اپنا اسمارٹ فون خود تیار کریں

گوگل کی فون بنانے والی کمپنی موٹورولا نے ایک نیا پراجیکٹ شروع کرنے کا اعلان کیا ہے جس کے تحت صارفین اپنے سمارٹ فون کے پرزے اپنی پسند سے چن سکیں گے۔

ایرا (Ara) نامی اس پراجیکٹ کے تحت صارفین موبائل فون کے سیٹ کا بنیادی ڈھانچہ خرید کر اس میں اپنی مرضی سے کی بورڈ، بیٹری یا دیگر سینسرز لگا سکیں گے۔
 

موٹورولا اس پراجیکٹ پر ولندیزی ڈیزائنر ڈیو ہاکنز کی شراکت سے کام کر رہی ہے۔ ڈیو ہاکنز نے ’فون بلاکس‘ کا تصور دیا ہے جس کے تحت پرزوں سے فون بنایا جا سکتا ہے۔

تاہم ماہرین موبائل فون کی صنعت کے لیے صارفین کی مرضی سے تیار ہونے والے سمارٹ فون کی اہمیت پر تذبذب کا شکار ہیں۔

موٹورولا نے اپنے بلاگ پر ایک تحریری بیان میں کہا ہے کہ وہ ایک سال سے زیادہ عرصے سے اس پراجیکٹ پر کام کر رہے تھے۔

’ہم ہارڈ ویئر کے لیے وہ کام کرنا چاہتے ہیں جو اینڈروئڈ نے سافٹ ویئر کے لیے کیا۔‘

موٹورولا نے بلاگ پر کہا کہ ’اس کا مقصد آپ کو یہ فیصلہ کرنے کا اختیار دینا ہے کہ آپ کا فون کیا کام کرے، کس طرح دکھائی دے، کس چیز سے بنے، اس کی قیمت کتنی ہو اور آپ اس کو کتنا عرصے رکھنا چاہتے ہیں۔‘