رنگ و نور بکھیرتے دنیا کے عجیب و غریب جاندار

قدرت نے ہر قسم کی مخلوق کو٬ وہ جاندار ہو یا بے جان ساکن ہو یا متحرک٬ عجیب و غریب آفرینش کا جامہ پہنا کر ایجاد کیا ہے- دنیا میں قدرت کے عطا کردہ کچھ ایسے عجیب و غریب جاندار بھی موجود ہیں جو اپنے اردگرد روشنیاں بکھیرتے دکھائی دیتے اور اپنی روشنی کے ذریعے دوسروں کو اپنی جانب متوجہ بھی کرتے ہیں- آج کا آرٹیکل چند ایسے ہی عجیب وغریب جانداروں اور ان سے آگہی کے متعلق منعقد کی جانے والی ایک نمائش کے بارے میں ہے - بی بی سی کی شائع کردہ ایک رپورٹ کے مطابق ’رنگ و نور بکھیرتے جاندار‘ ( نمائش کا نام ) امریکن میوزیم آف نیچرل ہسٹری کی ایک نمائش ہے جسے دنیا کے کئی شہروں میں دکھایا جاتا ہے۔ یہ نمائش ان عجیب و غریب جانداروں سے متعلق ہے جن سے روشنی نکلتی ہے۔ نمائش میں لوگوں کو مصنوعی طور پر ترتیب دیے ہوئے ایک تاریک راستے سے گزرنے کا موقع ملتا ہے جہاں مختلف النوع چیزیں دیکھنے کو ملتی ہیں۔

یہ تصویر ایک دمکتے مشروم کی ہے جس میں اسے اپنے قدرتی سائز سے بڑا کر کے دکھایا گیا ہے۔

اس تصویر میں دکھائے جانے والے مشروم شمالی امریکہ کے جنگلات میں گلی سڑی لکڑی پر اگتے ہیں۔

فاسِس ریٹی کلاٹا نامی مکھی کی یہ قسم اس تصویر میں اپنے قدرتی حجم سے 65 گنا بڑی دکھائی گئی ہے۔ جنوب مشرقی امریکہ میں پائی جانے والی اس مکھی کو نیلا بھوت بھی کہا جاتا ہے۔

سونیکی ہیراماٹسو نامی فوٹوگرافر نے جدید کیمرے کی مدد سے نمائش میں شامل فائر فلائی کی یہ تصویر لی ہے۔

نیوزی لینڈ کی ایک مشہور غار کے ماڈل کو بھی نمائش میں شامل کیا جاتا ہے۔اس میں شائقین اُن چمکتے جانداروں کا نمونہ دیکھتے ہیں جو غار کی چھت سے لٹکے رہتے ہیں اور ارد گرد اُڑتے کیڑوں مکوڑوں کو اپنا شکار بناتے ہیں۔

نمائش کے اس حصے میں شائقین کا تعارف پورٹو ریکو کے ایک جزیرے پر دیکھی جانے والی روشنی سے کرایا جاتا ہے۔

نمائش کے اس ماڈل میں شائقین مشہور ’کے مین آئی لینڈ‘ کا ایک نمونہ دیکھتے ہیں۔ یہ جزیرہ رنگ بکھیرتے ہوئے عجیب و غریب جانداروں کے لیے دنیا بھر میں جانا جاتا ہے۔

جب اس ’جیلی فِش‘ کو چھیڑا جاتا ہے تو اس کے جسم کے کناروں پر روشنی بکھرنے لگتی ہے۔ اس موقع پر مچھلی کے جسم میں کیمیائی تبدیلی پیدا ہوتی ہے جس کے دوران پہلے نیلی روشنی نکلتی ہے اور بعد میں سبز۔