعمال نہ کریں۔ جھٹکے5-10سیکنڈ میں ہلکے ہوجاتے ہیں ۔ رکتے ہی اوپری منزل سے نیچے کھلے میدان میں چلے جائیں۔ عمارت سے کم از کم دس فٹ دور رہیں۔بھگدڑ سے زیادہ نقصان ہوگا۔