مزاج کو خوشگوار بنانے والی غذائیں

متوازن اور غذائیت بخش غذائیں انسان کو دماغی اور جسمانی طور پر صحت مند رکھنے کے ساتھ ساتھ اس کے مزاج کی تلخی کو ختم کر کے اس کے موڈ کو خوشگوار بنادیتی ہیں- انسان میں ڈپریشن کی سب سے بڑی وجہ جنک فوڈ کا استعمال اور کھانے میں ضروری غذائی اجزا کی کمی ہے جو ڈپریشن کا سبب بنتی اور انسانی رویوں پر بری طرح اثر انداز ہوتی ہے- محققین کا کہنا ہے جو غذا انسان استعمال کرتا ہے وہ اس کے جذبات٬ محسوسات اور حتیٰ کہ خیالات پر بھی براہ راست اثر انداز ہوتی ہے- اگر انسان اندرونی اور بیرونی طور پر تندرست اور چاق و چوبند ہے تو اس کے خیالات ہمیشہ مثبت رہیں گے اور وہ اپنی روزمرہ کی تمام سرگرمیوں کو بغیر کسی غصے٬ تھکان اور ڈپریشن کے بخوبی سرانجام دے گا- اگر انسان واقعی اپنی زندگی میں خوش اور مسرور رہنا چاہتا ہے تو ان غذائیت بخش٬ خوش رکھنے والی غذاؤں کا ضرور استعمال کرے-
 

پالک
آئرن سے بھرپور غذا ہے جو انسان کو خوش رکھنے میں مدد دیتی ہے- پالک انسانی جسم میں توانائی کی سطح بڑھاتی ہے- پالک فولک ایسڈ سے بھرپور ہوتی ہے یہ انسان کے صحت مند سرخ خلیوں کو بڑھاتی ہے اور مدافعتی نظام کو مضبوط بنانے میں مددگار ثابت ہوتی ہے- اور بیرونی حملہ آور ہونے والی بیماریوں کے خلاف مزاحمت کرتی ہے-

مسور کی دال
فولیٹ سے بھرپور ہوتی ہے اور اس وٹامن کی کمی انسان میں ڈپریشن کا باعث بنتی ہے- وٹامن بی سر بھرپور دالوں کا باقاعدہ استعمال انسان میں توانائی کی ضرورت کو پورا کرنے میں مدد دیتا ہے- جب انسان میں ان وٹامنز کی کمی واقع ہوتی ہے تو وہ ہر وقت تھکا تھکا اور بیزار نظر آتا ہے-

مچھلی
مچھلی کو دماغی غذا تصور کیا جاتا ہے جس میں اومیگا 3 ضروری فیٹی ایسڈز موجود ہوتے ہیں- یہ انسان کے موڈ کو بہتر بناتے ہیں- جس کے استعمال سے انسانی جسم مشین کی طرح کام کرتا ہے- اگر آپ مچھلی کے شوقین نہیں ہیں تو اس کی جگہ اخروٹ کا استعمال بھی کرسکتے ہیں٬ کیونکہ اس میں شامل اومیگا 3 انسانی دماغ اور موڈ خوشگوار رکھتا ہے مٹھی بھر اخروٹ کا استعمال انسانی جسم کو 95 فیصد تک اومیگا 3 فراہم کرتا ہے-

کیلا
کیلا پوٹاشیم اور وٹامن بی سے بھرپور غذا ہے- جسے عام طور پر کھانے کے بعد میٹھے کے طور پر استعمال کیا جاتا ہے- اس میں شامل وٹامن بی انسانی جسم میں توانائی٬ نظام انہظام اور صحت مند اعصابی نظام کو مستحکم و مضبوط بنانے کے لیے اکھٹے کام کرتے ہیں-یہ جسم میں ان صحت مند خلیوں کو دوبارہ سے بننے میں مدد دیتے ہیں- جو انسانی جلد کو خوبصورتی برقرار رکھنے٬ بالوں اور ناخنوں کو صحت مند بنانے میں اہم کردار ادا کرتے ہیں- کیلے میں شامل غذائی اجزا لگاتار ان خلیوں کی نشو نما کرتے رہتے ہیں- وٹامن بی کی کمی انسان میں اضطراب٬ بےچینی اور ڈپریشن پیدا کرنے کا سبب بنتی ہے٬ جو انسانی مزاج میں تلخی اور غصے کو بڑھا دیتا ہے-

