نیند نہ آئی تو کیا ہوگا؟ جانیے سائنس کی زبانی

آنکھوں سے نیند کا اڑ جانا اگر اردو شاعری کی نظر سے دیکھا جائے تو یہ عشق محبت کی نشانی ہوسکتا ہے اور اگر کسی طالب علم سے پوچھیں تو یہ امتحانات کی پریشانی ہوسکتی ہے۔ ہر فرد، ہر شعبے غرض سب کا نظریہ مختلف ہی ہوگا مگر کیا واقعی یہ اتنی ہی سادہ اور بے ضرر بات ہے؟ ٹھیک ہے کہ نیند ایک ایسی پراسرار چیز ہے جس کے بارے میں ہم اب بھی بہت کچھ نہیں جانتے اور سائنس اس کے اسرار جاننے کے لیے مسلسل کوشاں ہے۔مگر ایک بات بالکل واضح ہے اور وہ یہ کہ نیند سے ہمارا رشتہ کمزور ہونے کا مطلب ہماری صحت کی تباہی ضرور ہے اور اس کی تلافی بھی کئی بار ممکن نہیں ہوپاتی تو نیند کے چند ایسے ہی انوکھے رازوں کے بارے میں جانتے ہیں جو اب تک سائنس ہمارے سامنے لاچکی ہے اور ہوسکتا ہے کہ وہ آپ کی آنکھوں کو کھولنے کی بجائے بند کرنے پر مجبور کر ہی دیں۔ اپنی صحت کی بہتری کے لیے دنیا میگزین کے شائع کردہ ان رازوں کو آپ بھی ضرور جانیے:

کم خوابی سے الزائمر کا خطرہ
زیادہ درمیانی عمر میں کم خوابی کا شکار رہنے والے افراد کے لئے انتباہ ہے کہ یہ چیز بعد کی زندگی میں دماغی مرض الزائمر کا سبب بن سکتی ہے۔واشنگٹن یونیورسٹی کے تحت ہونے والی تحقیق کے مطابق جو لوگ سونے کے دوران بار بار جاگتے ہیں ان میں دماغی انتشار کا سبب بننے والا کیمیکل پیدا ہو جاتا ہے۔ اس کیمیکل سے 10 یا 15 برس تک یادداشت کی کمزوری یا کوئی اور اشارہ سامنے نہیں آتا، تاہم ان کے اندر الزائمر جڑ پکڑنے لگتا ہے، اور اگر وہ کسی وجہ سے دنیا سے گزر نہ جائیں تو ان میں الزائمر کا مرض سامنے بھی آجاتا ہے۔ تحقیق کے مطابق جو لوگ سونے کے دوران 5 یا اس سے زائد بار اٹھتے ہیں ان میں یہ بیماری ہونے کا امکان بہت زیادہ ہوتا ہے۔
 

بے خوابی اور خودکُشی کا رجحان
اچھی نیند سے محرومی لوگوں میں خودکُشی کا رجحان بڑھا دیتی ہے۔ امریکا کی جارجیا ریجنٹ یونیورسٹی کی تحقیق کے مطابق بے خوابی اور ڈراؤنے خواب لوگوں میں خودکشی کا رجحان پیدا کرتے ہیں تاہم ابھی اس کی وجوہات معلوم نہیں ہوسکیں۔ تحقیق میں نیند آنے کی توقع ختم ہونے اور مایوسی کی دیگر وجوہ کے درمیان تعلق کی نشان دہی کی گئی ہے جو خودکشی کا سبب بن جاتی ہے۔ محقق ڈاکٹر ڈبلیو واہن میککل کے مطابق بے خوابی مایوسی کی شکل میں تبدیل ہوجاتی ہے اور یہ کیفیت خودکشی کی ایک طاقت ور پیش گوئی ہوتی ہے۔ تحقیق میں کہا گیا ہے کہ جب لوگ نیند کے بارے میں منفی جذبات کا شکار ہوجاتے ہیں تو ان میں اس بے خواب دنیا کو چھوڑ جانے کا خیال بھی جڑ پکڑنے لگتا ہے۔

