موبائل کی بیٹری دیر تک چلے؟ چند مشورے

گر آپ کے پاس سمارٹ فون ہے اور وہ بھی بڑی سکرین اور ٹچ سکرین والا اور انٹرنیٹ کی تیز رفتار سہولت بھی دستیاب ہے تو آپ یقیناً کوئی زبردست سی مووی دیکھنا چاہیں گے یا اپنے دوستوں سے ویڈیو چیٹ کریں گے۔ یہ سب سننے میں تو بہت اچھا ہے لیکن نتیجہ یہ ہو گا کہ آپ کے فون کی بیٹری جلد ختم ہو جائے گی اور آپ کا اپنے گھر والوں سے ٹیلیفونک رابطہ کچھ دیر کے لیے ضرور منقطع ہو جائے گا۔

چلیے آج ہم آپ کو کچھ ٹوٹکے بتاتے ہیں، جن سے آپ دن بھر سمارٹ فون سے لطف بھی اُٹھائیں گے اور بیٹری بھی بچائیں گے۔
 

صارفین کی سہولت کے لیے اشیاء کی جانچ پڑتال کے جرمن ادارے سے منسلک مائیکل وولف کہتے ہیں: ’’سمارٹ فونز میں تیز رفتار پروسیسر اور بڑی سکرین ہوتی ہے اور انہیں چلانے کے لیے زیادہ توانائی کی ضرورت ہوتی ہے، یہی وجہ ہے کہ ان کی بیٹری جلد ختم ہو جاتی ہے۔‘‘

سکرین ڈسپلے کی لائیٹ سب سے زیادہ بیٹری کے ضیاع کا باعث بنتی ہے۔ یہ کہنا ہے آریا موبائل سے منسلک بیورن بروڈرسِن کا: ’’سب سے زیادہ ضروری ہے کہ آپ اپنے موبائل فون کی ڈسپلے اسکرین کی لائیٹ کو سب سے زیادہ کم درجے پر رکھیں کیونکہ یہ تیز روشنی سب سے زیادہ بیٹری کے ضیاع کا باعث بنتی ہے۔ اس کے علاوہ موبائل فون کے آٹو لاک کو بھی سب سے کم درجے پر رکھیں ‘‘ اپنے سمارٹ فون کی ترجیحات میں ماحول میں موجود روشنی کے مطابق لائیٹ ایڈجسٹ کرنے کی آپشن کو آن رکھیں۔

اسی طرح ٹیل ٹیرف موبائل ویب سائٹ سے منسلک بیٹینا زوئٹے کہتی ہیں: ’’اگر موبائل فون میں بلو ٹوتھ، وائی فائی، سیٹیلائٹ نیویگیشن اور اس طرح کی دیگر ایپس آن ہوں تو بھی بہت زیادہ توانائی خرچ ہوتی ہے۔ لہذا ان سہولیات کو ہر ممکن وقت بند رکھنا چاہیے۔‘‘

اگر آپ کسی ایسے علاقے میں موجود ہیں جہاں سگنل بہت زیادہ کمزور ہیں تو بھی آپ کو فوری طور پر UMTS یا LTE موڈ سے براہ راست GSM موڈ میں چلا جانا چاہیے۔ موبائل فون سگنلز کی تلاش میں بھی بیٹری کا بہت زیادہ استعمال کرتے ہیں۔