بولنگ ایکشن جانچنے والا ٹیسٹ بھی “ مشکوک “

یونیورسٹی آف ویسٹرن آسٹریلیا نے حالیہ بائیومکینکس ٹیسٹ کے قابل اعتبار ہونے پر سوالات اٹھائے ہیں جن کے باعث کئی بین الاقوامی بولروں پر پابندی عائد کردی گئی ہے۔ واضح رہے کہ گذشتہ 20 سالوں سے انٹرنیشنل کرکٹ کونسل غیرقانونی بولنگ ایکشن کے ٹیسٹ کے ماڈلز کی تشکیل لیے یونیورسٹی آف ویسٹرن آسٹریلیا پر انحصار کرتی رہی ہے۔

بی بی سی کی رپورٹ کے مطابق یونیورسٹی آف ویسٹرن آسٹریلیا نے رواں سال مارچ میں آئی سی سی کے ساتھ انٹیلیکچوئل پراپرٹی ایشو پر تعاون ختم کر دیا تھا۔
 

یونیورسٹی نے الزام عائد کیا ہے کہ آئی سی سی ان کے بائیومکینکس ٹیسٹ کا غلط استعمال کر رہی ہے۔

یاد رہے کہ مشکوک بولنگ ایکشن کی پاداش میں اب تک پاکستان کے سعید اجمل، سری لنکا کے سچیترا سنانائیکے اور نیوزی لینڈ کے کین ولیمسن پر پابندی لگ چکی ہے جبکہ ویسٹ انڈیز کے سنیل نارائن، پاکستان کے محمد حفیظ اور عدنان رسول کے باؤلنگ ایکشن کو ٹی ٹوئنٹی چیمپیئنز لیگ کے دوران مشتبہ رپورٹ کیا گیا۔

یونیورسٹی میں بائیو مکینکس کی ایسوسی ایٹ پروفیسر جیکلین اولڈرسن نے کرک انفو سے بات کرتے ہوئے کہا: ’ہم نے اپنا تعاون ختم کر دیا ہے۔ ہمیں شروع میں آئی سی سی سے شکایت تھی کہ وہ ہماری ریسرچ ہماری اجازت کے بغیر استعمال کر رہی تھی۔ لیکن اب مسئلہ یہ ہے کہ حالیہ ٹیسٹ میں شفافیت نہیں ہے۔‘

یونیورسٹی آف ویسٹرن آسٹریلیا نےخاص طور پر پاکستانی سپن بولر سعید اجمل کے ٹیسٹ پر تحفظات کا اظہار کیا ہے۔ یونیورسٹی کے مطابق سعید اجمل کا ایکشن 2009 میں کلیئر قرار دیا گیا تھا۔

اولڈرسن کا کہنا ہے کہ 2009 میں ’گیند چھوڑنے کے فریم‘ کو سعید اجمل کے بولنگ ایکشن کو قانونی قرار دیے جانے میں بہت زیادہ اہمیت حاصل تھی۔

’سب سے زیادہ بولنگ ایکشن کے ٹیسٹ سعید اجمل کے کیے گئے۔ 2009 میں سعید اجمل کی بہت ساری گیندیں غیر قانونی ہوتیں اگر گیند چھوڑنے کا فریم 2-1 یا 0.008-0.004 سیکنڈ کے بعد ہوتا۔‘