مایوسی کے کچھ انوکھے اسباب اور منفرد حل

یہ کہنا غلط نہیں ہوگا کہ جسم چاہے جتنا بھی مضبوط ہو اگر دماغی طور پر کمزور ہو تو دنیا میں آگے بڑھنے یا روشن مستقبل کا تصور تک ممکن نہیں مگر آج کی دنیا میں ڈپریشن یا مایوسی اتنی عام ہے کہ ہر دوسرا یا تیسرا فرد اس سے متاثر نظر آتا ہے۔ مگر یہ بھی حقیقت ہے کہ اکثر ذہنی مایوسی ہمارے کنٹرول سے باہر ہوتی ہے جیسے کسی پیارے کی موت، ملازمت ختم ہوجانا یا مالی مشکلات۔مگر کیا آپ کو معلوم ہے کہ روزمرہ کی زندگی میں ہمارے چھوٹے چھوٹے انتخاب یا چوائسز بھی ہمارے مزاج پر اندازوں سے زیادہ اثرات مرتب کرتے ہیں۔ جیسے آپ کی سوشل میڈیا کی عادات، ورزش کا معمول یہاں تک کہ چلنے کا انداز تک آپ کی دماغی صحت پر اثرات مرتب کرتا ہے۔تو ڈپریشن یا مایوسی کے بارے میں طبی سائنس کی چند دلچسپ تحقیقی رپورٹس کے بارے میں جانیے- ان رپورٹس پر مبنی دنیا میگزین نے ایک جامع رپورٹ تیار کی ہے جو آپ کو اس تکلیف دہ ذہنی عارضے سے تحفظ دینے میں مددگار ثابت ہوں گی-
 

آدھے سر کے درد سے مایوسی پھیلنے کا خطرہ:
زیادہ آدھے سر کا درد یا مائیگرین کی مستقل شکار خواتین میں مایوسی یا ڈپریشن کا خطرہ بہت زیادہ ہوتا ہے۔ امریکہ کی کیلیفورنیا یونیورسٹی کی 36 ہزار خواتین پر کی جانے والی تحقیق میں یہ بات سامنے آئی ہے کہ 14برسوں تک آدھے سر کے درد کا شکار رہنے والی 36 فیصد خواتین میں مایوسی کی شرح بہت زیادہ پائی گئی۔اس تحقیق کے مطابق تحقیق کے دوران 4 ہزار خواتین میں دماغی امراض پائے گئے، جبکہ یہ بھی معلوم ہوا کہ ساڑھے 6 ہزار خواتین شدید خطرے کی زد میں ہیں۔ ماہرین کا کہنا ہے کہ اس تحقیق سے سامنے آنے والے نتائئج سے خواتین کو مائیگرین سے پیدا ہونے والی پیچیدگیوں سے بچانے میں مدد ملے گی۔

رات دیر تک ٹی وی دیکھنے سے مایوسی کا خطرہ:
زیادہ کمپیوٹر یا ٹی وی اسکرین کے سامنے رات گئے تک بیٹھے رہنے کے بعد سونے سے ڈپریشن یا مایوسی میں مبتلا ہونے کے امکانات بہت زیادہ بڑھ جاتے ہیں۔ اوہائیو یونیورسٹی کی تحقیق کے مطابق رات کو ہلکی روشنی کے سامنے مسلسل بیٹھے رہنے سے رویوں اور دماغ میں ویسی تبدیلیاں آتی ہیں، جیسے مایوسی کے شکار افراد میں نظر آتی ہیں۔تحقیق کے مطابق مردوں کے مقابلے میں خواتین رات گئے تک ٹی وی دیکھنے سے مایوسی کے عارضے میں زیادہ مبتلا ہوتی ہیں۔ تحقیقی ٹیم کی قائد ٹریسی بیڈروشن کا کہنا ہے کہ رات گئے تک ٹی وی دیکھنے سے بریسٹ کینسر اور موٹاپے کا تعلق تو ثابت ہوتا ہے مگر یہ معلوم ہوا کہ اس سے مزاج میں بھی بگاڑ آتا ہے۔تحقیق کے مطابق اس عادت کے بعد لوگوں میں ایک پروٹین tumor necrosis factor کی شرح بڑھ جاتی ہے جس سے ڈپریشن کا خطرہ بڑھ جاتا ہے۔

خراب ذہنی صحت سے اوسط عمر میں کمی کا امکان:
ذہنی صحت کے مسائل زندگی کی مدت بھی کم کرسکتے ہیں۔ یونیورسٹی کالج لندن اور ایڈنبرگ یونیورسٹی کی مشترکہ تحقیق کے مطابق ذہنی صحت کے مسائل جیسے مایوسی یا ڈر وغیرہ سے آئندہ ایک سے 2 دہائیوں میں موت کا خطرہ بڑھ جاتا ہے۔تحقیق میں بتایا گیا ہے کہ مایوسی یا خوفزدہ افراد کی اوسط عمر کم ہو جاتی ہے اور ان کی موت کی کئی بار تو کوئی وجہ بھی سامنے نہیں آتی۔ تحقیق میں مزید بتایا گیا ہے کہ ذہنی صحت کے معمولی مسائل سے بھی مختلف جان لیوا امراض کا خطرہ بڑھ جاتا ہے جن میں امراض قلب قابل ذکر ہیں۔تحقیقی ٹیم کے سینئر محقق ڈیوڈ بیٹی کا کہنا ہے کہ اس سے ثابت ہوتا ہے کہ وزن، ورزش، تمباکو نوشی اور ذیابیطس کی طرح ذہنی صحت کے مسائل کو بھی سنجیدگی سے لیا جانا چاہئے۔