اچھی نیند لیں اور خود غرض بننے سے بچیں
اچھے بچے بن کر اچھی نیند لیں اور خود کو خودغرض بننے سے بچائیں۔ یہ دلچسپ بات ایک امریکی تحقیق میں سامنے آئی۔کیلیفورنیا کی برکلے یونیورسٹی کی تحقیق کے مطابق اچھی نیند آپ کو کم خودغرض بناکر رشتے بچانے میں مددگار ثابت ہوتی ہے۔ تحقیق میں کہا گیا ہے کہ صحیح نیند سے لوگ اپنے شریک حیات کو کم تنگ کرتے ہیں، ان کا شکریہ ادا کرتے ہیں اور ان کے کاموں کو سراہتے ہیں۔ تحقیق کے دوران 18 سے 56 سال کی عمر کے 60 جوڑوں کی زندگی کا معائنہ کیا گیا اور دیکھا گیا کہ لوگ رات کو کتنے گھنٹے سوتے ہیں اور اپنے شریک حیات کو وہ کس حد تک سراہتے ہیں۔ محققین کے مطابق بہتر نیند کے بعد لوگ اپنے ساتھیوں کے ساتھ کام میں شامل ہوجاتے ہیں اور ان کی حوصلہ افزائی بھی کرتے ہیں۔

سونا دل کی صحت کیلئے بھی بہترین
کم خوابی یا ناکافی نیند کے دل کی صحت پر انتہائی مضر اثرات مرتب ہوتے ہیں۔ البامہ یونیورسٹی کے ماہر ایلن ایس گارٹلر کی تحقیق کے مطابق 6 سے 8 گھنٹے تک دل کی صحت کے لئے انتہائی مفید ہوتی ہے۔ تحقیق کے مطابق گہری اور اچھی نیند سے دل کی دھڑکن کی رفتار اور بلڈ پریشر کم ہوتا ہے، جس سے دل پر موجود تناؤ بھی کم ہوجاتا ہے۔ تحقیق کے مطابق دل کی دھڑکن اور بلڈپریشر میں نیند کے خواب دیکھتے ہوئے آنکھوں کی حرکت سے کمی بیشی ہوتی ہے، یہ عمل دل کو زیادہ صحت مند بناتا ہے۔ ڈاکٹر ایلن کے بقول مناسب نیند نہ ملنے سے بلڈ پریشر اور تناؤ بڑھ جاتا ہے، جبکہ وزن بڑھنے لگتا ہے، جس سے امراض قلب کا خطرہ بہت زیادہ ہوجاتا ہے۔

بے خوابی کے شکار افراد کی دھڑکن اچانک تھمنے کا خطرہ
بے خوابی کے شکار افراد میں دل کی دھڑکن اچانک تھم جانے (ہارٹ فیلئیر) کا خطرہ 3 گنا زائد ہوتا ہے۔ ناروے کی نارویجن یونیورسٹی آف سائنسز اینڈ ٹیکنالوجی کی تحقیق کے مطابق بے خوابی کی 3 اقسام کا شکار ہونے والے افراد میں دھڑکن اچانک رُک جانے کا خطرہ بہت زیادہ ہوتا ہے۔ محقق ڈاکٹر لارس لاؤسینڈ کے مطابق سونے میں مشکل، اچانک سو جانے اور صبح اٹھنے کے بعد تازگی کا احساس نہ ہونے جیسی کیفیات میں مبتلا افراد کا دل بتدریج کمزور ہونے لگتا ہے۔ انھوں نے بتایا کہ بے خوابی سے خطرہ تو بڑھتا ہے تاہم ابھی تک اس کی وجوہات کے بارے میں معلوم نہیں ہوسکا، اس حوالے سے مزید تحقیق کی ضرورت ہے۔