31 دن زیرِ سمندر گزارنے کا انوکھا ریکارڈ

دنیا میں انوکھے اور حیرت انگیز ریکارڈ بنانے کی کوشش کرنے والوں کی کمی نہیں- بعض افراد ان میں سے کامیاب ہوجاتے ہیں جبکہ چند کو ناکامی کا بھی سامنا کرنا پڑتا ہے- ایسا ہی ایک انوکھا ریکارڈ چند روز قبل سامنے آیا ہے جس میں ایک شخص نے 31 دن زیرِ سمندر گزارے-

ایک معروف فرانسیسی بحری ماہر Jacques-Yves کے پوتے Fabien Cousteau نے 31 روز تک زیرِ سمندر رہ کر اپنے ہی دادا کا بنایا ہوا ریکارڈ توڑ ڈالا- انہوں نے یہ ریکارڈ تقریباً نصف صدی قبل قائم کیا تھا-
 

46 سالہ فیبین نے یہ ریکارڈ بنانے کے لیے 31 روز فلوریڈا کے پانی میں گزارے۔

فیبین نے 31 دن زیرِ سمندر بنائی گئی ایک لیبارٹری میں رہ کر کر گزارے اور اس ریکارڈ کا مقصد سمندری آلودگی اور موسموں کی تبدیلی کا مطالعہ کرنا تھا اور ساتھ ہی یہ جانچنا تھا کہ لمبے عرصے تک زیرِ سمندر رہنے کی صورت میں انسانی جسم پر کیا اثرات مرتب ہوتے ہیں-

فیبیئن کی ٹیم سائنسدانوں اور فلم میکرز پر مشتمل تھی اور انہوں نے اپنے اس مشن کا آغاز 1 جون سے کیا-

اس گروپ نے 31 روز سطح سمندر سے 63 فٹ نیچے گہرائی میں ایک اسکول بس کے سائز جتنی بنائی گئی لیبارٹری میں گزارے- اور ٹھیک 31 دن بعد یعنی بدھ کی صبح فیبین اور ان کی مکمل ٹیم واپس زمین پر آگئی-

فیبین اس ریکارڈ کے لیے گزشتہ کئی ماہ سے کوشاں تھے لیکن اس میں انہیں متعدد بار تاخیر کا سامنا کرنا پڑا لیکن آخرکار وہ اپنا مقصد حاصل کرنے میں کامیاب رہے-

1963 میں فیبین کے دادا نے زیرِ سمندر Conshelf II نامی لیبارٹری میں 30 دن گزارے تھے اور ان کے ساتھ 6 غوطہ خوروں پر مشتمل ایک ٹیم تھی- یہ لیبارٹری سوڈان کی بندرگاہ کے نزدیک تھی-