عیدالاضحیٰ اور اس سال کے خوبصورت جانور ( خصوصی فیچر )

ہر سال کی مانند اس سال بھی عیدالاضحیٰ کے موقع پر کراچی میں سپر ہائی وے پر قائم ہونے والی مویشی منڈی کا آغاز ہوچکا ہے اور قربانی کے جانوروں کی آمد بھی شروع ہوچکی ہے عیدالاضحیٰ کے چاند کا اعلان ہوتے ہی اس منڈی میں تیزی آجاتی ہے- ہماری ویب کی ٹیم نے اپنے قارئین کے لیے گزشتہ سال کی طرح اس سال بھی منڈی میں لائے گئے خوبصورت اور بیش قیمت جانوروں کی تصاویر اور ان سے متعلق معلومات اکھٹی کی ہیں-

منڈی میں سب سے زیادہ قیمت والے جانور مشہور کیٹل فارم کے ہوتے ہیں- ان کیٹل فارم میں قابل ذکر شاہ کیٹل٬ لاثانیہ٬ سندھ ڈیری فارم اور القریش ہیں- ان کیٹل فارم میں موجود جانوروں کی قیمت 10 لاکھ سے لے کر 15 لاکھ تک ہے- ان جانوروں کی اتنی زیادہ قیمت کا سبب ان کا وزن٬ خوبصورتی اور قد کاٹھ ہے- ان جانوروں کے نام بھی انتہائی دلچسپ ہوتے ہیں جیسے کہ ٹائیگر٬ حسن کا بادشاہ٬ کرن٬ باڈی گارڈ اور شیرو وغیرہ-
 

شیرو
اس خوبصورت جانور کا نام شیرو رکھا گیا ہے اور یہ جانور سندھ ڈیری فارم کی ملکیت ہے- اس جانور کی عمر صرف 32 ماہ ہے جبکہ اس کا تعلق کراچی سے ہے- جب کیٹل فارم کی انتظامیہ سے اس جانور کی غذا کے حوالے سوال کیا گیا تو ان کا کہنا تھا کہ اس کی غذا 21 سے 22 اشیاﺀ پر مشتمل ہوتی ہے جس میں دالوں اور چھلکے کو خاص طور پر شامل کیا جاتا ہے- سندھ ڈیری فارم کے مالکان نے اس جانور کی قیمت 9 لاکھ روپے مقرر کی ہے-

ٹائیگر
مویشی منڈی میں صدر پاکستان جناب ممنون حسین کے صاحبزادوں کا بھی کیٹل فارم موجود تھا اور یہ ٹائیگر نامی پرکشش جانور اسی جناح کیٹل فارم کا ہے- اس جانور کی عمر ڈھائی سال ہے جبکہ اس کا وزن 15 من ہے- اس جانور کا تعلق بھی کراچی سے ہی ہے- ٹائیگر کے مالکان نے اس کی قیمت 5 لاکھ مقرر کی ہے-

بلو بادشاہ
اب ملیے بلو بادشاہ سے جو کہ ملکیت ہے الرحمان کیٹل فارم کی- بلو بادشاہ کی عمر اس وقت ساڑھے 3 سال ہے جبکہ اس کا وزن 33 من- گھارو سے تعلق رکھنے والے اس جانور بلو بادشاہ کی غذا بھی بادشاہوں والی ہی ہے کیونکہ اس کی غذا میں مکھن٬ دودھ٬ ونڈے کے ساتھ ساتھ دیگر بھاری اشیاﺀ بھی شامل ہیں - الرحمان کیٹل فارم نے اس کی ڈیمانڈ 15 لاکھ رکھی ہے-

آسٹریلین بیل
اس جانور کا تعلق آسٹریلیا کے بیلوں کی ایک نسل سے ہے- اور اس کی قیمت کے بارے میں جان کر اس کے آسٹریلیا سے تعلقات ہونے پر کوئی شبہ باقی نہیں رہتا- یہ جانور سرمہ والا کیٹل فارم کی ملکیت ہے اور انہوں نے اس کی قیمت 15 لاکھ مقرر کی ہے- اس جانور کا وزن 30 من ہے جبکہ اس کی عمر ڈھائی سال ہے-

کرن
نام تو اس کا کرن ہے لیکن یہ اپنے نام کی طرح نازک قطعاً نہیں ہے- یہ جانور لاثانیہ کیٹل فارم کی ملکیت ہے اور اس کا تعلق رحیم یار خان سے ہے- اس جانور کی غذا میں چوکر٬ چھلکا٬ تیل اور دودھ کے ساتھ دیگر چکنی چیزوں کو بھی شامل کیا جاتا ہے- اس جانور کا وزن 18 من ہے جبکہ اس کی قیمت 10 لاکھ روپے رکھی گئی ہے-

حسن کا بادشاہ
بےپناہ حسن کے مالک اس جانور کا نام حسن کا بادشاہ رکھا گیا ہے اور یہ جانور 786 کیٹل فارم کی ملکیت ہے- اس جانور کا تعلق کراچی سے ہے جبکہ اس کا وزن 14 من ہے- اس کی غذا بھی چند خاص قسم کی اشیاﺀ پر مشتمل ہوتی ہے جو کہ انتہائی مہنگی بھی ہوتی ہیں- اس جانور کی ڈیمانڈ 9 لاکھ روپے رکھی گئی ہے-

وائٹ براؤن
وائٹ براؤن رنگ کے حامل اس جانور کا تعلق ہالینڈ کے بیلوں کی ایک نسل سے ہے- اس جانور کی عمر 3 سال ہے جبکہ اس کی غذا میں گندم اور دلیے کو خاص طور پر شامل کیا جاتا ہے- بابا انصاری کی ملکیت اس جانور کی قیمت 7 لاکھ روپے مقرر کی گئی ہے-

باڈی گارڈ
یہ باڈی گارڈ نامی جانور اپنی جسامت کے لحاظ سے واقعی کسی باڈی گارڈ سے کمی نہیں لگتا- یہ حسین جانور شاہ کیٹل فارم کی ملکیت ہے- اس جانور کا تعلق رحیم یار خان سے ہے اور اس کو غذا میں دودھ اور مکھن دیا جاتا ہے- اس جانور کی عمر ساڑھے تین سال ہے جبکہ اس کا وزن 15 من ہے- شاہ کیٹل فارم نے اس کی قیمت 12 لاکھ مقرر کی ہے-

نام آپ رکھیں
یہ جانور بھی شاہ کیٹل فارم کی ملکیت ہے لیکن انہوں نے اس کو کوئی نام نہیں دے رکھا لیکن ہماری ویب اپنے قارئین کو یہ موقع دیتی ہے کہ وہ اس کے لیے نام کا انتخاب کریں- اس جانور کا تعلق چولستان سے ہے جبکہ اس کا وزن 12 من ہے- یہ جانور شاہ کیٹل فارم کا سب سے مہنگا جانور ہے جس کی قیمت انہوں نے 15 لاکھ مقرر کی ہے-