سست رفتار جانور سلوتھ میں چھپا خزانہ

درختوں پر بے حد سست رفتاری سے چڑھتے اور اترتے ہوئے جانور ' سلوتھ' کو تو آپ نے دیکھا ہی ہوگا۔ اگرچہ یہ جانور اپنی سست روی کی وجہ سے ذیادہ توجہ حاصل نہیں کرپایا لیکن اب سائنسدانوں کو یقین ہے کہ اس کے بالوں میں ممکنہ دواؤں کا ایک خزانہ پوشیدہ ہے جن میں کینسر سے لڑنے والے مرکبات ( کمپاؤنڈ) اور اینٹی بایوٹکس تک شامل ہیں۔

ڈان نیوز کی شائع کردہ ایک رپورٹ کے مطابق پبلک لائبریری آف سائنس ( پی ایل او ایس) میں 15 جنوری کو شائع ہونے والے ایک ریسرچ پیپر میں کہا گیا ہے کہ اس جانور کے بالوں میں ایسی فنجائی موجود ہوتی ہیں جن میں بریسٹ کینسر، ملیریا اور بیماری پھیلانے والے پیراسائٹ ( طفیلیوں) کا علاج موجود ہوسکتا ہے۔
 

اس طویل مطالعے ( اسٹڈی) میں پنامہ کے جنگلات میں پائے جانے والے اس جانور میں موجود بالکل نئی فنجائی سے ایک دو نہیں بلکہ 84 ایسے اجزا نکالے گئے ہیں جن میں بیماریاں پیدا کرنے والے مائیکروبس اور خلیات ( سیلز) کے خلاف سرگرمی دیکھی گئی ہے۔

پنامہ میں اسمتھ سونین ٹراپیکل ریسرچ انسٹی ٹیوٹ کی سائنسدان اور تحقیقی مقالے کی مرکزی مصنف سارہ ہگن بوتھم کہتی ہیں کہ سلوتھ کی کھال میں سبز الجی چپکی ہوتی ہے اور وہ پانی کو ایک فوم کی طرح جذب کرتی ہے اور اس طرح یہ بہت ہی چھوٹے جانداروں کا ایک گڑھ بھی ہے۔ ' میں حیران ہوں اور جاننا چاہتی ہوں کہ اس کی کھال میں اور کیا کیا کچھ ہے،' انہوں نے کہا۔

ان کی تلاش اس وقت پھل لائی جب سلوتھ کی کھال سے حاصل ہونے والے کئی اجزا مختلف امراض کے دشمن پائے گئے اور ان میں سے کئی ایک نے کینسر خلیات اور پیراسائٹس کو روک کر ان کی تباہی کو آدھا کر دکھایا۔

ان میں سے دو اجزا ملیریا کی وجہ بننے والے پیراسائٹ، پلازموڈیم فالکیپرم کیخلاف بہت سرگرم پائے گئے ۔ اور پندرہ اجزا نے بریسٹ کینسر کو روکنے میں مدد گار ثابت ہوئے۔

سائنسدانوں نے سلوتھ کی کھال میں چھپے 20 دیگر اہم اجزا بھی معلوم کئے ہیں جن میں سے پانچ ایسے ہیں جو اینٹی بایوٹکس بے اثر کرنے والے بیکٹیریا کو سبق سکھاسکتے ہیں۔ رپورٹ میں یہ بھی کہا ہے کہ اس کے جسم سے ملنے والا ایک کمپاؤنڈ بیکٹیریا کو قدرے انوکھے انداز میں ختم کرتا ہے۔