بولنے کے انداز سے بھی تناؤ یا مایوسی کا اندازہ لگانا ممکن:
بولنے کے انداز سے بھی ذہنی تناؤ یا مایوسی کی شدت کا اندازہ لگایا جاسکتا ہے۔ میلبورن یونیورسٹی کی تحقیق کے مطابق مایوسی کے شکار مریضوں کی شناخت کے لئے ٹیلیفون پر ان کی گفتگو میں آنے والی تبدیلیاں اہم ثابت ہوسکتی ہیں۔تحقیقی ٹیم کے قائد ایڈم ووجل کا کہنا ہے کہ بولنا دماغی صحت کو ظاہر کرنے کی سب سے اہم علامت ہے اور اس سے ہمیں اندازہ ہوجاتا ہے کہ دماغ کس حد تک بہتر کام کررہا ہے۔انھوں نے کہا کہ تناؤ یا مایوسی کے شکار افراد زیادہ بات کرنے کے دوران بہت کم رکتے ہیں اور وہ بہت تیز رفتاری سے بات کرتے ہیں۔ اسی طرح شدید مایوسی کے شکار افراد فقروں کے دوران بہت زیادہ دیر تک رکتے ہیں اور وہ سستی سے بات مکمل کرتے ہیں۔تحقیق میں بتایا گیا ہے کہ ذہنی عوارض کے شکار افراد اپنے خیالات کا اظہار مشکل سے کرپاتے ہیں اس چیز سے ہم ان کی شناخت کر کے ان کے بہتر علاج کو ممکن بناسکتے ہیں۔

بچپن میں کھانا چھوڑنا پڑسکتا ہے نوجوانی میں بھاری:
وہ بچے جو کھانے پینے سے دور بھاگتے ہیں ان کو اس کا نتیجہ لڑکپن یا نوجوانی میں تکلیف اور مایوسی جیسی کیفیات کی صورت میں بھگتنا پڑتا ہے۔ نبراسکا لنکن یونیورسٹی کی تحقیق کے مطابق ڈپریشن اور شدید درد کا سامنا 44 فیصد نوجوانوں کو ہوتا ہے جس کی وجہ بچپن میں کھانے سے دور بھاگنا ہے۔محقق بریجیٹ گوزبے کے مطابق بچپن میں ذہنی و جسمانی صحت کا اثر کام یا ملازمت کرنے کی عمر پر پڑتا ہے۔ انکا کہنا ہے کہ وہ تحقیق کے نتائج سے حیران رہ گئی کہ بچپن میں بھوکا رہنے کا نتیجہ نوجوانی میں شدید درد اور مایوسی کی صورت میں نکلتا ہے۔

مایوسی بھی چھوت کا مرض قرار:
مایوسی اور اس سے منسلک جذبات ایک شخص سے دوسرے شخص میں بھی منتقل ہوسکتے ہیں۔ نیدرلینڈ کی انڈیانا یونیورسٹی کی تحقیق کے مطابق مایوسی کے شکار افراد کے دوستوں میں بھی اس ذہنی عارضے کا خطرہ بڑھ جاتا ہے۔تحقیق کے مطابق زندگی کے پرتناؤ لمحات میں منفی سوچ رکھنے والے افراد نہ صرف خود متاثر ہوتے ہیں بلکہ وہ اپنے پیاروں کو بھی ڈپریشن یا مایوسی کا شکار بنا دیتے ہیں۔ محقق ڈاکٹر جیرالڈ ہیفل کا کہنا ہے کہ لڑکپن سے ہی ڈپریشن کا غلبہ ہوجائے تو وہ نوجوانی تک برقرار رہتا ہے۔اس تحقیق کے دوران 206 طالبعلموں کا جائزہ لیا گیا جو کہ یونیورسٹی کے سال اول میں ایک دوسرے کے ساتھ مقیم تھے۔ تحقیق میں یہ بات سامنے آئی کہ جو افراد ذہنی طور پر مایوسی کا شکار تھے 6 ماہ بعد ان کے کمرے کے ساتھی بھی ڈپریشن کا شکار ہوکر ان ہی طرح سوچنے لگے۔تحقیق کے مطابق لوگوں کے رہائشی ماحول میں تبدیلی مایوسی کے علاج کے لئے فائدہ مند ثابت ہوسکتی ہے۔

شریک حیات سے خراب تعلق بڑھا دیتا ہے ذہنی امراض کا خطرہ:
شریک حیات یا رشتے داروں کے ساتھ خراب تعلق ذہنی امراض کا خطرہ بڑھا دیتا ہے۔ میامی یونیورسٹی کی تحقیق کے مطابق کسی شخص کے شریک حیات، خاندان اور دوستوں کے تعلق کو دیکھتے ہوئے مستقبل میں اس کے اندر ممکنہ ذہنی امراض یا مایوسی کی پیشگوئی کی جاسکتی ہے۔تحقیق کے مطابق اگر کسی شخص کو اپنے شریک حیات سے تعاون و مشکلات کا سامنا ہو تو اس میں ڈپریشن کا خطرہ بہت زیادہ ہوتا ہے، جبکہ تعلق بہت زیادہ خراب ہوگا تو یہ خطرہ دوگنا بڑھ جائے گا۔ محقق ایلن ٹیو کا کہنا ہے کہ سماجی تعلق کا معیار مایوسی یا ڈپریشن میں اضافے کا خطرہ بڑھا دیتی ہے۔