لامحدود قوت کے حصول کا کامیاب تجربہ

امریکا میں بدھ کے روز کیے گئے ایک تجربے میں زمین پر سورج سے زیادہ قوت کی انرجی پیدا کرنے کا کامیاب تجربہ کیا گیا۔ سائنسدانوں اور محققین کے مطابق یہ کامیابی ایک قدیمی خواب کی تعبیر کے مترادف ہے۔
 

ڈوئچے ویلے کی رپورٹ کے مطابق کئی دہائیوں سے توانائی کے لامحدود حصول کے تجربے پر کام کیا جا رہا تھا۔ بدھ کے روز کیے گئے تجربے کو امریکی سائنسدانوں نے ایک انتہائی بڑی پیش رفت قرار دیا ہے۔ تجربہ امریکی ریاست کیلیفورنیا کے مقام لیورمور میں واقع خصوصی تجربہ گاہ NIF میں کیا گیا۔ اِس تجربے میں شریک سائنسدانوں کی بڑی ٹیم کے سربراہ اومر ہریکین (Omar Hurricane) ہیں۔ اُن کا کہنا ہے کہ اب تک کی ماورائی لامحدود قوت کے قریب ترین کا یہ تجربہ ہے اور اِس سے قبل ایسی قوت کا حصول ممکن نہیں ہو سکا تھا۔

اِس تجربے کے لیے ایک ایسا برتن بنایا گیا تھا جو انسانی بال کی موٹائی کا حامل تھا اور اُس میں 192 لیزر بیمز لگائی گئی تھیں۔ ان کے ذریعے چھوڑی گئی انرجی جب آئسوٹوپس سے ٹکرائی تو اُس سے حاصل ہونے والی انرجی کو مزید محدود کر دیا گیا تھا۔ ایک سیکنڈ کے ایک ارب ویں حصے میں نو ہزار سے بارہ ہزار جاؤلز (Joules) کے مساوی توانائی حاصل کی گئی۔ بدھ کے روز کیے گئے تجربے سے حاصل ہونے والی توانائی سابقہ تجربے سے دس گنا زیادہ تھی۔ ایسا ہی ایک تجربہ نومبر سن 2013 میں کیا گیا تھا۔ ایک اور سینئر سائنسدان ڈیبی کیلاہان (Debbie Callahan) کا کہنا ہے کہ ابھی بھی اس تجربے میں مزید پیش رفت کی گنجائش باقی ہے۔

کیلیفورنیا میں کیے گئے تجربے میں ایکس ریز کی بیم کو ایک گولڈ کے سلنڈر میں ڈالا گیا تھا اور اِس سلنڈر میں پہلے سے منجمد آئسوٹوپس ڈیوٹیریم اور ٹریٹیئم کی تہہ جمائی گئی تھی۔ گولڈ سلنڈر کا قطر دو ملی میٹرز کے برابر تھا۔ اس عمل کے دوران ایکس ریز کا استعمال خصوصی سلنڈر کی بیرونی سطح کو توڑنے کے لیے کیا گیا اور پھر نیوکلیائی ادغام کا عمل مکمل ہوا۔ اگر یہی عمل سونے کے ایک باسکٹ بال میں کیا جائے تو وہ جوہری اتصال کے بعد ایک مٹر کے دانے کے برابر رہ سکتا ہے۔ سائنسدانوں کے مطابق اس عمل سے جو قوت پیدا ہوئی، وہ سورج کے مرکزے میں موجود انرجی سے بھی تین گنا زیادہ رہی۔ اس تجربے کے دوران جو پریشر بڑھایا گیا، اُس کا حجم 150 بلین گنا زیادہ طاقتور تھا۔