درخت کے پتوں میں سونے کے ذرات دریافت

ایک کہاوت ہے کہ کیا پیسے درختوں پر اگتے ہیں؟ لیکن اب یہ کہاوت کسی کسی مقام پر سچ ہوتی دکھائی دے رہی ہے٬ فرق صرف یہ ہے کہ یہاں درختوں پر پیسہ تو نہیں البتہ سونا ضرور اگ رہا ہے- حال ہی میں ایسے درخت دریافت ہوئے ہیں جن کے پتوں میں سونے کے ذرات پائے گئے ہیں-

بی بی سی کی رپورٹ کے مطابق سائنسدانوں نے ایک نئی تحقیق سے ثابت کر دیا ہے کہ واقعی سونا بعض درختوں کے پتوں میں پایا جاتا ہے۔
 

آسٹریلیا کے محققین کا کہنا ہے کہ یوکلپٹس کے درخت کے پتوں میں سونے کے ذرات سے ظاہر ہوتا ہے کہ اس زمین میں سونے کے ذخائر موجود ہیں۔

سائنسدانوں کا کہنا ہے کہ اس تحقیق سے سونے کے ذخائر کا پتا لگانے میں بڑی مدد مل سکتی ہے۔

یہ تحقیق حال ہی میں سائنسی جریدے جرنل آف نیچر کمیونیکیشن میں شائع ہوئی ہے۔

ڈاکٹر میل لنٹرن جیوکیمسٹ ہیں اور آسٹریلیا کے کامن ویلتھ سائٹیفک اور انڈسٹریل ریسرچ آرگنائزیش کے لیے کام کرتے ہیں۔ ان کا کہنا ہے کہ اب ایسی مشکل جگہوں پر سونے کے ذخائر دریافت کرنے کی کوشش کی جا رہی ہیں جن میں آبائی گزرگاہیں اور ریتلے میدان شامل ہیں جہاں پر انتہائی گہرائی میں سونے کے ذخائر موجود ہیں۔