کاکیشیائی کے پراسرار مقبرے

کاکیشیائی (Caucasus) یورپ اور ایشیا کی سرحد پر واقع ایک ایسا مقام ہے جو کہ بحر اسود اور بحر قزوین کے درمیان واقع ہے- مغربی کاکیشیائی 2 لاکھ 75 ہزار ہیکٹر کے رقبے پر پھیلا ہوا ہے اور اس کے انتہائی مغربی حصے میں ایک پہاڑی سلسلہ موجود ہے جو کہ بحیرہ اسود کے شمال مشرق میں 50 کلومیٹر کے فاصلے پر واقع ہے-

یہ پہاڑی سلسلہ یورپ کے چند بڑے پہاڑی سلسلوں میں سے ایک ہے - اور اس علاقے سے آج تک بہت کم لوگوں کا گزر ہوا ہے-
 

یہاں ہزاروں کی تعداد میں ایسے قدیم اور پراسرار اسٹرکچر موجود ہیں جن کی تاریخ کئی صدیوں پرانی ہے-

آثار قدیمہ کے ماہرین آج تک یہ راز نہیں جان پائے کہ انہیں کس نے تعمیر کیا؟ ان کی تعمیر کے لیے پتھر کہاں سے لایا گیا؟ اور انہیں تعمیر کرنے کا حقیقی مقصد کیا تھا؟ سائنسدانوں کے درمیان اس حوالے سے صرف قیاس آرائیاں پائی جاتی ہیں-

روسی باشندے ان اسٹرکچر کو ڈولمینز ( dolmens ) کے نام سے پکارتے تھے جس کا مطلب “ پورٹل مقبرے “ ہوتا ہے- لیکن اس نام کے باوجود اس بات کا کوئی ٹھوس ثبوت موجود نہیں کہ واقعی یہ تدفین کے لیے تمیر کیے گئے تھے یا پھر یہاں مردوں کو دفتایا جاتا تھا-

آثار قدیمہ کے ماہرین کا کہنا ہے کہ “ ان مقبروں سے ملنے والے قدیم برتنوں اور انسانی باقیات سے معلوم ہوتا ہے ان مقبروں کی تاریخ 4 ہزار سے 6 ہزار سال پرانی ہے- لیکن یہ بھی ممکن ہے کہ یہ اشیا ان مقبروں میں بعد میں کسی نے ڈالی ہوں“-

اگرچہ اس وقت پوری دنیا میں لاتعداد اقسام کے مقبرے موجود ہیں لیکن کاکیشیائی کے مقبروں کی فن تعمیر انتہائی منفرد قسم کا ہے- ان مقبروں کی تعمیر cyclopic پتھروں سے کی جاتی تھی- ان پتھروں کا استعمال کارنر بنانے کے لیے کیا جاتا تھا-