امریکہ کی طاقت اور اہمیت میں کمی

چالیس سال میں پہلی مرتبہ امریکیوں کی اکثریت کو ایسا لگنے لگا ہے کہ امریکہ کی طاقت اور اہمیت میں کمی ہو رہی ہے۔

ایک سروے کے مطابق امریکیوں کا خیال ہے کہ امریکہ نے حال ہی میں دنیا میں اس سے بہت کم اہم اور طاقت ور کردار ادا کیا ہے جتنا وہ ایک دہائی قبل کر رہا تھا۔
 

پیو سروے کے مطابق 70 فیصد امریکیوں کو لگتا ہے کہ امریکہ کی عزت کم ہوئی ہے۔

پچاس سال میں پہلی مرتبہ 50 فیصد سے زائد امریکیوں نے کہا ہے کہ امریکہ کو اپنے کام سے کام رکھنا چاہیے۔

56 فیصد لوگوں نے حالیہ صدر براک اوباما کی خارجہ پالیسی کی تائید نہیں کی۔

اس سروے کے مطابق نصف سے زائد امریکی سمجھتے ہیں کہ امریکہ ایک دہائی قبل بحثیت عالمی رہنما کے جتنا اہم اور طاقت ور کردار ادا کر رہا تھا اب ایسا نہیں ہے۔ امریکیوں کی ایسی رائے اس سے قبل سنہ 1974 میں دیکھنے میں آئی تھی۔

دس سال قبل صرف 20 فیصد لوگ ایسا سمجھتے تھے۔

دہشت گردی کے حوالے سے پوچھے گئے سوال پر 50 فیصد لوگ سمجھتے ہیں کہ ڈرون حملوں سے امریکہ زیادہ محفوظ ہوا ہے جبکہ 30 فیصد لوگ افغان جنگ کو زیادہ فائدہ مند قرار دیتے ہیں۔

سروے کے مطابق صرف 17 فیصد امریکیوں کا کہنا تھا کہ امریکہ عالمی معاملات میں پہلے سے زیادہ اہم اور قوی کردار ادا کر رہا ہے۔

اس سروے میں یہ بات بھی سامنے آئی امریکی عوام عالمی معاملات میں امریکہ کی مداخلت کم سے کم چاہتے ہیں۔