سمندری قزاقی میں کمی کا رجحان جاری

سمندری حالات و واقعات پر نگاہ رکھنے والے بین الاقوامی ادارے کے مطابق سمندروں میں قزاقی کے واقعات میں گزشتہ چھ سالوں سے جو کمی واقع ہو رہی تھی وہ اب ریکارڈ کم سطح پر آ گئی ہے۔
 

ڈوئچے ویلے کی رپورٹ کے مطابق انٹرنیشنل میریٹائم بیورو نے سن 2013 کی سالانہ قزاقی رپورٹ کا اجراء کر دیا ہے۔ اِس رپورٹ کے مطابق چھ برس قبل تواتر سے رونما ہونے والے سمندری قزاقی اپنی ریکارڈ کم سطح پر آ گئی ہے۔ بیورو کی رپورٹ کے مطابق سمندروں میں قزاقوں پر نگاہ اور ان کی کارروائیوں کی بھرپور انداز میں حوصلہ شکنی سے سمندروں میں تجارتی بحری جہازوں کو لوٹنے اور قبضے کرنے کے واقعات میں کمی آئی ہے۔ رپورٹ کے مطابق مختلف اقوام کے بحری جہازوں کی سمندری ناکوں کے باعث قرن افریقہ سے اٹھنے والی قزاقی بھی اب واضح طور پر کم ہو گئی ہے۔

سمندری قزاقی کے ابتدائی واقعات سن 2006 میں نمودار ہونا شروع ہوئے تھے اور اِن میں انتہائی زیادہ اضافہ سن 2011 میں ہوا تھا۔ سالانہ رپورٹ میں بتایا گیا کہ گزشتہ برس قزاقی کے حوالے سے دنیا بھر کے مختلف سمندری علاقوں میں تجارتی اور دوسرے بحری جہازوں پر کُل 264 حملے کیے گئے تھے۔ سن 2013 میں رونما ہونے والے واقعات میں صرف 13 ایسے تھے جن میں صومالی قزاق ملوث ہوئے۔ سن 2011 میں رونما ہونے والے قزاقی کے کل واقعات میں 237 میں صومالی قزاق پیش پیش تھے۔

رپورٹ کے مطابق گزشتہ برس بحری جہازوں پر ہونے والے حملوں میں 300 افراد کو یرغمال بنایا گیا اور ان میں سے21 زخمی ہوئے۔ زخمی ہونے والوں کو فائرنگ سے یا چاقو کے زخم تھے۔ گزشتہ برس کُل 21 بحری جہاز یرغمال بنائے گئے تھے۔ قزاق کل 202 جہازوں پر سوار ہونے میں بھی کامیاب ہوئے لیکن بعد میں انہیں پسپا ہونا پڑا۔ قزاقوں کی جانب سے 22 بحری جہازوں پر گولے بھی داغے گئے۔ ایسے حملوں سے 28 بحری جہاز بچ نکلنے میں کامیاب رہے۔ قزاقی کی وارداتوں میں نائجیریا کے قزاقوں کے ایک حملے میں ایک شخص کی ہلاکت بھی ہوئی۔ نائجیریا کے قزاقوں نے 36 افراد کو اغوا بھی کیا۔ قزاقی کی کل وارداتوں میں مغربی افریقی قزاق اُنیس فیصد میں شریک تھے۔