|
اسرائیل کے شہر تل ابیب میں ہونے والی ٹیکنالوجی کانفرنس
میں ایک ایسی بیٹری پیش کی گئی ہے جو صرف 30 سیکنڈز میں چارج ہو جاتی ہے۔
بی بی سی کی رپورٹ کے مطابق مائیکرو سافٹ کی ’تھنک نیکسٹ کانفرنس‘ یعنی آگے
سوچیئے کے عنوان سے ہونے والی کانفرنس میں اسرائیلی کمپنی سٹور ڈاٹ نے یہ
آلہ پیش کیا جسے حیاتیاتی ڈھانچے سے بنایا گیا ہے۔
|
|
|
|
کارکردگی کے مظاہرے کے دوران اس آلے سے سیم سنگ کے سمارٹ فون ایس4 کی ڈیڈ
بیٹری کو صرف 26 سیکنڈ میں مکمل چارج کر دیا۔
یہ بیٹری ابھی صرف نمونے کے طور پر بنائی گئی ہے اور کمپنی کا کہنا ہے کہ
اسے تجارتی بنیادوں پر مارکیٹ میں آنے میں ابھی تین سال لگیں گے۔
مظاہرے کے دوران ایک سگریٹ کے پیکٹ کے حجم جتنی بیٹری کو سمارٹ فون کے ساتھ
منسلک کیا گیا۔
اس بیٹری کے موجد ڈاکٹر ڈورن میرزڈورف نے بی بی سی کو بتایا کہ ’ہمارا خیال
ہے کہ ہم ایک سال میں اس بیٹری کو سمارٹ فونز کے اندر منسلک کرنے کے قابل
ہوسکتے ہیں اور تین سال میں ہم اسے تجارتی مقاصد کے لیے پیش کر سکتے ہیں۔‘
یہ بائیو آرگینک بیٹری خود ساختہ نینو کرسٹلز کو استعمال کرتی ہے اور اس کے
بارے میں پہلی بار دس سال قبل تل ابیب میں الزائمر کے مرض کے لیے کی جانے
والی ایک تحقیق کے دوران علم ہوا۔
ڈاکٹر میرزڈورف کا کہنا ہے کہ اس ٹیکنالوجی کے کئی استعمال ہیں۔
ان کے بقول’ بیٹریز ایک ایسی صنعت ہیں جس میں ہم اس نئے مواد کا استعمال کر
سکتے ہیں۔ یہ ایک نئی فزکس ہے، نئی کیمسٹری اور آلات تک رسائی کے نئے طریقے۔‘
|
|
|
اس ٹیم نے نینو کرسٹلز کو میموری چِپ میں بھی استعمال کیا ہے جو روائیتی
فلیش میموری کی نسبت تین گنا تیزی سے کام کرتی ہے۔
ڈاکٹر میرزڈورف کے مطابق اس طرز کی بیٹریز بنانے میں 30 سے 40 فیصد زیادہ
لاگت آئے گی اور بننے کے بعد یہ مارکیٹ میں موجود روایتی بیٹریز سے دو گنا
مہنگی ہوں گی۔
لیکن بقول ان کے ان بیٹریز کو بنانا نسبتاً آسان ہے۔
ڈاکٹر میرزڈورف کا کہنا ہے کہ ’اس میں صرف قدرت کو اپنا کام کرنے دیا جاتا
ہے اور ہم صرف کیمیائی عمل میں سہولت مہیا کرتے ہیں۔ |