ترش پھل
وٹامن سی سے بھرپور ترش غذائیں جیسے کہ سنگترہ٬ لیموں٬ اسٹرابیری وغیرہ وغیرہ٬ انسان کی پریشانی اور ڈپریشن کو دور بھگانے میں مدد دیتی ہیں- یہ انسانی جسم کے نظام Serotonic کی پیداوار کو بڑھاتا ہے٬ یہ ایک اہم کیمیکل ہے جو انسان کی بھوک کر متحرک کرتا ہے اس کے محسوسات کو بہتر بنانے کے ساتھ ساتھ اسکے موڈ کو بھی خوشگوار رکھتا ہے- وٹامن سی سے بھرپور غذائیں انسان کو شدید تناؤ یا ڈپریشن کے وقت مدد دیتی ہیں٬ یہ ڈپریشن اور اضطراب پیدا کرنے والے ہارمون کے لیول کو کم کرتے ہیں- وٹامن سی کا استعمال انسان کو سخت حالت میں بھی پرسکون رکھتا ہے-

اخروٹ
یہ سپر اسٹار غذائیت سے بھرپور غذا انسان کو ڈپریشن سے لڑنے میں مدد دیتی ہے- اس کے علاوہ اخروٹ کا استعمال ہڈیوں اور دانتوں کو مضبوط اور صحت مند رکھتا ہے- یہ جسم میں نئے خلیوں کی نشو نما کو فعال بنانے میں اہم کردار ادا کرتے ہیں- اخروٹ انسانی جسم میں انسولین کے عمل کو بڑھانے اور گرم رکھنے میں مدد دیتا ہے- اخروٹ میں شامل Polyphenols اور دوسرے اینٹی اوکسیڈینٹ دماغ کے اعصابی رابطوں کو مضبوط بناتے ہیں- انسان کی یاداشت بہتر ہوتی ہے- اخروٹ انسان کے دماغ کی ریاضی کی صلاحیتوں اور آئی کیو کو تیز بناتا ہے- اخروٹ کا استعمال انسان کو اچھا نظر آنے اور اچھا محسوس کرنے میں مدد دیتا ہے-

پاپ کارن
کاربوہائیڈریٹ اور امائنو ایسڈ سے بھرپور غذا ہے٬ اس میں انسان کو ریلیکس کرنے اور اس کے موڈ کو خوشگوار بنانے والے غذائی اجزا بہ کثرت شامل ہوتے ہیں- یہ انسانی جسم میں Serotonic کی پیداوار بڑھانے میں مدد دیتا ہے٬ جو انسانی موڈ کو اچھا رکھنے میں مدد دیتا ہے-

دودھ
انسانی جسم کے لیے نہایت مفید غذا ہے اس میں شامل غذائی اجزا کیلشیم٬ وٹامن ڈی اور پروٹین انسان کے موڈ پر انتہائی خوشگوار اثرات مرتب کرتے ہیں- انسان میں ڈپریشن اور موسمی اثرات کی وجہ سے بدنظمی عام طور پر وٹامن ڈی اور کیلشیم کی کمی کی وجہ سے ہی ہوتی ہے- جبکہ دودھ میں پائے جانے والے اجزا انسان کو انتہائی ڈپریشن کی حالت میں بھی پرسکون اور خوش رکھنے میں مدد دیتے ہیں-

پنیر
ایک حیرت انگیز غذائیت سے بخش غذا ہے٬ جو کیلشیم٬ پروٹین٬ زنک اور دوسرے معدنیات سے بھرپور ہوتی ہے- انسانی جسم خود سے زنک پیدا نہیں کرپاتا٬ لہٰذا غذائی معدنیات کا باقاعدہ استعمال انسان کے روزانہ کے کوٹے کو پورا کردیتا ہے- میکینیشیم کی طرح زنک بھی خلیوں کی نشو نما اور تشکیل میں اہم کردار ادا کرتا ہے یہ بالوں٬ جلد٬ بینالی حتیٰ کہ انسان کے چکھنے اور سونگھنے کی صلاحیت کو بھی تیز کردیتا ہے٬ قدرتی طور پر چکنائی والی پنیر جیسے کہ بکری کے دودھ سے بننے والی پنیر انسانی جسم کے لیے بہت مفید ہے٬ جسے سینڈوچ کے ساتھ بھی استعمال کیا جاسکتا ہے-