میڈونا نے قرآن پاک کا مطالعہ شروع کردیا٬ اہم انکشافات

بین الاقوامی شہرت یافتہ امریکی گلوکارہ میڈونا نے کہا ہے کہ وہ آج کل قرآن کا مطالعہ کر رہی ہیں۔

وائس آف امریکہ کی رپورٹ کے مطابق میڈونا نے یہ بات 'ہارپر بازار' نامی جریدے کے تازہ شمارے میں شائع ہونے والے اپنے ایک مضمون میں تحریر کی ہے جس میں انہوں نے اپنی ذاتی زندگی اور کیریئر کے آغاز سے متعلق کئی اہم انکشافات کیے ہیں۔
 

اپنے مضمون میں 55 سالہ پاپ گلوکارہ نے لکھا ہے کہ وہ سمجھتی ہیں کہ تمام مقدس کتابوں کو پڑھنا ضروری ہے اور آج کل وہ قرآن کا مطالعہ کر رہی ہیں۔ انہوں نے لکھا ہے کہ کسی بھی مذہب کا اچھا پیروکار دوسرے مذہب کا بھی اچھا ماننے والا ثابت ہوتا ہے۔

میڈونا نے مزید لکھا ہے کہ وہ مختلف مسلمان ممالک میں طالبات کے لیے اسکول بھی تعمیر کرا رہی ہیں۔

جریدے نے میڈونا کی ایک تصویر بھی شائع کی ہے جس میں انہوں نے اس روایتی برقع جیسا نقاب پہن رکھا ہے جو عموماً مسلمان معاشروں میں خواتین پہنتی ہیں۔

اپنے مضمون میں امریکی گلوکارہ نے اپنے ساتھ بیتنے والے ان ناخوشگوار واقعات کا بھی ذکر کیا ہے جو 1970ء کی دہائی میں رقص اور موسیقی کی دنیا میں قدم رکھنے کی غرض سے آبائی ریاست مشی گن سے نیویارک منتقل ہونے کے بعد انہیں پیش آئے تھے۔