سردیوں میں گرم اور رات میں چمکتی انوکھی سڑکیں

سائیکلوں کے لیے ماحول دوست ٹریک بنانے کے سلسلے میں حیران کن ایجادات سامنے آ رہی ہیں۔ رات کو چمکنے، سردیوں میں گرم رہنے اور بجلی پیدا کرنے والی سڑکیں کاربن کے اخراج میں کمی کا باعث بھی ہیں۔

ڈوئچے ویلے کی ایک دلچسپ رپورٹ کے مطابق ہالینڈ میں اس وقت سائیکلوں کی تعداد وہاں کے شہریوں کی تعداد سے بھی زیادہ ہے اور ان کی مقبولیت میں روز بروز مزید اضافہ ہوتا جا رہا ہے۔ حکومت کی بھی کوشش ہے کہ لوگ گاڑيوں کی بجائے سائیکلوں پر سفر کریں تاکہ کاربن ڈائی آکسائیڈ کے اخراج میں کمی ممکن ہو سکے۔ ہالینڈ میں سائیکلسٹ یونین سے تعلق رکھنے والے مارٹن فان ایس کا کہنا تھا کہ سائیکلنگ کے بڑھتے ہوئے رجحان، پالیسی سازوں اور انجينئرز کی وجہ سے ملک میں ماحول دوست اور ونٹر پروف سائیکل ٹریک بنائے جا رہے ہیں۔ ان کے مطابق سائیکلنگ کے شعبے میں سب سے زیادہ ایجادات ان کے ملک میں ہی ہو رہی ہیں۔
 

چمکتے راستے
اسی طرح کی ایک نئی ایجاد ’فان گوفی روسگارڈا‘ نامی سائیکل ٹریک ہے، جو رات کو چکمتا ہے۔ ایسے ایک ٹریک کا افتتاح گزشتہ ماہ کیا گیا ہے۔ اس ٹریک پر ایسے پتھر لگائے گئے ہیں، جو سورج کی روشنی سے چارج ہوتے ہیں اور رات کو جگما اٹھتے ہیں۔ اس ٹریک کا نام مشہور مصور ’فان گوفی روسگارڈا‘ کے نام پر رکھا گیا ہے۔ ان کی ایک پینٹنگ سٹیری نائٹ ( تاروں بھری رات) میں اسی طرح کے ایک راستے کی منظر کشی کی گئی ہے۔ ’فان گوفی روسگارڈا‘ ایک سو پچیس برس پہلے وفات پا گئے تھے لیکن ان کی یادیں اس چمکتے راستے کے ساتھ زندہ کی گئی ہیں۔

ساری رات چمکنے کے لیے ان پتھروں کو تھوڑی بہت بجلی کی بھی ضرورت ہوتی ہے لیکن انجینئرز کا کہنا ہے کہ وہ جلد ہی ایسے پتھر بھی تیار کر لیں گے، جو ساری رات بغیر بجلی کے روشن رہا کریں گے۔